Read dyu Lɔnniya kitabu 3 Bible Online

Lɔnniya kitabu 3 - dyu bible

Lɔnniya kitabu 3

¹Mɔgɔtilenninw nii be Ala bolo, tɔɔrɔ si tena u sɔrɔ tugu.

²Hakilitanw ka miiri la, u sara sɔbɛ la, u taako kɛra bɔnɛ ye,

³u yɔrɔ jaɲako kɛra balawu ye. K'a sɔrɔ u be hɛrɛ la.

⁴Mɔgɔw be miiri k'u tɔɔrɔra u ka kɛtaw le kosɔn, u jigi tun be sini sɔrɔ kan.

⁵U ka tɔɔrɔ dɔɔni tɛmɛnin kɔ u ka kɛta kosɔn, u bena hɛrɛ sɔrɔ kosɔbɛ. Ala y'u kɔrɔbɔ, k'a ye ko a ka ɲi u ka to n'ale ye.

⁶A y'u nɔgɔ bɔ i ko sanu, faan kɔnɔ, a sɔnna u ma i ko saraka dafanin.

⁷Ala ye waati min latigɛ kiti kama, o waati la, u bena manamana. U bena kɛ i ko tasuma min be biin janin jɛni.

⁸U bena jamanaw mara, u bena kɛ siyaw kuntigiw ye, Matigi bena kɛ u ka Masa ye kudayi.

⁹Mɔgɔ minw jigi be Ala kan, olu ben'a lɔn ko a ka sira ye tiɲɛ ye. Minw mana to kantigiya la, olu bena to n'a ye kanuya la. Bari a be ɲumanya kɛ a ka mɔgɔwolomaninw ye, a be makari u la.

¹⁰Nga Alaɲasiranbaliw ka kan ni ɲagwan min ye u ka miirijuguw kosɔn, u ben'o sɔrɔ. Bari u ma mɔgɔtilenninw jati, u y'u kɔɔ di Matigi ma.

¹¹Mɔgɔ min mako te lɔnniya ni ladili la, o tigi ye sigɛnbagatɔ ye. A jigi be fu kan. A ka baara ye gwansan le ye, a te se ka foyi ɲa.

¹²A muso ye hakilitan ye, a deenw ye denjuguw le ye, a kɔmɔgɔw bena kɛ dangadenw ye.

¹³Muso wolobali fiɲɛtan min ma sɔn ka kakalaya kɛ, ale lo bena dagamu! Ala ben'a sara diɲɛ kitilon na.

¹⁴Cɛɛ kɔbɔnin min ma kojugu kɛ, n'a ma miirijugu mara a kɔnɔ Matigi kosɔn, ale fana bena dagamu! A bena saraɲuman sɔrɔ a ka tilenninya kosɔn, a bena yɔrɔɲuman sɔrɔ Matigi ka soo kɔnɔ.

¹⁵Mɔgɔtilennin ka baara tɔnɔ ka ɲi kosɔbɛ. Lɔnniya be i ko yiri, lili ɲanaman be min na.

¹⁶Nga ɲamɔgɔdenw ka koo tena yiriwa, deen minw sɔrɔla ɲamɔgɔya la, olu bena tunu.

¹⁷Hali n'u ye sijan sɔrɔ, u tena jati, u ka kɔrɔya waati la, u bena dɔgɔya le sɔrɔ.

¹⁸N'u sara joona fana, jigi te u fɛ, u dusu tena saalon kitilon na.

¹⁹Kojugukɛla laban ma ɲi dɛ!