Read dyu Lɔnniya kitabu 1 Bible Online

Lɔnniya kitabu 1 - dyu bible

Lɔnniya kitabu 1

¹Aw minw be dugukolo mara, aw k'a to tilenninya koo ka diya aw ye! Aw k'aw ka miiriya la Matigi kan sɔbɛ la, aw k'a yɔrɔ ɲini ni kɔnɔgwɛ ye.

²Bari ni mɔgɔ min t'a kɔrɔbɔ, o tigi le ben'a ye, a b'a yɛrɛ yira mɔgɔ la min jigi b'a kan.

³Namaranko miiriya be Ala ni mɔgɔ faran ɲɔgɔn na. Ni hakilitan be Setigi kɔrɔbɔ, a ka setigiya bena maloya bila a la.

⁴Kojugukɛla te lɔnniya sɔrɔ. Lɔnniya te don kojugukɛla la.

⁵Hakiliɲuman b'a yɛrɛ yɔrɔ jaɲa namaramɔgɔw la. A te gwɛrɛ nalomanyakuma fɔbaga la. Tilenbaliyako ka go a ye haali.

⁶Lɔnniya ka fisa adamadenw ma kosɔbɛ, nga mɔgɔ min be kumajugu fɔ Ala ye, a t'o tigi to ɲasuma na. Ala be mɔgɔ kɔnɔnakow lɔn, a b'a dusulakow kala ma, a b'a ka fɔtaw bɛɛ mɛn.

⁷Matigi ka Nii be yɔrɔ bɛɛ dugukolo kan, a b'a kɛ diɲɛ kɔnɔ fɛɛnw be ɲɔgɔn minɛ kosɔbɛ, o la, kuma o kuma mana fɔ, a b'o bɛɛ lɔn.

⁸Ni mɔgɔ min ye kumajugu fɔ, o be lɔn, a ka kan ni tɔɔrɔ min ye, a ben'o sɔrɔ.

⁹Alaɲasiranbaliw ka kolatigɛninw bena sɛgɛsɛgɛ, u ka kuma bena fɔ Matigi ye, u ka kojuguw sara bena di u ma.

¹⁰Ala tulo be kuma bɛɛ la, hali ŋunuŋunukan si te se ka dogo a la.

¹¹O la, aw k'aw yɛrɛ kɔlɔsi ŋunuŋunu gwansan ma. Aw ka se aw daa minɛko la, aw kana kumajugu fɔ. Bari hali kuma min fɔra dogo la, o bena na ni koo dɔ ye. Mɔgɔ min be galon la a tɔɲɔgɔnw kan, o tigi b'a yɛrɛ nagasi.

¹²Aw kana siraɲuman bila ka kɛ aw yɛrɛ ka saya sababu ye. Aw kana halakili lase aw yɛrɛ ma aw ka kɛwaliw fɛ.

¹³Ala ma saya dan, nimanfɛnw ka saya man d'a ye.

¹⁴A ye fɛɛn bɛɛ dan janko u ka to nii na, a ka danfɛnw bɛɛ kɛkun ye sii sɔrɔ ye. Mɔgɔ fagafɛn te u la. Dugukolo kan kuntigiya te saya bolo.

¹⁵Bari tilenninya te koo banta ye.

¹⁶Alaɲasiranbaliw be saya le ɲini u ka kɛwaliw n'u ka kumaw fɛ. U be saya fɛ yɛrɛ yɛrɛ le, u b'a miiri ko u teri lo. U bɛnna n'a ye, o la, u ka kan n'a ye!