Read dyu Lɔnniya kitabu 5 Bible Online

Lɔnniya kitabu 5 - dyu bible

Lɔnniya kitabu 5

¹O tuma na, mɔgɔtilennin bena lɔ, a hakilisigininba k'a ɲaa sin a tɔɔrɔbagaw ma, minw tun b'a lɔgɔbɔ a cɛsiriwaati la.

²U ɲaa mana la a kan, u bena yɛrɛyɛrɛ siranyakojugu fɛ. U bena kabakoya ka dama tɛmɛ a kisiko la.

³U kamana gwannin bena to ka ŋunan. U bena nimisa ka to k'a fɔ ɲɔgɔn ye ko:

⁴«Haan! An tun be yɛlɛko min na, ale lo! An tun be min dɔgɔya, ale lo! An tun ye nalomanya kɛ k'a jati fatɔ ye. An y'a ka saya jati maloyako ye.

⁵A kɛra di a be jati Ala deenw dɔ ye? A kɛra di a niin be Ala ka mɔgɔw cɛma?

⁶O la, an y'an yɛrɛ bɔ tiɲɛsira la, tilenninya ma se ka yeelen bɔ an ye, tile ma bɔ anw ye fɔlɔ!

⁷An ye tilenbaliya sira ta, bɔnɛsira, fɔɔ k'an wasa. An ye kongokolon cɛtigɛ, sira tun te yen. O bɛɛ n'a ta, an ma Matigi ka sira lɔn fewu!

⁸An ka yɛrɛboɲa ye mun ɲa an ye sa? An ye nafolo min kɛ k'an yɛrɛ wanso, o ye mun ɲa an ye sa?

⁹O bɛɛ tununa i ko suma, i ko kibaru min wangolabaga be bolila.

¹⁰A kɛra i ko kurun be jii ɲɔti ka tɛmɛ cogo min na, a nɔɔ te to. A kɔfɛla t'a nɔɔ to.

¹¹A kɛra i ko kɔnɔ tɛmɛtɔ sanfɛ. A tɛmɛnɔ te ye a taanin kɔ. A be fɔɲɔ gosi n'a gaman ye, k'a cɛtigɛ ni fanga ye, a nɔɔ te ye a tɛmɛnin kɔ.

¹²A kɛra i ko biɲɛ min bonna, a be fɔɲɔ cɛtigɛ! O be tila ka tugu ɲɔgɔn na fɔɔ biɲɛ tɛmɛnɔ te se ka ye fewu.

¹³A kɛra ten, anw wolotɔ, an tunutɔ. An ma se ka kɛwaliɲuman si nɔɔ to an kɔfɛ. An ka juguya y'an ta cɛn.»

¹⁴Tiɲɛ na, Alaɲasiranbali jigi be i ko sumanɲaga, fɔɲɔ ye min ta. A be i ko jii kankan, fɔɲɔba be taga ni min ye. A be tunu i ko sisi, fɔɲɔ kɔnɔ. A koo be bɔ mɔgɔw hakili la i ko tile kelen lonan tɛmɛko.

¹⁵Mɔgɔtilenninw kɔni be to yen kudayi. U ka sara be Matigi bolo, Fɛɛn bɛɛ kuntigi bena janto u la.

¹⁶A bena masafugulan halala d'u ma. A ben'a ɲanaman d'u ma. Bari, a bolo barikaman b'u tanga, a b'a bolo kɛ k'u sutara.

¹⁷A ka jijali le bena kɛ a ka kɛlɛkɛminan ye. A bena o di a ka danfɛnw ma, waasa k'a juguw kɛlɛ.

¹⁸A ka nigɛduloki, o ye tilenninya ye. A ka nigɛfugulan, o y'a ka kiti tilennin ye.

¹⁹A ka sesɔrɔ nigɛkunbɛnnan, o y'a ka ɲumanya ye.

²⁰A ka murujan dadiman, o y'a ka dimikojugu nin ye. Diɲɛkɔnɔfɛnw bena far'a kan ka nalomanw kɛlɛ.

²¹Kala labɛnninkoɲuman be biɲɛ bon ka ɲa cogo min na, sanmanamana bena bɔ sankaba la ten ka tilen a taayɔrɔ la.

²²Sanbɛrɛ bena jigi u kan ni barika ye i ko bɛrɛbonnan ka bɛrɛ. Kɔgɔji bena wiliwili u kama ni fanga ye, baji bena u tunu, a tena hinɛ yɛrɛ.

²³Fɔɲɔba dɔ bena wili u kama. A bena u yɛrɛkɛ i ko sanfɔɲɔ. Juguya le bena dugukolo bɛɛ kɛ lakolon ye. Kojugukɛ bena masaw bɔ u ka fanga la.