Read dyu Dusukasidɔnkili kitabu 6 Bible Online

Dusukasidɔnkili kitabu 6 - dyu bible

Dusukasidɔnkili kitabu 6

¹Ele min cɛɛ ka ɲi ni musow bɛɛ ye, i kanubaga tagara min? I kanubaga y'a kuun sin min? An be fara i kan k'a yaala.

²Ne kanubaga tagar'a ka nankɔ la, wusulan falennin be min kɔnɔ. A ben'a ka begɛnw dɛndɛ min kɔnɔ. A bena feerenw tigɛ yen.

³Ne ye n kanubaga ta ye, n kanubaga fana ye ne ta ye, ale min b'a ka begɛnw dɛndɛ lisiyiriw cɛma.

⁴I cɛɛ ka ɲi, ne kanubaga, i ko Tirisa dugu! I cɛɛ ka ɲi i ko Zeruzalɛmu dugu! I ka fari i ko kɛlɛbolo kɛlɛkɛyɔrɔ la!

⁵I ɲaa bɔ n kan, n'o tɛ, i ka filɛli kɛcogo be ne hakili wili. I kunsigi be i ko bakulu minw be girinna ka bɔ Galaadi kulu kan.

⁶E ɲiiw be i ko sagakulu, min sii tigɛra n'u be bɔra kɔɔ la. U bɛɛ kɛɲɛnin lo fila fila, foyi si te yen min b'a danna.

⁷I daforoko be i ko lenmuruba faan kelen, i kuun datugufani kɔrɔ.

⁸Masacɛ musow ye mɔgɔ bi wɔɔrɔ ye, a gɛrɛfɛmusow ye bi seegi ye, sunguruw daa te lɔn.

⁹Nga ne kanubaga ye kelen ye Ne kelen ta! A kelen lo a baa fɛ. A koo ka di a woloba ye kosɔbɛ. Sunguruw man'a ye, u b'a fɔ ko: E dagamuna. Masacɛ musow n'a gɛrɛfɛmusow b'a tɔgɔɲuman fɔ ko:

¹⁰«Ee! Nin ye sunguru jumɛn ye? A be i ko dugu gwɛtɔ. A cɛɛ ka ɲi i ko kalo, a be manamana i ko tile. Nga a be mɔgɔ jaa tigɛ i ko kɛlɛbolo u ka kɛlɛkɛtaamasiɲɛ kɔrɔ.»

¹¹Ne jigira nankɔ la, yiridenw be min kɔnɔ waasa k'a filɛ lɛkɔnɔfɛnw be boɲa cogo min na, k'a filɛ ni *ɛrɛzɛn be nɛrɛla, ni nankɔ yiriw be feerenna.

¹²Ne te foyi faamuyara tugu dɛ! I be ne nagasira Hɔrɔnw denmuso.