Read dyu Sira deen ka kitabu 16 Bible Online

Sira deen ka kitabu 16 - dyu bible

Sira deen ka kitabu 16

¹Alaɲasiranbaliw ka kiti Kan'i ɲaa bɔ deenw caya fɛ k'a sɔrɔ u te foyi ɲa. Kana nisɔndiya deen Alaɲasiranbali kosɔn.

²Deenw mana caya cogo o cogo, kana nisɔndiya u kosɔn n'u te siran Matigi ɲa.

³Kan'i jigi la u ka sii sɔrɔ kan, kan'i bolo la u caya kan. Deen kelen barikaman ka fisa ni waa kelen ye. Ka sa deen tanya la, o ka fisa ni deen Alaɲasiranbaliw ye.

⁴Dugu be boɲa hakilitigi kelen sababu la. Nga Alaɲasiranbaliw ka dugu be nagasi le.

⁵Ne y'o koow bɔɲɔgɔnko ye ni n ɲaa ye. Min tɛmɛna o kan, ne y'o kibaru mɛn.

⁶Ala ka tasuma be wili kojugukɛlaw ka ɲɔgɔnlajɛnyɔrɔ la. A ka dimi be wili murutibagaw kama.

⁷A ma yafa fɔlɔfɔlɔ mɔgɔjanw ma do, minw tun murutira u ka fanga kosɔn.

⁸A ma Lɔti ka dugu jalakibali to, ale mɔgɔ minw ka yɛrɛboɲakojugu tun goyar'a ye.

⁹A ma makari siya la min tun ka kan ka tunu, minw halakira u ka hakɛ kosɔn.

¹⁰Ani kɛlɛden sennatigi waa kɛmɛ wɔɔrɔ (600 000), minw tun tora u ka dusu gwɛlɛya kosɔn.

¹¹Hali n'u dɔ tun ye kungwɛlɛya kɛ, k'a fɔ a tora ɲagwanbali, o be kɛ kabakoko ye. Bari, ale lo ye makaritigi ni dusubatigi ye. Yafa see b'a ye kosɔbɛ, nga a b'a ka dimi fana yɛrɛkɛ.

¹²A ka makari ka bon cogo min na, a ka koo gwɛlɛya fana ka bon ten. A be adamadenw kiti ka kɛɲɛ n'u ka kɛwaliw le ye.

¹³Kojugukɛla tena se k'a yɛrɛ bɔsi n'a ka benkannifɛnw ye. Alaɲasiranbaga ka muɲu bena jati.

¹⁴A be ɲuman kɛ tuma bɛɛ, Nga mɔgɔ kelen kelen bɛɛ bena kiti ka kɛɲɛ n'a ka kɛtaw ye.

¹⁵Matigi ye *Faraŋɔn dusu gwɛlɛya janko a kana sɔn a ta ma. O la, mɔgɔw ben'a ka kɛtaw lɔn diɲɛ na.

¹⁶A ka makari ɲasinna danfɛnw bɛɛ ma. A y'a ka yeelen ni dibi dɔ di adamaden ma. Nalomanw ko Ala t'u ye

¹⁷Kan'a fɔ ko: «N bena n yɛrɛ dogo Matigi la. Jɔn le hakili bena to ne la sanfɛ? Jama cɛma, ne lɔnnin tɛ. Danfɛn caaman nunu cɛma, ne ye mun ye?»

¹⁸A filɛ: sankolo kuncɛlaban ni jii jukɔrɔla, ani dugukolo yɛrɛyɛrɛl'a nako kama.

¹⁹A mana kuluw ni dugukolo jusigilan filɛ, olu be yɛrɛyɛrɛ.

²⁰Nga nin bɛɛ la, a hakili te n na, a te ne ka kɛta jati minɛ.

²¹Ni n ye kojugu kɛ, mɔgɔ si te n ye. Hali n ye galon tigɛ dogo la, si tena bɔ a kala ma.

²²Ne ye koɲuman minw kɛ, jɔn bena o fɔ a ye? Ne bena mun le sɔrɔ a ka sariya bato la?

²³Mɔgɔ min kuun te yen, ale lo be miiri ten. Naloman, mɔgɔtununin, ale lo be miiri nalomanyako la. SƐBƐ NIN YƆRƆ FILANAN Ala bulonɔ diɲɛ kɔnɔ

²⁴I tulo malɔ n deen, ka lɔnniya sɔrɔ. I sɔbɛ don n ka kuma lamɛn la.

²⁵Ne bena i kalan cogoɲuman na. Ne bena lɔnniya fɔ i ye tigitigi.

²⁶Fɔlɔfɔlɔ, Matigi ye fɛɛnw dan tuma min na, a y'u bɔbɔ ɲɔgɔn na, bɛɛ n'a ka yɔrɔ.

²⁷A y'u ka kɛta yira u la kudayi k'a ta u daminɛ ma, fɔɔ ka taga se u laban ma waatijan kɔnɔ. Kɔngɔ t'u minɛ, u te sigɛn. U t'u ka kɛta dabila fana.

²⁸U si te gosi u tɔɲɔgɔn na. U te ban a ka fɔta ma.

²⁹O kɔ, Matigi ye filɛli kɛ dugukolo faan fɛ. A y'a fa n'a ka ɲumanya ye.

³⁰A ye sogo sifa bɛɛ yɛrɛkɛ dugukolo kan. U bena segi dugukolo la u sanin kɔ.