Read dyu Lɔnniya kitabu 8 Bible Online

Lɔnniya kitabu 8 - dyu bible

Lɔnniya kitabu 8

¹A ka fanga be bɔ diɲɛ daan dɔ nin na ka ta'a bila kelen na. A be fɛɛn bɛɛ mara cogoɲuman na.

²Lɔnniya le koo diyara ne ye, ne y'a ɲini kabini n kanbelentuma. Ne jijar'a sɔrɔko la k'a kɛ i ko n ka muso. Ne jarabir'a ka cɛɲa la.

³A ni Ala le be ɲɔgɔn fɛ, o le y'a ka kunkɔrɔta ye. Fɛɛn bɛɛ kuntigi b'a kanu.

⁴A be Ala ka gundow kala ma. A b'a ka kokɛtaw latigɛ.

⁵Nafolo kɔni ka ɲi diɲɛ kɔnɔ, nga foyi man fisa ni lɔnniya ye. Ale lo ye fɛɛn bɛɛ sababu ye.

⁶N'an ko hakilitigiya be fɛɛn ɲa, lɔnniya ma tɛmɛ a kan wa? Min sababu la fɛɛn bɛɛ be yen.

⁷Tilenninya ka d'i ye wa? Sɔnɲuman le y'a ka baara ye. Bari, a be mɔgɔ dɛmɛ yɛrɛminɛ, ni hakilitigiya la, ani tilenninya ni jagwɛlɛya la, Foyi te yen min be mɔgɔ nafa ka tɛmɛ o kan.

⁸I b'a fɛ ka koo caaman ye ka nafa sɔrɔ u la wa? Lɔnniya be kunu lɔn, ka siniko yira. A be kuma kɔrɔ lɔn, ka kuma kɔnɔmanw kɔrɔ fɔ. A be kɔn ka taamasiɲɛw ni kabakow ye. A be waati nata koo lɔn.

⁹O la, ne y'a latigɛ ko lɔnniya bena kɛ ne taamaɲɔgɔn ye n sii bɛɛ la. Bari ne y'a lɔn ko a bena ladiliɲuman di ne ma, a bena ne dusu saalon dusukasilon ni tɔɔrɔlon na.

¹⁰Ne tun b'a fɔra n yɛrɛ kɔnɔ ko ale barika la, ne bena tɔgɔ sɔrɔ jamayɔrɔw la. Hali ne ni n ka denmisɛnya, mɔgɔkɔrɔbaw bena ne jati.

¹¹Kiti tigɛyɔrɔ la, u ben'a ye ko ne be koo lɔn. N ka koo bena jamanakuntigiw kabakoya.

¹²Ni ne jera, u bena to ka kɔnɔni kɛ, ni n ye kuma daminɛ, u b'u tulo malɔ kosɔbɛ. Ni ne ka kuma be jaɲana, u b'u bolo la u daa la ka kaba.

¹³Ne ka koo tena ban, ne kɔfɛmɔgɔw tena ɲinɛ ne kɔ abada ale sababu la.

¹⁴Ne bena siyaw kuntigiya kɛ. Jamana mɔgɔw bena kolo ne ye.

¹⁵Masa farimanw mana ne koo mɛn, u jaa be tigɛ le. N bena n ka ɲumanya yira jama na, n jaa bena gwɛlɛya kɛlɛyɔrɔ la.

¹⁶N mana don soo, n be lafiɲɛ ale lɔnniya le kɔrɔ. Bari, ale ka jɛnɲɔgɔnya te baasi se mɔgɔ ma. Tɔɔrɔ te a ka teriya la, diya ni diya dɔrɔn lo.

¹⁷Ne y'a jati minɛ n yɛrɛ ma, k'a lɔn n dusu la ko lɔnniya be mɔgɔ jigi tugu sini sɔrɔko la.

¹⁸A ka teriya be na ni nisɔndiya dafanin ye. A ka baara be na ni nafolo banbali ye. K'a yɔrɔ filɛ tuma bɛɛ, o be na ni hakilitigiya ye. K'a kɛ i barokɛɲɔgɔn ye, o be tɔgɔ di. Ne tora k'a ɲini yɔrɔ bɛɛ k'a kɛ n taamaɲɔgɔn ye.

¹⁹Ne wolocogo tun ɲana. Ne kɛra sɔnɲumantigi ye.

²⁰Walima, ne ka ɲumanya kosɔn, ne ye farisogoɲuman sɔrɔ.

²¹K'a sɔrɔ ne y'a lɔn ko ne tena lɔnniya sɔrɔ ni Ala ka dɛmɛ tɛ. Min ye fɛnɲuman dibaga ye, ne b'o lɔn, o fana ye hakilitigiya taamasiɲɛ ye. O la, ne ye n ɲaa sin Matigi ma k'a dali. Ne y'a fɔ ni n dusu bɛɛ ye ko: