Read dyu Lɔnniya kitabu 4 Bible Online

Lɔnniya kitabu 4 - dyu bible

Lɔnniya kitabu 4

¹Mɔgɔ ka to dentanya la ka kɛ mɔgɔtilennin ye, o ka fisa. Mɔgɔw hakili be to o tigi tɔgɔɲuman na, bari Ala ni mɔgɔw sɔnnin be o la.

²K'a to sii la, mɔgɔw b'a ladege, n'a tununa, nimisa b'u minɛ. Sini, sesɔrɔfugulan y'a ta ye bari a ye see sɔrɔ a ka bondori la a ye min kɛ ka fɛɛn ɲanaman sɔrɔ.

³Alaɲasiranbaliw deenw n'u caya bɛɛ, olu tena foyi ɲa. U be i ko yiri min liliw ma ɲi, u liliw tena don ka ɲa, u juu tena barika sɔrɔ.

⁴Hali n'u ye furaburu bɔ waati dɔ kɔnɔ, fɔɲɔ bena u yuguyugu ka bɔ bari u lili ma don ka ɲa. Fɔɲɔba mana fiyɛ, u suun be bɔn.

⁵U bolow be kari n'o ma kɔgɔ, u deenw te mɔ, fɛnkuntan lo, u te se ka dumu, u te foyi ɲa.

⁶Kitilon na, deen minw sɔrɔla kakalaya la, olu bena kɛ seereyafɛn ye u wolobagaw ka juguya kosɔn.

⁷Mɔgɔtilennin kɔni bena lafiɲɛ sɔrɔ, hali n'a sara a denmisɛnya waati la.

⁸Kɔrɔbaya be na ni boɲa ye, sijan sɔrɔ dama t'a di mɔgɔ ma.

⁹Lɔnniya ye kunsigigwɛ ye. Jogoɲuman ye kɔrɔbaya ye.

¹⁰Fɔlɔfɔlɔ, mɔgɔ dɔ tun be yen, a koo diyara Ala ye, a y'a kanu. A tun siginin be kojugukɛlaw cɛma, Ala y'a ta ka bɔ yen ka taga n'a ye yɔrɔ wɛrɛ.

¹¹A y'a ta janko kojugu kana se k'a kunnacɛn. A y'a ta waasa namaranko kana don a kɔnɔ.

¹²Bari, kojugu be kɛ sababu ye koɲuman te ye. Nigɛjugu be mɔgɔɲuman ka koo nagasi.

¹³O tigi ka koo dafara waati dɔɔni dama i ko a tun ye sijan sɔrɔ.

¹⁴A taamacogo diyara Matigi ye, o la, a y'a bɔsi ka bɔ diɲɛjugu nin na joona. Mɔgɔw y'o ye, u ma o faamu. U ma miiri a la,

¹⁵ko Ala be ɲumanya kɛ a ka mɔgɔwolomaninw ye, ko a be makari u la, ko a b'a ka mɔgɔw tanga.

¹⁶Mɔgɔtilennin ka saya be jalaki ben Alaɲasiranbali ka sijan kan. Denɲuman mana ban joona, o be mɔgɔkɔrɔbajugu maloya.

¹⁷Mɔgɔjuguw be lɔnnikɛla ka saya filɛ, nga Matigi ye min latigɛ a ye, u t'o faamu. Matigi y'a bila yɔrɔ sutaranin na kuun min na, u t'o faamu.

¹⁸U mana o koo ye, o be kɛ lɔgɔbɔri ye u fɛ, nga Matigi bena yɛlɛ u ma.

¹⁹U mana sa, mɔgɔw tena u suuw jati. Maloya bena kɛ u ta ye lahara kudayi. Ala bena u fili duguma, u kuun le bena kɔn fɔlɔ, fɔta tena sɔrɔ u fɛ. A bena u yuguyugu haali fɔɔ k'u bɔ u nɔɔ na. U bena halaki kosɔbɛ ka to yen fɔɔ laban na. U bena to tɔɔrɔ la, u tɔgɔ bena tunu.

²⁰Alaɲasiranbaliw ka hakɛ jatituma mana se, u hakili ɲagamininba le be gwɛrɛ. U ka kɛwaliw yɛrɛ ben'a yira k'u ka kan ni jalakili ye.