Read dyu Lɔnniya kitabu 10 Bible Online

Lɔnniya kitabu 10 - dyu bible

Lɔnniya kitabu 10

¹Mɔgɔ fɔlɔ dannin kɔ, diɲɛ mɔgɔw bɛɛ faa, k'ale to a kelen na, lɔnniya y'a tanga. O kɔ, a y'a bɔsi ka bɔ a yɛrɛ ka kojugu la.

²Ale lo ye fanga d'a ma fana, a sera ka fɛɛn bɛɛ mara.

³ Mɔgɔjugu y'a yɛrɛ ta dimi fɛ ka ban lɔnniya la. A y'a baden faga dimi bolo, k'a yɛrɛ bɔnɔ.

⁴ O tigi le kɛra sababu ye jiba ye dugukolo datugu, dugukolo kisira lɔnniya le barika la. A ye mɔgɔtilennin nin ɲabila kurun yirilaman fangatan kɔnɔ.

⁵ Tuma min na siyaw bɛnna k'u bena kojugu kɛ, u ka fɔta ɲagamina, n'u tora ɲɔgɔn faamubaliya la, o tuma na, ale lɔnniya sera mɔgɔtilennin ma, k'a dɛmɛ ka kɛ jalakibali ye Ala ɲakɔrɔ. A ye barika don a la, a m'a deen ka kodiya jati.

⁶ Alaɲasiranbaliw halakituma na, ale lɔnniya ye mɔgɔtilennin kisi. Tasuma min ye dugu duuru minɛ, mɔgɔtilennin nin bolila ka kisi o ma.

⁷U ka juguya nɔɔ be ye halibi dugukolo kan: A jara, a be sisi bɔra, a yiriw be deen kɛ, nga u te mɔ, ani kɔgɔ kabakurulaman be yen min be mɔgɔ dɔ ka lanabaliya yira.

⁸U ma lɔnniya jati minkɛ, u ma se ka koɲuman lɔn, nga o dama tɛ. U ka duguw tomow ye hakilijigifɛn ye u ka nalomanya la, janko u ka fili kana bɔ mɔgɔ hakili la.

⁹Nga minw be lɔnniya ka baara la, a be olu bɔsi ka bɔ u ka gwɛlɛyaw la.

¹⁰ Loon dɔ, ale lo ye siratilennin yira mɔgɔtilennin na a bolituma na a baden diminin ɲa, ale lo ye Ala ka masaya yir'a la, ale lo ye Ala ka fɛɛnw cogo yir'a la. Ale lo tora ka barika don a la, a sigɛntuma na k'a ka baara nafa buguya.

¹¹O tigi tɔɲɔbagaw y'a keliya, nga lɔnniya tora n'a ye k'a nafolotigiya.

¹²A y'a tanga a juguw ma, a y'a tanga a dɛndɛbagaw ma. A y'a dɛmɛ kɛlɛba dɔ la yɛrɛ janko a k'a lɔn ko Alaɲasiran barika ka bon fɛɛn bɛɛ ye.

¹³ U tun ye mɔgɔtilennin min feere, a m'o to. A tora n'a ye k'a kisi, k'a bɔ hakɛ la.

¹⁴A jigira n'a ye dingɛ kɔnɔ, a ma bɔ a fɛ k'a sirinin to fɔɔ ka ta'a kɛ faama ye o yɔrɔ la, fɔɔ a kuntigiw sɔnn'a ka faamaya la. Lɔnniya y'a yira ten ko mɔgɔtilennin tɔgɔ cɛnbagaw ye galontigɛlaw ye. O la, a ye boɲa banbali l'a kan.

¹⁵ Ale lɔnniya sababu la, Ala ka jama, siya jalakibali nin bɔsira siyaw bolo minw tun b'u tɔɔrɔla.

¹⁶A tora ni Ala ka baarakɛla dɔ ye, ale murutira masa farimanw ma, kabakow ni taamasiɲɛw barika la.

¹⁷A ye Ala ka mɔgɔw ka baaragwɛlɛnw sara d'u ma, a y'u bila sira kabakoman kan. Tilefɛ, a kɛra u ka suma ye, sufɛ, a kɛra lolo manamananinw ye.

¹⁸Ale barika la, u ye Kɔgɔjiwulen cɛtigɛ seen na. U ye jiba cɛtigɛ ale lo barika la.

¹⁹Nga, a y'u juguw tunu, o kɔ, a y'u bɔ jukɔrɔ k'u fili kɛnɛ ma jida la.

²⁰O kama, mɔgɔtilenninw ye Alaɲasiranbaliw bololafɛnw cɛ. O kɔ, u ye ele Matigi tɔgɔ tanu dɔnkili la. U jɛnna ka barika la i ye, sabu e y'u tanga.

²¹Bari, lɔnniya ye bobow daa yɛlɛ, a ye denɲɛninw nɛɛn foni.