Read dyu Lɔnniya kitabu 9 Bible Online

Lɔnniya kitabu 9 - dyu bible

Lɔnniya kitabu 9

¹«Ne faaw ka Ala, Matigi, makaritigi, ele ye diɲɛ dan i ka kuma barika la.

²I ye mɔgɔ dan i ka lɔnniya barika la, a ka kɛ i ka danfɛn tɔw kuntigi ye,

³a ka diɲɛ kuntigiya kɛ Alaɲasiran ni tilenninya la, ka kiti tigɛ tilenninya la ni kɔnɔgwɛ ye.

⁴Lɔnniya min b'i fɛ i ka masasigilan gɛrɛfɛ, o dɔ di ne ma. Kana ne niin bɔ i deenw na.

⁵Ne y'i ka jɔɔn le ye, i ka jɔnmuso dencɛ. Ne ye barikatan ye, ne sii kuntaga ka surun. Hakili te ne fɛ fewu ka tilenninya ni sariyaw koo lɔn.

⁶Adamadenw cɛma, hali ni dɔ ye mɔgɔdafanin ye, ele Ala be lɔnniya min di, ni o te a tigi fɛ, u ten'a jati fɛɛn ye.

⁷I ye ne woloma ka kɛ i ka jama ka masa ye. I ye ne kɛ i deenw ka koɲanabɔbaga ye.

⁸I ye sira di ne ma ko n k'i batoso lɔ e ka kulu kan. I ko ne ka sarakabɔyɔrɔ lɔ dugu nin kɔnɔ e siginin be min kɔnɔ. I ko ne k'a lɔ ka kɛɲɛ n'i ka fanibugu ye, i tun ye min labɛn kabini koow daminɛ.

⁹Lɔnniya b'i kɔrɔ, a b'i ka koow kala ma. A tun b'i kɔrɔ diɲɛ dantuma na. A b'i diyanako lɔn. A b'i ka sariyaw batocogo lɔn.

¹⁰A jigi ne kan ka bɔ i fɛ sankolo la. A ka bɔ i fɛ i ka masasigilan kabakoman kan ka jigi ne kan, a ka to ne gɛrɛfɛ ka kɛ ne dɛmɛbaga ye. I sago ye min ye, ne ka se k'o lɔn.

¹¹Ale min be fɛɛn bɛɛ faamu k'a lɔn, a bena ne dɛmɛ ka koo kɛ ni hakili ye. A ka yeelen bena ne tanga.

¹²O la, ne ka kɛwaliw bena diya i ye, Matigi. Ne bena i ka jama mara ni tilenninya ye. Ne ben'a ye ko n ka kan ni n faa ka masasigilan ye.

¹³«Mɔgɔ jumɛn le be se ka Ala ka loon latigɛnin lɔn? Matigi sago ye min ye, jɔn be se k'o lɔn?

¹⁴Adamadenw be sigasiga u ka miiriw la, an ka jatiw te a ɲanaman ye.

¹⁵Farisogo min bena toli, ale be nii degun. O bɔgɔforoko nin ye doni gwiliman ye nii kan nimisa kosɔn.

¹⁶Dinyɛkɔnɔkow faamu ka gwɛlɛ haali. An ye min sɔrɔ fana, o sɔrɔla gwɛlɛya kɔnɔ. Jɔn le be sankolokɔnɔkow lɔn?

¹⁷Jɔn le be i ka koo latigɛnin lɔn ni ele yɛrɛ m'a lɔnniya di, ni ele m'i ka hakilitigiya jigi ka bɔ sanfɛ?

¹⁸O kama lo, dugukolo kan mɔgɔw bilara siraɲuman kan. U sera k'i sagolako lɔn, o lɔnniya sababu la, u kisira.»