Read dyu Sira deen ka kitabu 12 Bible Online

Sira deen ka kitabu 12 - dyu bible

Sira deen ka kitabu 12

¹Ɲuman kɛkun tɛ ɲumanlɔnbali ye N'i ko i be ɲuman kɛ mɔgɔ ye, i k'a kɛ a lɔnbaga ye. O la, i ka koɲuman bena lɔn i ye.

²Ɲuman kɛ Alaɲasiranbaga ye, i ben'a tɔnɔ sɔrɔ ale fɛ, walima Fɛɛn bɛɛ kuntigi fɛ.

³Mɔgɔ min be ban ka mɔgɔ sɔn, n'a be to kojugu la ka taga, hɛrɛ te ale fɛ.

⁴Alaɲasiranbagaw sɔn, nga kana kojugukɛla dɛmɛ fewu.

⁵Koɲuman kɛ mɔgɔmajiginin ye, nga kana foyi di Alaɲasiranbali ma. A bali dumuni ma, kan'a d'a ma. O kana kɛ sababu ye a ka se i kɔrɔ. N'o tɛ, a bena i sara n'a juguman ye fɔɔ siɲɛ fila i ka koɲuman kelen kelen bɛɛ nɔɔ na.

⁶Kojugukɛla kɔni koo ka go Fɛɛn bɛɛ kuntigi ye. Alaɲasiranbali ka kan ni ɲagwan min ye, a b'o l'a kan. A b'u kɔlɔsi fɔɔ ka taga se u halakilon ma.

⁷Mɔgɔɲuman sɔn. Nga kana kojugukɛla dɛmɛ fewu. Terisɔbɛ ni terijugu

⁸E t'i terisɔbɛ lɔn hɛrɛ tuma na. Nga gwɛlɛya tuma na, e jugu te se ka dogo.

⁹Ni hɛrɛ be mɔgɔ kan, o b'a juguw tɔɔrɔ. K'a to gwɛlɛya la, hali a teri be boli k'a to.

¹⁰Kana i jigi la i jugu kan fewu. Zira be fin cogo min na, a ka juguya be ten.

¹¹Hali n'a y'a yɛrɛ majigi ka to ka biri ka taama, i janto dɛ, k'i yɛrɛ kɔlɔsi a la. A be i ko nigɛ. A te se ka to n'a ma sɔn.

¹²Kana sigiyɔrɔ d'a ma i kɔrɔ, n'o tɛ, a bena i ɲagami k'i ka sigiyɔrɔ bɔsi. Kan'a sigi e kinibolo faan fɛ, n'o tɛ, a ɲaa bena bɔ e sigiyɔrɔ yɛrɛ le fɛ. A laban na, i bena ne ka hakilitigiyakuma faamu. Tuma min na e hakili bena jigi ne ka fɔta nunu na, e bena nimisa.

¹³Saa mana sirinankɛbaga cin, walima minw be gwɛrɛ sogo farimanw la, makari b'o la wa?

¹⁴Mɔgɔ min be to ka taga kojugukɛla fɛ, ale fana be ten. A b'a yɛrɛ naraka n'a ka hakɛ ye.

¹⁵A be to n'i ye waati dɔɔni, nga i mana ben, a taatɔ lo.

¹⁶E jugu dalakuma ka di haali, nga a kɔnɔ, a be miiri e sudonko le la. E jugu be se ka kasi i kosɔn, nga n'a ye cogo sɔrɔ, hali i fagako ten'a wasa.

¹⁷Kojugu dɔ mana i sɔrɔ, ale be kɔn e ɲa yɛrɛ ko a bena i dɛmɛ, nga a bena i seen ta le.

¹⁸O tuma na, i ben'a cogo lɔn A bena to ka yɛlɛ i ma, k'i tɔgɔjugu fɔ ka nisɔndiya.