Read dyu Sira deen ka kitabu 15 Bible Online

Sira deen ka kitabu 15 - dyu bible

Sira deen ka kitabu 15

¹Mɔgɔtilennin ka sara Matigi ɲasiranbaga be koo kɛ n'a ɲasiran ye. Sariya karamɔgɔ bena kɛ lɔnnikɛla ye.

²Lɔnniya ben'a kunbɛn i ko bamuso n'a deen. Lɔnniya ben'a kunbɛn i ko cɛɛ n'a muso.

³A bena balo ni hakilitigiya ye ka lɔnniya kɛ a ka jii minta ye.

⁴A ben'a kɛ a tintinyɔrɔ ye, a tena kuru. A ben'a nɔrɔ a la, a tena maloya.

⁵A bena kunkɔrɔta d'a ma a ka mɔgɔw cɛma. A bena fɔta don a daa la jama cɛma.

⁶A bena nisɔndiya kosɔbɛ. A bena tɔgɔ sɔrɔ min te ban.

⁷Nalomanw tena se ka lɔnniya sɔrɔ. Kojugukɛlaw ten'a ye.

⁸A b'a yɛrɛ yɔrɔ jaɲa yɛrɛboɲalaw la. A koo tena to galontigɛlaw hakili la.

⁹Tanuli ma ɲi kojugukɛla daa la, bari o ma bɔ Matigi fɛ.

¹⁰Lɔnniya le be na ni tanuli ye. Matigi le b'o don mɔgɔ kɔnɔ. Adamaden n'a diyanako

¹¹Kan'a fɔ ko: «Matigi le ye ne bila fili la.» Bari, koo min man d'a ye, a t'o kɛ.

¹²Kan'a fɔ ko: «Ale yɛrɛ le ye ne bila fili la.» Bari, Matigi mako te kojugukɛla la.

¹³Juguya sifa bɛɛ ka go Matigi ye. A ɲasiranbagaw si te se k'o kɛ.

¹⁴Ale yɛrɛ le ye mɔgɔ dan fɔlɔfɔlɔ k'a to a yɛrɛ sago la.

¹⁵N'i b'a fɛ, i be se ka sariyaw bato. E ka tilenninya bena bɔ e ka latigɛ la.

¹⁶A ye tasuma ni jii bila i kɔrɔ. Min y'i diya, i b'o ta.

¹⁷Saya ni balo bilara adamaden ɲa. Ni min ye min diya, o be d'a ma.

¹⁸Bari, Matigi ka lɔnniya ka bon. Fanga b'a la, see b'a ye, a ɲaa be fɛɛn bɛɛ la.

¹⁹A ɲaa b'a ɲasiranbagaw kan. A yɛrɛ be adamadenw ka koow bɛɛ lɔn.

²⁰A ma Alaɲasiranbaliya sira di mɔgɔ si ma. Kojugukɛ dalilu ma di mɔgɔ si ma.