Read dyu Sira deen ka kitabu 11 Bible Online

Sira deen ka kitabu 11 - dyu bible

Sira deen ka kitabu 11

¹Kana fɛɛn yeta dɔrɔn jati Mɔgɔmajiginin ka lɔnniya be kunkɔrɔta d'a ma. O b'a to a be sigiyɔrɔ sɔrɔ mɔgɔbabaw cɛma.

²Kana mɔgɔ tanu a ka cɛɲa kosɔn. Kana mɔgɔ kɔniya a fari cogoya kosɔn.

³Liden ka dɔgɔ pannifɛnw cɛma, nga a be lii min kɛ, o ka di ni fɛɛn bɛɛ ye.

⁴Kan'i yɛrɛ boɲa e kannafani kosɔn. Kan'i yɛrɛ boɲa i tandolon na. Bari, Matigi ka koo ye dabaribanko ye, o dogonin be adamadenw ma.

⁵Masa fariman caaman jigira ka sigi duguma, mɔgɔw hakili tun te min na, ale ye masafugulan biri.

⁶Ɲamɔgɔ caaman fɔnna u ka lɔyɔrɔw la. Mɔgɔba dɔw kɛra jɔɔnw ye.

⁷I ka kɔn ka koo mɛn ka ɲa fɔlɔ, ka sɔrɔ ka jalakili kɛ. Jatiminɛ kɛ fɔlɔ ka sɔrɔ k'a tigi sɔngɔ.

⁸Kana jaabili kɛ n'i ma mɛnni kɛ ka ɲa, kana kuma tigɛ mɔgɔ daa la.

⁹I niin te kɛlɛ min na, kan'i niin don a la. Kan'i niin don mɔgɔkolonw ka kɛlɛ la. Fɛɛn bɛɛ be bɔ Matigi fɛ

¹⁰N deen, kana don koo caaman na. N'i y'u caya, i tena ɲa sɔrɔ u bɛɛ la. Boliboli yɔrɔ bɛɛ te foyi di mɔgɔ ma. Koo ka caya e kun, o be na ni fuu ye.

¹¹Dɔ be tɔɔrɔ ten, ka sigɛn, ka firinfirin, o bɛɛ n'a ta, a jigi te fa.

¹²Dɔ be yen, see t'a ye, dɛmɛbaga t'a fɛ, fanga t'a la. A makoya ka ca! Nga Matigi ɲaa be ale kan n'a be ɲan'a ma. A ben'a wili ka bɔ a ka tɔɔrɔ la.

¹³A be kunkɔrɔta d'a ma, o be mɔgɔ caaman kabakoya.

¹⁴Hɛrɛ ni tɔɔrɔ, saya ni balo, fantanya ni faamaya be bɔ Matigi le fɛ.

¹⁵Hakilitigiya ni koo jatiminɛ, ani sariya lɔnko be bɔ Matigi fɛ. Kanuya ni kɛwaliɲuman sira taamako be bɔ ale lo fɛ.

¹⁶Fatɔya ni dibidibiko labɛnna kojugukɛlaw le kama. Kojugu ka di minw ye, olu be kɔrɔ kojugukɛ la.

¹⁷Matigi ka dita be to a ɲasiranbagaw fɛ kudayi. A ka ɲumanya bena to u kan tuma bɛɛ.

¹⁸Mɔgɔ dɔw be yen, a be kɛ nafolotigi ye wari marali fɛ. Nga a ka sara bena kɛ min ye, o filɛ:

¹⁹N'a y'a fɔ tuma min na ko: «N ye lafiya sɔrɔ sisan, n bena n ka fɛɛnw diya bɔ,» waati min tora, a m'o lɔn, a be sa k'a ka nafolo nin to mɔgɔ wɛrɛ ye. E jigi la Matigi kan

²⁰Kɛ kantigi ye bɛɛn koo la, i sɔbɛ don a la, e ka kɔrɔ a la.

²¹Kojugukɛla ka baara kana e hakili ɲagami, e jigi la Matigi kan ka jija kosɔbɛ i ka kɛta la. Ka fantan kɛ fɛntigi ye yɔrɔnin kelen, o ye koo nɔgɔman ye Matigi ɲana.

²²Alaɲasiranbaga ka sara Matigi fɛ, o ye k'a ta ɲa. A b'a ta ɲa yɔrɔnin kelen.

²³Kan'a fɔ ko: «Ne mako be mun na tugu? Makoyafɛn jumɛn le be ne fɛ halibi?»

²⁴Kan'a fɔ ko: «Ne makoyafɛn bɛɛ be n fɛ. Bɔnɛ jumɛn le be se ka se ne ma?»

²⁵Hɛrɛ loon na, bɔnɛ te to mɔgɔ hakili la. Bɔnɛ loon na, hɛrɛ te to mɔgɔ hakili la.

²⁶Ka mɔgɔ ka kɛwaliw sar'a ye saya loon na, o ye koo nɔgɔman ye Matigi fɛ.

²⁷Waatijugu be lafiya koo bɔ mɔgɔ hakili la. Mɔgɔ ka koow be bɔ kɛnɛma a ka koow labantuma na le.

²⁸Kan'a fɔ ko mɔgɔ si dagamunin lo n'a ma sa fɔlɔ. Mɔgɔ cogo be lɔn a sii bantuma le. I yɛrɛ kɔlɔsi mɔgɔjugu la

²⁹Kana don ni mɔgɔ sifa bɛɛ ye i ka soo kɔnɔ dɛ. Bari, namaramɔgɔw tɛmɛcogow ka ca.

³⁰Yɛrɛboɲala be i ko mɔgɔ be wɔlɔn min don jɔɔ la waasa ka wɔlɔn dɔw sɔrɔ tugu. A be waatiɲuman lo ɲini k'i minɛ.

³¹A b'a ka jaan la ka ɲuman yɛlɛma k'o kɛ juguman ye. Kɛwali minw gwɛnin lo, ale be fɔta dɔ sɔrɔ o la.

³²Tasuma fitini be kɛ tasumaba ye. Kojugukɛla ka jaanw be joli bɔn.

³³I yɛrɛ kɔlɔsi mɔgɔjugu la, bari, kojugu labɛnbaga lo. A be se ka tɔgɔcɛn lase i ma.

³⁴N'i ye lonan ladon i fɛ, a be se ka ɲagamini don i ka yɔrɔ la. A be se k'i ka mɔgɔw kɛ u be wili i kama.