Read dyu Lɔnniya kitabu 12 Bible Online

Lɔnniya kitabu 12 - dyu bible

Lɔnniya kitabu 12

¹E yɛrɛ ka nii cɛnbali le be nimanfɛnw bɛɛ la.

²I be kojugukɛlaw kolo fana dɔɔni dɔɔni. E b'u lasɔmi k'a yira u la k'u ye hakɛ kɛ janko u b'u ka kojugu dabila k'u jigi la ele Matigi kan.

³I ka jamana sigibagakɔrɔw ta kɛra ten.

⁴U koo goyara i ye u ka kɛwalijuguw kosɔn: Subagaya, landajuguw,

⁵denmisɛnw fagako denjuguya la, mɔgɔ sogoɲimi n'a joli min ɲanagwɛ. U tun be ɲimini kɛ fɔɔ ka se nugu ma. O landakɛbaga minw b'o juguya nin na,

⁶denfa minw b'u deenw faga ni dɛmɛbaga t'u la. E tun b'a fɛ an bɛmaw k'u sii tunu,

⁷janko, o yɔrɔ min koo ka gwɛlɛ i ma ka tɛmɛ tɔw bɛɛ kan, ale ka jamakura kunbɛn, ele Ala deenw ka se ka sigi o yɔrɔ la, minw ka kan n'a ye.

⁸O bɛɛ n'a ta, i y'a nɔgɔya mɔgɔ nunu ye, bari adamadenw lo. I kɔnna ka dondoliw ci k'u halaki dɔɔni dɔɔni.

⁹E tun be se ka kɛlɛ labɛnnin wili, ka Alaɲasiranbali nunu don mɔgɔtilenninw bolo, walima ka sogojuguw bila u kama k'u ta cɛn yɔrɔnin kelen, walima ka kuma kelen dama fɔ.

¹⁰Nga e bolo sera u ma dɔɔni dɔɔni ten, janko ka cogo d'u ma ka nimisa ka faran u ka kojugu la. K'a sɔrɔ e tun b'a lɔn ko u wolola ni sɔnjugu ye, ko juguya b'u la kabin'u wolotuma. I tun b'a lɔn fana k'u ka miiriya tena yɛlɛma cogo si la.

¹¹Bari, siya nin danganin lo kabin'a daminɛ. E m'u ka hakɛ juru sara u la. Nga o ma kɛ mɔgɔ dɔ ka ɲasiran kosɔn.

¹²Jɔn yɛrɛ be se k'a fɔ ko: «Ala, i be mun le kɛra ten?» Jɔn be se ka ban e sago ma? Jɔn be se k'i wele kiti la ko i ye siyaw halaki, ele yɛrɛ ye minw dan? Jɔn be se ka na i ɲakɔrɔ ka tilenbaliw dɛmɛ kiti la?

¹³Ka ele Ala niin bɔ a la, batofɛn wɛrɛ te yen min be janto fɛɛnw bɛɛ la, i ka kan ka ɲafɔri kɛ min ye ko i ka kiti tilennin lo.

¹⁴Masacɛ te yen, faama te yen fana, min be se ka dɔ fɔ i ye mɔgɔ nunu ka halakiko la.

¹⁵I tilennin lo, o la, i be fɛɛn bɛɛ mara ni tilenninya ye. Ka mɔgɔ jalakibali jalaki, i b'o jati koo ye min bɛnnin te i ka fanga ma.

¹⁶E ka fangatigiya bɔra i ka tilenninya la. I ye fɛɛn bɛɛ kuntigi ye minkɛ, e be ɲumanya kɛ fɛɛn bɛɛ ye.

¹⁷Mɔgɔ minw ma la e ka fanga dafanin na, e b'a yira olu la. Minw lanin b'a la ka sɔrɔ k'i darabɔ, i b'a kɛ olu ta be to u kɔnɔ.

¹⁸I be se i ka fanga minɛcogo la, i be mɔgɔ kiti ni ɲumanya ye. I b'an mara ni timinadiya ye haali. Fanga b'i bolo k'i sagolako kɛ tuma bɛɛ.

¹⁹E y'a kɛ ten k'a yira e ka jama na ko mɔgɔtilennin ka kan ka koɲuman kɛ adamadenw ye. E y'i ka deenw jigi fa, bari u filinin kɔ, u bena se ka nimisa ka faran u ka kojuguw la.

²⁰I ka deenw juguw tun ka kan ni fagali ye, nga e y'u ɲaa gwan makari la janko u ka se ka nimisa ka kojugu to yen.

²¹A kɛra ten, i y'i ka mɔgɔw ka kiti gwɛlɛya kosɔbɛ, e min tun ye layidu ta u bɛmaw ye k'i daa di ka gwɛlɛya ko i bena koɲuman kɛ u ye.

²²I y'an juguw ɲaa gwan ni makari ye waasa ka ladili di anw ma, janko, an ka miiri e ka ɲumanya la tɔw kiti waati la an fɛ, ka se k'an jigi la e ka makari kan i ka kiti waati la n'an ye.

²³O le y'a to, minw tora u ka nalomanyakow la ka tilenbaliya kɛ, e y'u ka fɛnjuguw le kɛ k'u hakili ɲagami.

²⁴Sɔbɛ la, u tun filila k'a dama tɛmɛ, fɔɔ ka taga sogo kuntanw bato, sogo minw ma ɲi fewu. U y'u yɛrɛ to u y'o nigɛ i ko denmisɛnw, minw te jatiminɛ kɛ.

²⁵O la, e y'u ɲaa gwan ka yɛlɛ u ma, i ko denmisɛnw minw te se ka miiri.

²⁶Ni mɔgɔ min ma hakili sɔrɔ jalaki nɔgɔman na min ka kan, Ala bena o la a tigi kan.

²⁷ U dimininba fɛɛn nunu ka tɔɔrɔ kosɔn, u tun be minw bato, u y'a ye k'olu b'u ɲaa gwanna. U y'a ye k'a faamu k'u tun banna min na fɔlɔ la, ko ale ye Ala le ye sɔbɛ la. O kama, kitiba benna u kan.