Read dyu Sira deen ka kitabu 10 Bible Online

Sira deen ka kitabu 10 - dyu bible

Sira deen ka kitabu 10

¹Dugu ɲamɔgɔw ka koo Dugu ɲamɔgɔ hakilitigi b'a ka jama ladi ka ɲa. N'a kɛra hakilitigi ye, a ka kuntigiya be ɲa.

²Dugu ɲamɔgɔ be cogo min na, a baarakɛɲɔgɔnw be ten fana. Dugu koo ɲanabɔbaga be cogo min na, dugumɔgɔw fana be ten.

³Masa kolɔnbali be kɛ a ka jama halaki sababu ye. Dugu be yiriwa dugu ɲamɔgɔ hakilitigiw sababu la.

⁴Diɲɛ kuntigiyako be Matigi le bolo. Masa min ka ɲi, a b'o sigi a diyanawaati la.

⁵Adamaden ka ɲataga be Matigi le bolo. Matigi le be kuntigiya di mɔgɔbaba ma. Yɛrɛboɲa ma ɲi

⁶Kana i hakɛ tabaga kɔniya abada. Kana koo si kɛ ni dimi ye.

⁷Yɛrɛboɲala koo ka go Matigi ni adamadenw ye. Tilenbaliya ye kojugu ye u fila bɛɛ fɛ.

⁸Masaya be bɔ jama dɔ fɛ ka se dɔ wɛrɛ ma tilenbaliya, ni fariya, ani malobaliya kosɔn.

⁹Adamaden min ye bɔgɔ ni bugurigwɛ ye, mun na a b'a yɛrɛ boɲa? K'a to nii na yɛrɛ, a fanin be fɛɛn tolinin na.

¹⁰Bana kuntagajan b'a ɲaa don furakɛla la. Mɔgɔ min ye masa ye bii, sini ale bena sa do.

¹¹Ni mɔgɔ sara, a tora fɛɛn fofotaw, ni begɛnw ani tumuw le ma.

¹²Adamaden ka yɛrɛboɲa be daminɛ ni ban ye Matigi ma, ka muruti a Danbaga ma.

¹³Yɛrɛboɲa daminɛ ye hakɛ ye. Mɔgɔ min be t'o la, o tigi be goman le la kosɔbɛ. O le y'a to, Matigi ye sigɛnba la u kan, k'u halaki.

¹⁴Matigi ye fangatigiw jigi ka bɔ u ka masasigilanw kan, ka mɔgɔɲumanw sigi u nɔɔ na.

¹⁵Matigi ye siya kungwɛlɛ ka koo ban, ka mɔgɔmajigininw bila u nɔɔ na.

¹⁶Matigi ye siyaw ka yɔrɔ ɲagami, a y'u yuguyugu fɔɔ ka se yɔrɔjan dugukolo jukɔrɔ.

¹⁷A y'u halaki k'u bɔ yen pewu diɲɛ kɔnɔ. A y'u tɔgɔ tunu ka bɔ dugukolo kan.

¹⁸Danbaga ma adamaden dan yɛrɛboɲa kama. Muso ye fɛɛn min wolo, o man kan ni dusu fariman ye. Jɔn le ka kan ni boɲa ye?

¹⁹Danfɛn jumɛn le ka kan ni boɲa ye? O ye adamaden ye. Danfɛn jumɛn le ka kan ni boɲa ye? O ye Matigi ɲasiranbagaw ye. Danfɛn jumɛn le ka kan ni dɔgoya ye? O ye adamaden ye. Danfɛn jumɛn le ka kan ni dɔgoya ye? O ye Ala ka sariyaw cɛnbagaw ye.

²⁰Boɲa be masacɛ kan a balimaw cɛma. Mɔgɔ minw be siran Matigi ɲa, ale fana be olu boɲa.

²¹Matigi ɲasiran le be kɛ sababu ye a be sɔn adamaden ma. Yɛrɛboɲa le be na n'a ka ban ye a ma.

²²Alaɲasiranbagakuraw, ni lonanw, ani fantanw ka kunkɔrɔta be Matigi ɲasiran le la.

²³Ka fantan hakilitigi nɛni, o te kotilennin ye. Ka boɲa la kojugukɛla kan, o man kan.

²⁴Mɔgɔba, ni kititigɛla, ani dugu ɲamɔgɔ be boɲa sɔrɔ. Nga u si man bon ni Ala ɲasiranbaga ye.

²⁵Hɔrɔndenw bena kɛ jɔɔn hakilitigi ka baaradenw ye. Kolɔnbaga tena se ka foyi fɔ o la. Boɲa ni dɔgɔya

²⁶Kan'i yɛrɛ kɛ lɔnnikɛla ye i ka baara kɛtuma na. I fɛrɛnin te waati min na, kan'i yɛrɛ wango.

²⁷Ka baara kɛ ka sɔrɔli kɛ ka tɛmɛ, o ka fisa ni kɔngɔtɔ yɛrɛboɲala ye.

²⁸N deen, kan'i yɛrɛ boɲa kojugu. I ka kan ni boɲa min ye, sɔn o dɔrɔn ma.

²⁹Mɔgɔ min be kojugu kɛ a yɛrɛ la, jɔn be se ka tiɲɛ d'o tigi ma? Jɔn be sɔn ka yɛrɛlɛɛbubaga boɲa?

³⁰Fantan be boɲa sɔrɔ a ka lɔnniya kama. Nafolotigi be boɲa sɔrɔ a ka nafolo le kosɔn.

³¹Ni boɲa lara mɔgɔ kan k'a to fantanya la, n'a kɛra nafolotigi ye, o bena kɛ cogo di? Nga ni mɔgɔ ye dɔgɔya sɔrɔ k'a to nafolotigiya la, n'a kɛra fantan ye, o bena kɛ cogo di?