Read dyu Sira deen ka kitabu 17 Bible Online

Sira deen ka kitabu 17 - dyu bible

Sira deen ka kitabu 17

¹Mɔgɔ danko Matigi ye bɔgɔ kɛ ka mɔgɔ dan. A b'a kɛ a be kɔsegi yen fana.

²A ye mɔgɔ sii daan latigɛ, a bena tileda min kɛ, o lɔnnin lo. A y'a kɛ dugukolo kan fɛɛnw kuntigi ye.

³A ye setigiya d'a ma i ko a yɛrɛ. A y'a dan ka kɛ a bɔɲɔgɔnko ye.

⁴A y'a kɛ siranyafɛn ye nimanfɛn tɔw bɛɛ fɛ, janko a ka kɛ kongosogow ni kɔnɔw kuntigi ye.

⁵Matigi [1] y'a ka koo duuru ɲɔgɔn d'a ma, a wɔɔrɔnan kɛra hakilitigiya tilanko ye, a wolonwulanan kɛra kuma ye, waasa k'o koo ɲafɔ.

⁶A ye nɛɛn d'a ma, ni ɲadenw, ni tulow. A ye hakili d'a ma janko a ka miiri.

⁷A ye lɔnniya ni hakilitigiya d'a ma kosɔbɛ. A ye koɲuman ni kojugu faranfasiko lɔnniya d'a ma.

⁸A y'a yɛrɛ ɲasiranya don a dusu la waasa k'a ka kɛwaliɲumanw yira a la.

¹⁰Mɔgɔw bena Matigi tɔgɔɲuman fɔ k'a ka kobabaw lakali. Sariya ni bɛɛn

¹¹Matigi ma lɔnniya dama di mɔgɔw ma, a ye sariya d'u ma min b'a to u be to nii na.

¹²A ye bɛɛn kɛ n'u ye, min ye tuma bɛɛ koo ye. A y'a ka latigɛtaw fɔ u ye.

¹³U y'a ka nɔɔrɔ kabakoman ye. U tulow donn'a kaan kabakoman na.

¹⁴A y'a fɔ u ye ko: «Aw k'aw yɛrɛ kɔlɔsi tilenbaliya sifa bɛɛ ma.» Mɔgɔ ka kan ka min kɛ a mɔgɔɲɔgɔn ye, a y'o cii don u bolo. Matigi be koow bɛɛ kala ma

¹⁵Matigi ɲaa be mɔgɔw ka tɛmɛsiraw la tuma bɛɛ, u si dogonin te a ɲakɔrɔ.

¹⁶Kabin'u denmisɛnman, u taamacogo b'u bila kojugu la. U te se k'u ka dusugwɛlɛn nin yɛlɛma k'a kɛ dusuɲuman ye. Tiɲɛ na, tuma min na Ala ye dugukolo tilan siyaw cɛ,

¹⁷a ye ɲamamɔgɔ bila u kelen kelen bɛɛ kunna. Nga Isirayɛli kɔni ye Matigi le ta ye.

¹⁸A b'a balo k'a kolo i ko a deen fɔlɔ, k'a ka yeelen bɔ a ye k'a kanu, a t'a bila fewu.

¹⁹U ka kɛwaliw bɛɛ b'a ɲakɔrɔ i ko tile. A ɲaa be u ka tɛmɛsiraw la tuma bɛɛ.

²⁰U ka tilenbaliyako si te dogo a ma. U ka hakɛ bɛɛ b'a ɲakɔrɔ.

²¹Nga Matigi ka ɲi, a b'a ka danfɛnw lɔn. A t'u bila, a t'u fili, a b'u tanga le.

²²Mɔgɔ k'a mɔgɔɲɔgɔn sɔn fɛɛn na, o ye koba ye Matigi ɲana. O b'u jati ka tɛmɛ koo bɛɛ kan.

²³A laban na, a bena wili k'u sara, bɛɛ n'a ka kɛta sara.

²⁴Nga minw mana u sɔɔn yɛlɛma, a be see di olu ma ka kɔsegi. Minw jigi tigɛnin lo, a be olu jigi tugu. Sɔn Matigi ma

²⁵Bɔ e ka hakɛ la, ka kɔsegi Matigi ma. Lɔ a ɲakɔrɔ k'a dali ka dɔ bɔ e ka kojuguw la.

²⁶E ka tilenbaliyakow dabila ka kɔsegi Fɛɛn bɛɛ kuntigi ma. Kojugu koo goya i yɛrɛ ye kosɔbɛ. Bari, Matigi bena bɔ n'i ye dibi la ka taga n'i ye kɛnɛ kan kisiyɔrɔ la.

²⁷Jɔn le bena Fɛɛn bɛɛ kuntigi tanu lahara? Jɔn le bena barika l'a ye nimanw nɔɔ na?

²⁸Ni mɔgɔ sara, a ka kokɛta banna, a ka mɔgɔ tanu be dabila. Ni mɔgɔ be nii, na n'a ka kɛnɛ, a be se ka Matigi tanu.

²⁹Matigi be makari haali. Minw be kɔsegi a ma, a be yafa olu ma.

³⁰Bari, ka se koo bɛɛ la, o fanga te adamadenw bolo, bari adamaden ye sata le ye.

³¹Mun le be manamana ka tɛmɛ tile kan, k'a sɔrɔ a be tunu tuma dɔ? Kaan te adamaden kɔni ma. A be kojugu le miiri dɔrɔn.

³²Ala be sankolo kɔnɔ fɛɛnw kɔlɔsi, adamadenw kɔni ye bɔgɔ ni buguri le ye.