Read dyu Lɔnniya kitabu 17 Bible Online

Lɔnniya kitabu 17 - dyu bible

Lɔnniya kitabu 17

¹Matigi, e ka kiti ka bon haali, u faamu ka gwɛlɛ. O kama, minw ma sɔn ka koo faamu i fɛ, olu filila.

²Alaɲasiranbali nunu tun b'a miiri k'u bena ele Ala ka mɔgɔw mara. O la, u tora yen dibi la, bɔyɔrɔ te yen. Suja y'u siri, u datugunin tora soo kɔnɔ, u ma i ka ɲumanya banbali ye.

³U tun b'a miiri k'u bena to dogo la n'u ka hakɛ dogoninw ye, e Ala be ɲinɛ u kɔ i ko fani ye fɛɛn min datugu. Nga u jɛnsɛnna, siranyaba y'u minɛ, sigojugujuguw y'u hakili ɲagami.

⁴U tun be logologo min na, o ma se k'u bali siranya ma. U gɛrɛfɛla mankan tun be mɔgɔ jaa tigɛ. Suja juguman dɔw tun b'u yɛrɛ yira u la, u ɲaa kumunin.

⁵Tasuma si tun te se ka yeelen bɔ yen. Lolo manamananinw yeelen tun te se ka kɛnɛ bɔ o sujugu nin na.

⁶Nga, u tun be to ka tasuma dɔ ye, a tun be mana a yɛrɛ ma ka siranya bila. O yelifɛn mana tunu u ɲakɔrɔ, hakiliwili fɛ, u mana fɛɛn o fɛɛn ye o tuma na, dɔ be fara u ka siranya kan yɛrɛ. U ɲaa tun be fɛɛn min na, u ka miiri la, o ka jugu n'u ka yelifɛn nin ye.

⁷Sirinankɛbagaw ka sirinanw te minɛna. U tun y'u yɛrɛ boɲa u ka lɔnniya min kosɔn, o yɛlɛmana ka kɛ maloyako ye u fɛ.

⁸Ni min man'a fɔ ko a be siranya bɔ banabagatɔ la, siranya kuntan be bana bila o tigi la.

⁹Hali ni fɛɛn te yen k'u bagabaga, fɛɛn minw be fofo, ani minw be taama u kɔnɔbara kan, sogow tɛmɛkan ni saaw kasikan dɔrɔn tun b'u jaa tigɛ.

¹⁰U tun be sa siranya bolo, u tun te sɔn ka dibi nin filɛ, bɔyɔrɔ te min na.

¹¹Juguya be mɔgɔ ka lagalagatɔya yira. A ka kɛwali yɛrɛ le b'a jalaki. Ni dɔ kɔnɔ b'a sɔsɔ, o be dɔ fara a ka gwɛlɛya kan tuma bɛɛ.

¹²Miiribaliya le be na ni siranya ye.

¹³N'i tora miiribaliya la, e be sɛgɛn bari i te tɔɔrɔ nunu sababu lɔn.

¹⁴O suu gwɛlɛman nin kɔnɔ, olu ŋunanna fɔɔ ka dugu gwɛ. K'a sɔrɔ a bɔra lahara yɔrɔjanw na, ni see t'a ye.

¹⁵Ka fara o kan, suja jugumanw b'u gwɛnna, u fari fagara jatigɛkojugu fɛ. Siranyaba barila k'u minɛ u ma miiri min la.

¹⁶Hali mɔgɔ min tun sera o yɔrɔ la, o tigi be ben duguma. A be to o kaso la, datugulan te kasobon min na.

¹⁷E kɛra sɛnɛkɛla ye, walima begɛnmarala wo, e kɛra kongokolon kɔnɔ baaragwɛlɛnkɛla ye wo, fɛɛn kelen sera bɛɛ ma, u ma se ka bɔsi u ka latigɛ bolo.

¹⁸Sabu, dibi kelen le tun y'u bɛɛ lamini k'u siri. Fɔɲɔ fiyɛkan, kɔnɔw kasikanw yirituw kɔnɔ, jii wuruwurukan ni barika ye,

¹⁹kabakuruw porokotokan ni fanga ye, sogo yebali dɔw panpankan, sogojugu yɛrɛ yɛrɛw kasikan, ni kuluwow b'o mankanw kɔsegi, o bɛɛ tun be siranya bila u la k'u jaa tigɛ.

²⁰O y'a sɔrɔ diɲɛ tɔɔ bɛɛ tun gwɛnin lo ni yeelenba dɔ ye. Bɛɛ tun b'a ka baara la, baasi tun te yen.

²¹Dibiba tun be olu le dama fɛ. U ka kan ka don dibi min kɔnɔ u salon, o taamasiɲɛ lo. Nga, olu ka kamanagwan tun juguyara yɛrɛ ka tɛmɛ dibi nin kan.