Read dyu Sira deen ka kitabu 13 Bible Online

Sira deen ka kitabu 13 - dyu bible

Sira deen ka kitabu 13

¹Yɛrɛboɲala ka teriya Mɔgɔ min mana maga nɔgɔ la, o tigi b'a yɛrɛ nɔgɔ. Mɔgɔ min be taga yɛrɛboɲala fɛ, u bena kɛ kelen ye.

²Fɛɛn min ka gwili e ma, kan'a fɔ ko i b'a kɔrɔta. Mɔgɔ min fanga ka bon n'i ta ye, walima min ka nafolo tɛmɛna i ta kan, kana taga o tigi fɛ. Bɔgɔdaga ni nigɛdaga be se ka to ɲɔgɔn fɛ wa? U mana gosi ɲɔgɔn na, bɔgɔdaga kɔni be ci.

³Nafolotigi be tilenbaliyako kɛ, ale lo be tila ka dimi tugu. Fantan le be tɔɲɔ, a be tila ka yafa dali tugu.

⁴N'i be mɔgɔ mako ɲa, a b'i tɔnɔ dumu. E kunko mana na, a b'i bila.

⁵Bololafɛnw mana kɛ i fɛ, a be to n'i ye. A bena i dumu hali a te hami.

⁶A mako mana se i ma, a b'i nigɛnigɛ. A bena yɛlɛ n'i ye k'i jigi tugu. A bena kuma diman fɔ i ye, a ben'a fɔ ko: «Ne ka mun kɛ i ye?»

⁷A bena i dɔgɔya a ka dumuni kɛyɔrɔ la, a bena i dumu fɔɔ siɲɛ fila, walima saba. A be sɔrɔ ka yɛlɛ i ma a laban na. O kɔ, a man'i ye, a be yɛlɛko i ma, a ben'a kuun kɔmi e kosɔn.

⁸I yɛrɛ kɔlɔsi u kana i nigɛnigɛ, nalomanya kana dɔgɔya se i ma. I yɛrɛ kɔlɔsi faamaw la

⁹Ni mɔgɔbaba dɔ y'i wele, e ka to gɛrɛfɛ yɔrɔ la, a bena dɔ far'a ka weleli kan.

¹⁰Kana kɔrɔtɔ, n'o tɛ, u be se k'i gwɛn. Kan'i yɔrɔ jaɲa ka tɛmɛ, n'o tɛ, u be se ka ɲinɛ i kɔ.

¹¹Kana sɔn k'a fɔ ko i bena kuma n'a ye! Kana l'a ka kuma caaman na. Bari, a bena i kɔrɔbɔ n'a ka kuma caya ye. K'a to yɛlɛko la n'i ye, a b'i ka koo sɛgɛsɛgɛra le.

¹²Mɔgɔ min te se k'i ka kuma mara a yɛrɛ kɔnɔ, o tigi ye hinɛbali le ye. A bena bugɔli ni jɔrɔkɔ lase i ma.

¹³I yɛrɛ minɛcogo lɔn, k'i yɛrɛ kɔlɔsi ka ɲa. Bari, e be tagara e yɛrɛ halakiyɔrɔ le la.

¹⁴N'i y'o kuma mɛn k'i to sinɔgɔ la, kunun. E ka Matigi kanu e sii bɛɛ la, k'a dali e kisiko la. Nafalotigi ni fantan ka koo

¹⁵Nimanfɛn bɛɛ b'a bɔɲɔgɔnko le kanu. Mɔgɔ bɛɛ b'a mɔgɔɲɔgɔn le kanu.

¹⁶Nimanfɛn bɛɛ be jɛn n'a ka siya le ye. Adamaden bɛɛ be jɛn n'a bɔɲɔgɔnko le ye.

¹⁷Bɛɛn jumɛn be wara ni saga cɛ? Kojugukɛla ni Alaɲasiranbaga fana be ten.

¹⁸Hɛrɛ jumɛn le be suruku ni wulu cɛ? Hɛrɛ jumɛn le be nafolotigi ni fantan cɛ?

¹⁹Kongofaliw ye jaraw ka dumuni ye cogo min na, o cogo la fana, fantan ye nafolotigi ka dumuni ye.

²⁰Yɛrɛmajigi man di yɛrɛboɲala ye cogo min na, o cogo la fana, fantan koo man di nafolotigi ye.

²¹Ni nafolotigi ye gwɛlɛya sɔrɔ, a teriw b'a dɛmɛ. Nga ni fantan le benna, ale ka mɔgɔw be boli k'a to yen.

²²Nafolotigi mana fili, mɔgɔ caaman be ɲa a ma. N'a ye nalomanyakuma fɔ, u be tiɲɛ d'a ma. Nga fantan mana fili, u b'a kɔrɔfɔ. N'a ye hakilitigiyakuma fɔ, u t'o jati.

²³Nafolotigi mana kuma, bɛɛ be je, u b'a ka kuma jati kosɔbɛ. Fantan mana kuma, u b'a fɔ ko jɔn lo? A mana talon, u b'a tɔɔ ɲɔti janko a be ben.

²⁴Nafolo ye fɛnɲuman ye, ni namara t'a la. Alaɲasiranbali ka fɔcogo la, fantanya ye fɛnjugu ye.

²⁵Mɔgɔ kɔnɔnako b'a ɲaa cogo yɛlɛma. A ka kɛ koɲuman, walima kojugu.

²⁶Mɔgɔ ka nisɔndiya b'a ka dusuɲumantigiya yira. Talenw labɛnko ye jatiminɛgwɛlɛn le ye.