Read dyu Sira deen ka kitabu 14 Bible Online

Sira deen ka kitabu 14 - dyu bible

Sira deen ka kitabu 14

¹Hɛrɛsɔbɛ Mɔgɔ min ma deli ka fili a ka kuma na, o tigi dagamunin lo. Mɔgɔ min nii tɔɔrɔnin te a ka fili jalaki bolo, o tigi dagamunin lo.

²Mɔgɔ min kɔnɔnako t'a yɛrɛ jalaki, n'a ma tigɛ a yɛrɛ la ka ye, o tigi dagamunin lo. Nigɛjuguya ni tigɛgwɛlɛya

³Nafolo tɔnɔ ye mun ye tigɛgwɛlɛn fɛ? Nafa jumɛn b'a la ka kɛ nafolotigi ye n'i te wasa?

⁴Tigɛgwɛlɛn be nafolo lajɛn mɔgɔ wɛrɛ le ye. Mɔgɔ wɛrɛ bena sigi lafiya la, a ka nafolo kosɔn.

⁵Mɔgɔ min b'a yɛrɛ ka koo gwɛlɛya, o tigi be se k'a nɔgoya mɔgɔ wɛrɛ ye wa? A ten'a ka nafolo tɔnɔ dumu.

⁶Mɔgɔ min b'a yɛrɛ tɔɔrɔ, mɔgɔ si te yen min ka jugu n'ale ye. O le y'a ka juguya tɔnɔ ye.

⁷Hali n'a ye koɲuman kɛ, o be kɛ barinako le ye. Nga a laban na, a ka juguya bena bɔ kɛnɛ kan.

⁸Nigɛjugutigi ye mɔgɔjugu ye, ale min b'a ɲaa bɔ mɔgɔ kan k'a lɔgɔbɔ.

⁹Wasabali niyɔrɔ t'a ɲaa fa. Nigɛjugu b'a nii tɔɔrɔ.

¹⁰Dumuni man di tigɛgwɛlɛn ye. Dumuni yɛrɛ te sɔrɔ a fɛ. Nafolo minɛkoɲuman

¹¹N deen, ni see b'i ye, janto i yɛrɛ la ka ɲa. Matigi niyɔrɔ d'a ma.

¹²E hakili to a la ko saya yɔrɔ man jan, e fana t'a nalon lɔn.

¹³Koɲuman kɛ i teri ye sanni e ka sa. Ɲuman kɛ a ye ka kɛɲɛ n'i seko ye.

¹⁴Kana i yɛrɛ bali hɛrɛ la min ye tɛmɛta ye. Kana ban k'i nigɛlakosɔbɛ dɔ kɛ.

¹⁵Yala, e ka nafolo tena kɛ mɔgɔ wɛrɛ ta ye wa? Kala tena bon k'i bololafɛnw tilan wa?

¹⁶Sɔnni kɛ, ka sɔrɔli kɛ k'i nisɔn diya, bari, nisɔndiya te jahanama na.

¹⁷Nimanfɛnw bɛɛ be kɔrɔ i ko fani. «I ka kan ka sa,» o ye sariya ye kudayi.

¹⁸Yiri furaburu b'a kɛ cogo min na dɔ be benna dɔ be bɔra, adamaden ta be ten fana filankuru dɔ be tɛmɛ dɔ be na.

¹⁹Kɛwali bɛɛ ye tunuta ye. A kɛbaga be tunu n'a ye. Lɔnniya ɲini

²⁰Mɔgɔ min b'a sɔbɛ don lɔnniya ɲini la, min b'a hakili jakabɔ, o tigi dagamuna.

²¹Mɔgɔ min be lɔnniya koo jati minɛ a dusu la, ka miiri a ka koo dogoninw na, o tigi dagamuna.

²²A be tugu a kɔ i ko donso. A be taga dɛn k'a kɔnɔ a ka tɛmɛyɔrɔ la.

²³A be filɛli kɛ a ka fenɛtiri la. A b'a tulo malɔ a ka daa la.

²⁴A be sigi a ka soo kɔrɔ, a b'a ka sigiyɔrɔ labɛn a ka kogo kɔrɔ.

²⁵A y'a ka fanibugu lɔ a ka yɔrɔ gɛrɛfɛ. A sigira hɛrɛyɔrɔ kɔrɔ.

²⁶A y'a deenw bila a suma kɔrɔ. A sigira o yiri suma kɔrɔ.

²⁷Ale b'a tanga tile funteni ma. A sigir'a ka nɔɔrɔ kɔrɔ.