Read dyu Lɔnniya kitabu 2 Bible Online

Lɔnniya kitabu 2 - dyu bible

Lɔnniya kitabu 2

¹Alaɲasiranbaliw te miiri ka ɲa. U b'a fɔ u yɛrɛ kɔnɔ ko: «An sii man jan, a dusukasi ka ca. A laban mana se, fura t'a la. An te mɔgɔ si lɔn min segira ka bɔ lahara.

²An wolola ten, an mana sa, a be kɛ i ko an tun ma wolo ka ye. An ninakili ye sisi dɔrɔn le ye, an ka miiriya be i ko mɔgɔ dusukun panpancogo.

³N'o banna dɔrɔn, an farisogo be kɛ buguri ye, an nii be bɔ i ko fɔɲɔ gwansan.

⁴Yanni waati dɔ, an tɔgɔ be tunu, mɔgɔ si hakili tena to an ka kɛwaliw la. An ka koo bena kɛ i ko sankaba ta min tɛmɛna a nɔɔ ma to. A bena tunu i ko bugun, tile fariyatuma na.

⁵An sii be i ko suma tɛmɛtɔ. An ka saya ye wajibi le ye. A latigɛnin lo, tagakasegi t'a la.

⁶Ayiwa, an ka bii fɛnɲumanw diya bɔ! An ka nafa bɔ diɲɛ na kosɔbɛ ni diyana ye i ko an kanbelenwaati!

⁷An ka duvɛnɲuman min ka tulu kasadiman mɔ! An kan'a to an kanbelenwaati ka tɛmɛ gwansan ten.

⁸Sanni feerenw ka ja, an k'o tigɛ, an ka diɲɛ diya bɔ sanni a ka ban.

⁹An si kana fɔn an ka ɲanagwɛba nin na, an k'an ka nisɔndiyaba taamasiɲɛw to yɔrɔ bɛɛ! Bari, o le ye anw niyɔrɔ ye!

¹⁰An ka fantanw tɔɔrɔ, hali n'u tilennin lo. An kana makari firiyamusow la, an kana mɔgɔkɔrɔbaw boɲa, kunsigigwɛtigi nunu!

¹¹An fɛ, fangatigi ta le ye tiɲɛ ye. Barikatanya kɔni te foyi ɲa mɔgɔ ye!

¹²An ka jaan la mɔgɔtilenninw ɲa. U b'an sɛgɛn, u te sɔn an ka kɛwaliw la. U b'an jalaki ko an be Musa ka sariya cɛn, u ko an te an faaw ka ladiliw bato.

¹³U ko u be Ala lɔn, u b'u yɛrɛ wele Matigi deenw.

¹⁴U ka koo n'an ka miiriya bɛnnin tɛ fewu, u yeko ka gwɛlɛ an ma.

¹⁵U cogo te i ko tɔw ta, u taamacogo be danna.

¹⁶U b'an jati fɛnjuguw ye, u b'an yɔrɔ jaɲa u yɛrɛ la i ko ɲamaɲama. U b'a fɔ ko mɔgɔtilennin ta laban ye hɛrɛ ye, u b'u yɛrɛ boɲa ko Ala ye u Faa ye.

¹⁷An ben'a ye n'u ka kuma ye tiɲɛ ye! An ben'a ye u laban bena kɛ min ye.

¹⁸Ni mɔgɔtilenninw ye Ala deenw ye sɔbɛ la, Ala bena u bɔsi u juguw bolo.

¹⁹O kosɔn, an k'u kɔrɔbɔ, an k'u tɔɔrɔ kosɔbɛ. O la, an ben'a lɔn u ka hakilisigi be cogo min, an bena u ka muɲu danyɔrɔ lɔn.

²⁰An k'u jalaki k'u bila maloya saya la, sabu u b'a fɔ ko Ala bena u dɛmɛ.»

²¹Mɔgɔjuguw be miiri ten, nga u filila. U ka juguya b'u kɛ fiɲɛntɔw ye.

²²U te Ala ka koo dogoninw lɔn. K'a fɔ ko Alaɲasiranbaga bena o sara sɔrɔ, u ma la o la. Boɲa min bena la jalakibaliw kan, u ma la o la fana.

²³Ala ye mɔgɔ dan tuma min na, a tun m'a latigɛ ko a be sa, a y'a dan a yɛrɛ jaa la.

²⁴Saya donna diɲɛ na Sutana ka keliya sababu la, a be se Sutana kɔmɔgɔw le ma.