Read dyu Lɔnniya kitabu 14 Bible Online

Lɔnniya kitabu 14 - dyu bible

Lɔnniya kitabu 14

¹Mɔgɔ dɔ wɛrɛ ka koo filɛ fana. A be wili k'a yɛrɛ labɛn baji fariman kan taama na. A b'a darakan fɔ yiri lɛsɛnin ye, min barika ka dɔgɔ ni kurun ye, a b'a ka taama kɛ min kɔnɔ.

²Bari, kurun dilankun ye ka se ka nafolo sɔrɔ. Hakilitigi le y'a baara.

³Nga ele, an Faa ka kanuya barika la, kurun be taga ɲa. I ye sira bɔ kɔgɔji kan, i ye hɛrɛ sira bɔ bajiw kan.

⁴I b'a yira ten ko i be se ka mɔgɔ kisi ka bɔ kojugu sifa bɛɛ la, hali n'a be jii kan taama daminɛ n'a te foyi lɔn a la.

⁵E ye fɛɛn minw dan i ka lɔnniya barika la, e t'a fɛ o ka kɛ nafatanw ye. O kama, adamadenw be sɔn ka taga u yɛrɛ kalifa yiri kunkurunin ma. U be jikuruw cɛtigɛ kurundennin kɔnɔ, ka se u taayɔrɔ la hɛrɛ la.

⁶Koow daminɛ na, mɔgɔjanjan yɛrɛboɲalaw satuma na, diɲɛ ɲasigi tagar'a yɛrɛ sutara kurundennin le kɔnɔ. Ele yɛrɛ le y'a mara o ka kɛ diɲɛ sii ye waati nata mɔgɔw fɛ. [1]

⁷Tilenninya ma tunu lɔgɔ min barika la, duba b'o kan.

⁸Nga adamaden bolo be min kɛ joo ye, ale n'a dilanbaga bɛɛ danganin lo. A dilanbaga danganin lo sabu ale lo y'a baara. Lɔgɔ min ye tolifɛn ye, ale yɛrɛ danganin lo fana, bari u y'a wele ko batofɛn.

⁹Tiɲɛ na, Alaɲasiranbali n'a ka juguya koo ka go Ala ye.

¹⁰Baara nɔɔ, ani baara kɛbaga bɛɛ bena ɲagwan sɔrɔ.

¹¹O kama, Ala ka kiti bena se siyaw ka joow ma fana. Bari, hali n'u y'a ka danfɛn dɔ ye, u nana kɛ fɛnjuguw ye. Balawufɛn lo adamadenw fɛ, jaan lo nalomanw seen kɔrɔ.

¹²Joo dilanko le nana ni kakalaya ye. O miiriya sɔrɔko ye ɲagamini don mɔgɔ balocogo la.

¹³Joow tun te yen koow daminɛ na, u tena to yen fana kudayi!

¹⁴Adamadenw ka yɛrɛboɲa le nana n'u ye diɲɛ kɔnɔ. O la fana, a latigɛra ko u ka koo bena bari ka ban.

¹⁵Denfa dɔ deen kɛnɛkɛnɛ ka saya sababu la, a dusu kasinin y'a fɔ ko u k'ale ka deen jaa dilan, min barila ka sa. U ye boɲa l'a kan i ko batofɛn, k'a sɔrɔ suu lo. A y'a kɛcogo gundo n'a landaw yir'a ka mɔgɔw la.

¹⁶A koo nana barika sɔrɔ tuma dɔ, o landajugu nin nana kɛ sariya ye ni mɔgɔw b'a bato. O la, masa dɔw ye mɔgɔw wajibiya ka jaaw bato.

¹⁷Minw yɔrɔ jaɲa b'u bato bali, u be olu jaa dilan k'u to yɔrɔjan. U be boɲa la u ka masa min kan, u b'ale jaa dilan min be ye ɲaa na. O la, u be se ka boɲa la u ka masa ye ni timinadiya ye ko a b'u ɲakɔrɔ, k'a sɔrɔ a te yen.

¹⁸Hali mɔgɔ minw t'a lɔn yɛrɛ, olu y'u niin don kosɔbɛ o batoli nin na, a dilanbaga ka timinadiya kosɔn.

¹⁹K'a sɔrɔ a dilanbaga tun b'a fɛ ka kuntigiba dusu diya. A ye cekuya don a ka baara la, a b'a jaa dilan k'a cɛɲa fɔɔ ka tɛmɛ a yɛrɛ kan.

²⁰O la, baara nin ka cɛɲa b'a nigɛ don mɔgɔ la, fɔɔ u tun be mɔgɔ min boɲa adamadenya la, ale nana kɛ batofɛn ye u fɛ.

²¹O nana kɛ jaan ye adamadenw fɛ. O la, ni bɔnɛ sera mɔgɔ dɔ ma, walima fanga, u b'a fɔ ko kabakuru nin nɔɔ lo, walima lɔgɔ nin lo. U b'o tɔgɔ nin di ale ma k'a sɔrɔ, o ye Ala kelenpe dama le ta ye.

²²Ka fili Ala lɔnniya la, u ma dan o ma dɛ. U tora kɛlɛjugu la lɔnbaliya kosɔn ka kojugu nin wele ko hɛrɛ,

²³ka to ka denmisɛnw kɛ ka joow sɔn, ka kodogoninw kɛ, ka landajuguw kɛ u ka ɲanagwɛjuguw la.

²⁴U te adamadenya jati tugu, u te tilenninya kɛ furu kɔnɔ. Dɔ be janfa kɛ k'a tɔɲɔgɔn sii tunu, dɔ be ɲamɔgɔya kɛ n'a muso ye k'a dusu cɛn.

²⁵Fɛɛn bɛɛ ɲagamina: jolibɔn, ɲɔgɔnfaga, soɲali, namaran, tilenbaliya, janfa, ɲagamini, ani ka kali gwansan,

²⁶mɔgɔɲumanw tɔɔrɔko, ɲumanlɔnbaliya, nɔgɔtɔya, cɛɛw te musoko kɛ ni musow dama ye, furu ɲagamikow, ɲamɔgɔya ni mɔgɔkolonya.

²⁷Bari, joow tɔgɔ welebaliw sɔnko le ye kojugu bɛɛ bɔyɔrɔ n'a laban yɔrɔ ye.

²⁸Kelen ye, u sɔnbagaw be to nisɔndiya dama tɛmɛnin na, walima ka kirayakuma fɔ k'a sɔrɔ galon lo. U be juguya kɛ, walima u te siga k'u ka kali cɛn.

²⁹U y'u yɛrɛ kalifa joow ma minkɛ minw te nii na, u ma l'a la ko ɲagwan bena u sɔrɔ u ka kali fu nunu kosɔn do!

³⁰Nga, ɲagwan bena se u ma koo fila kama: a fɔlɔ, u nɔrɔla joow la, u ɲagamina Ala koo la. A filanan, u kalila ka galon tigɛ ka Ala ka koow dɔgɔya.

³¹U be kali ni joo min tɔgɔ ye, a ma kɛ i ko ale ka sebagaya le bena u ɲaa gwan dɛ. Nga ɲagwan min ka kan ni kojugukɛlaw ye, o le bena la u kan.