Read dyu Lɔnniya kitabu 6 Bible Online

Lɔnniya kitabu 6 - dyu bible

Lɔnniya kitabu 6

¹Masacɛw, aw ka mɛnni kɛ, ka faamuyali sɔrɔ. Aw minw ka kuntigiya be se yɔrɔ bɛɛ dugukolo kan, aw ka hakili sɔrɔ.

²Aw, jama kuntigiw, aw k'aw tulo malɔ. Aw minw wasanin be aw ka mɔgɔw ka caya kosɔn, aw k'aw tulo malɔ.

³Aw y'aw ka fanga sɔrɔ Matigi le fɛ. Aw y'aw ka kuntigiya sɔrɔ Fɛɛn bɛɛ kuntigi le fɛ. Ale lo bena aw ka kɛwaliw sɛnsɛn, ale lo bena aw ka kolatigɛninw jati minɛ.

⁴Aw, Masaba ka baarakɛlaw ma kiti tigɛ ka tilen, aw ma sariya bato, aw ka kɛwaliw ma bɛn Ala sago ma.

⁵A bena bari ka lɔ aw ɲafɛ cogojugu la. Bari, kiti gwɛlɛman be faamaw ɲa.

⁶Makari be se ka kɛ mɔgɔ gwansan na ka yafa a ma. Nga faamaw ka koo jati bena minɛ kosɔbɛ.

⁷Fɛɛn bɛɛ kuntigi te siran mɔgɔ si ɲa. A te mɔgɔ ka boɲa jati. A ye faama ni mɔgɔ gwansan dan, u bɛɛ ka dɛmɛ ye kelen ye.

⁸Nga, fangatigi ka koo bena sɛgɛsɛgɛ kosɔbɛ.

⁹Ne kaan be aw ɲamɔgɔbabaw le ma janko aw ka lɔnniya sɔrɔ, waasa aw kana fili.

¹⁰Mɔgɔ minw mana Ala ka sariyaw bato ka ɲa, olu bena jati Ala ka mɔgɔw ye. Mɔgɔ minw ye hakili sɔrɔ u la, olu bena fɔta sɔrɔ kitilon na.

¹¹O la do, ne ka kuma ka diya aw ye, a nigɛ k'aw minɛ, aw bena kɛ lɔnnikɛlaw ye.

¹²Lɔnniya be manamana, a ɲaa te faga ka ye. A koo ka di minw ye, olu b'a ye hali u te sigɛn, a ɲinibagaw b'a sɔrɔ.

¹³A nigɛ be minw na, ale lo be kɔn k'a yɛrɛ yira u la.

¹⁴Mɔgɔ min mana soli ka wili k'a ɲini, o tigi te sigɛn, a bena ta'a siginin sɔrɔ a ka soda la.

¹⁵Mɔgɔ min man'a sɔbɛ don a ka koo la, o tigi be kɛ hakilitigi ye kosɔbɛ. Mɔgɔ min mana banba a kosɔn, o tigi ka haminako bena ban joona.

¹⁶Bari, mɔgɔ minw ka kan ni lɔnniya ye, ale yɛrɛ be taga olu faan fɛ. A b'u kunbɛn ka ɲa u ka sira kan, a be n'u ye u ka miiriyaw bɛɛ la.

¹⁷Mɔgɔ ka sɔn lɔnniya ɲini la sɔbɛ la, o ye lɔnniya yɛrɛ daminɛyɔrɔ ye.

¹⁸Ka lɔnniya ɲini ni sɔbɛ ye, o ye lɔnniya yɛrɛ kanuko ye. A kanuko ye a ka sariyaw bato ye. A ka sariyaw bato ye sini sɔrɔko dalilu ye.

¹⁹Sini sɔrɔko b'i yɔrɔ surunya Ala la.

²⁰O la, lɔnniya kodiyako be se ni mɔgɔ ye masaya ma.

²¹Ayiwa, ni masaya koo ka di aw siyaw ɲamɔgɔbaw ye, aw ka lɔnniya boɲa, o la, aw bena to masaya la kudayi!

²²Ayiwa, lɔnniya ye mun ye? A daminɛ kɛra cogo di? Ne ben'a koo wango la aw ye. Ne ten'a gundo si dogo aw la. Ne ben'a ta a daminɛ na, ne ben'a cogoya fɔ kɛnɛ kan, ne tena tɛmɛ tiɲɛ gɛrɛfɛ fewu!

²³Keliya tena kɛ ne taamaɲɔgɔn ye, o be mɔgɔ halaki. O ni lɔnniya te bɛn.

²⁴Lɔnnikɛlaw cayako be diɲɛ kisi. Masa hakilitigi ka jama be sigi lafiya la.

²⁵O la do, aw ka sɔn ne ka kuma ma, aw bena tɔnɔ sɔrɔ a la.