Read dyu Lɔnniya kitabu 7 Bible Online

Lɔnniya kitabu 7 - dyu bible

Lɔnniya kitabu 7

¹Ne fana ye mɔgɔ le ye, ne fana bena sa, i ko tɔw bɛɛ. Mɔgɔ fɔlɔ min bɔra bɔgɔ la, ne fana bɔra ale lo la. Ne labɛnna n baa kɔnɔ ka farisogo sɔrɔ.

²Ne ye kalo kɔnɔntɔn kɛ a joli la, ne sɔrɔla cɛɛ ka jii barika la, nisɔndiya sababu la sinɔgɔ waati la.

³Ne wolotɔ, ne fana ye fɔɲɔ nin ninakili sɔrɔ i ko bɛɛ. Ne sera dugukolo kan bɛɛ be tɔɔrɔ yɔrɔ min. N kanɲa fɔlɔ kɛra kasi ye i ko tɔw bɛɛ.

⁴Ne ye fani sɔrɔ, n lamɔbagaw y'u janto n na kosɔbɛ.

⁵A masa te yen, min ka daminɛ bi danna nin na.

⁶Ka na diɲɛ na, cogo kelen lo bɛɛ fɛ, ka bɔ yen fana, o ye kelen ye.

⁷O la, ne ye Ala dali, a ye hakilitigiya di ne ma. Ne y'a dali kosɔbɛ, a ye lɔnniya hakili di ne ma.

⁸A koo diyara ne ye ka tɛmɛ masaya kan. Ale ni nafolo cɛ, ne ma nafolo jati fɛɛn ye.

⁹Ne m'a suma ni kabakuru sɔngɔgwɛlɛn ye. Diɲɛ sanu bɛɛ lajɛnnin ye cɛncɛn dɔɔni ye ale ɲakɔrɔ. Warigwɛ ye bɔgɔ le ye a ɲakɔrɔ.

¹⁰A koo diyara ne ye ka tɛmɛ kɛnɛya ni cɛɲɛ kan. A koo diyara ne ye ka tɛmɛ yeelen kan, bari ale ka nɔɔrɔ te ban ka ye.

¹¹Ale barika la, ne ye fɛnɲuman bɛɛ sɔrɔ. Ale sababu la, ne ye nafolo caaman sɔrɔ.

¹²Ne y'o fɛɛn nunu bɛɛ diya bɔ, bari lɔnniya kama ne y'u sɔrɔ. Ne tun m'a lɔn ka kɔrɔ ko ale lo ye o fɛɛn nunu bɛɛ bɔyɔrɔ ye.

¹³Ne sera ka min lɔn ni kɔnɔgwɛ ye, ne b'o yira ni nisɔndiya ye. Ne t'a nafayɔrɔ si dogo.

¹⁴Bari, adamadenw ka nafolo banbali lo. Minw man'a sɔrɔ, olu be kɛ Ala teriw ye. Ni mɔgɔ ye hakili sɔrɔ a fɛ, o tigi koo be diy'a ye.

¹⁵Ala ka ne dɛmɛ ne ka kuma ni hakilitigiya ye. Min dira ne ma, ne ka miiriya ka bɛn o ma. Bari, ale lo ye lɔnniya ka ɲabila ye, ale lo be hakilitigiw bila siraɲuman kan.

¹⁶An b'a bolo, anw n'an ka fɔtaw n'an ka lɔntaw, n'an ka sekow bɛɛ.

¹⁷Ale lo ye lɔnniyasɔbɛ di ne ma diɲɛ koo la: a ye diɲɛ labɛncogo n'a kɔnɔnafɛnw baara yira ne la,

¹⁸ni diɲɛ daminɛ, n'a cɛmancɛ ani a laban, ni tile bɔyɔrɔ yɛlɛmacogo, ni waati yɛlɛmacogo,

¹⁹ni saanw cogoya, ani lolow sigiyɔrɔw,

²⁰ni sogow cogoya, ni kongosogow ka kɛcogow, ni jinaw cogoya, ni adamaden ka miiriya, ni yiriw sifaw, ani liliw ka baara.

²¹Koo dogonin ani yeta, ne y'o bɛɛ lɔn. Bari, fɛɛn bɛɛ danbaga ye ne kalan, ale min ye lɔnniya ye.

²²Lɔnniya kɔnɔ, hakiliɲuman be yen, a saniyanin. Hakili kelen lo, min be koo caaman kɛ. A be se koo yɛlɛmacogo la, a te to yɔrɔ kelen, a ɲɔgɔn te yen, fiɲɛ t'a la, a gwɛnin lo, kojugu te se ka foyi kɛ a la. Koɲuman ka d'a ye, a jijanin lo.

²³Foyi t'a bali, a be koɲuman kɛ mɔgɔ ye, adamaden teri lo. A be to kelen kan, a te bɔ a lɔyɔrɔ la, a te hami. A be se fɛɛn bɛɛ la, a be fɛɛn bɛɛ ye. A be don nimanfɛnw bɛɛ la, hakilitigiw, ni minw saniyanin lo, ani minw be se koo yɛlɛmacogo la.

²⁴Lɔnniya ka teli ka tɛmɛ fɛɛn lamagata bɛɛ kan. A ka saniya kosɔn, a be tɛmɛ faan bɛɛ, a be don fɛɛn bɛɛ la.

²⁵Setigi Ala dafɔɲɔ lo, a be bɔ Setigi ka nɔɔrɔ la, a dafanin. O la, nɔgɔ si te se ka don a la.

²⁶Lɔnniya ye yeelen fagabali ye. Dubalen fiɲɛtan lo, Ala ka baara jaa be ye min kɔnɔ. A ka ɲumanya taamasiɲɛ lo.

²⁷A kelen lo, k'a sɔrɔ a be se koo bɛɛ la. A cogo te yɛlɛma k'a sɔrɔ a be fɛɛn bɛɛ lakuraya. A be don Ala ka mɔgɔw la waati bɛɛ, k'u kɛ Ala teriw n'a ka kiraw ye.

²⁸Bari, mɔgɔ minw be nɔrɔ lɔnniya la, olu le koo ka di Ala ye.

²⁹Lɔnniya ka yeelen tɛmɛna tile ta kan, a tɛmɛna lolow bɛɛ ta kan. N'i y'a suma ni yeelen ye, a tɛmɛna o kan.

³⁰Suu be ko yeelen taanin kɔ. Nga kojugu te se ka foyi kɛ lɔnniya la.