Read dyu Sira deen ka kitabu 18 Bible Online

Sira deen ka kitabu 18 - dyu bible

Sira deen ka kitabu 18

¹Ala ka bon Fɛɛn bɛɛ Danbaga be yen kudayi.

²Matigi kelenpe ka tilenninya le bena fɔ. Dɔ wɛrɛ t'ale kɔ.

³Diɲɛ koo b'a bolo. Bɛɛ be sɔn a ta ma, bari, ale lo ye fɛɛn bɛɛ Masa ye a ka setigiya kosɔn. A b'a niyɔrɔtaw woloma ka bɔ tɔw la.

⁴A m'a ka koow wango lako kalifa mɔgɔ si ma. Jɔn le bena se k'a ka boɲa lɔn?

⁵A ka masaya fanga, jɔn bena o danyɔrɔ jati minɛ? A be makariko minw kɛ, jɔn bena se k'o ɲafɔ?

⁶Mɔgɔ te se ka dɔ bɔ u la, dɔ te se ka fara u kan. Mɔgɔ te se ka Matigi ka ɲumanya yɔrɔ lɔn.

⁷Ni mɔgɔ tilara o la tuma min na, o le y'a daminɛ yɛrɛ ye. N'a lɔra, o hakiliɲagami be to a kan. Matigi be hinɛ bɛɛ la

⁸Adamaden ye mun ye? A be mun le ɲa? Ale fɛ, koɲuman ni kojugu ye mun ye?

⁹Sitigi ye saan kɛmɛ ye. [1] Mɔgɔ sanin kɔ, waati minw bena tɛmɛ, mɔgɔ te se k'o lon.

¹⁰Adamaden ka saan damani nunu te foyi ye n'a sumana ni waati ye min te ban. A be i ko jii tɔni kelen kɔgɔji kɔnɔ, i ko cɛncɛnkisɛ kelen.

¹¹O le y'a to Matigi be muɲu adamadenw kɔrɔ. A be makari u la.

¹²A b'a ye k'u laban ye makaritɔko ye. O le y'a to, a be hinɛ u la tuma caaman.

¹³Mɔgɔ be hinɛ a adamaden ɲɔgɔn le la. Nga Matigi be hinɛ danfɛnw bɛɛ la. A be ladili kɛ, ka hakili di, ka lɔnniya di. A be kafoli kɛ ka na n'u ye i ko begɛndɛndɛla.

¹⁴Minw be sɔn ladili ma, a be makari olu la, ani minw be sɔn a ka koow ma teliya la. Mɔgɔ sɔncogo

¹⁵N deen, kana mɔgɔ sɔn ka kumajugu l'a kan. Kuma min be digi mɔgɔ la, kan'o fɔ ka fara e ka fɛɛn dita kan.

¹⁶Kɔmiji te dɔ bɔ dugukolo gwan la wa? O la, kuma be se ka dɔ kɛ ka tɛmɛ sɔnnifɛn kan.

¹⁷Kumaɲuman man fisa ni sɔnnifɛnba ye wa? Kanuya be mɔgɔ min na, ale b'a fila bɛɛ fara ɲɔgɔn kan.

¹⁸Naloman be mɔgɔ sɔngɔ fu. Nigɛjugutigi ka mɔgɔ sɔn, o be mɔgɔ bila kasi la. Yɛrɛminɛ

¹⁹Jatiminɛ kɛ ka sɔrɔ ka kuma dɛ! Janto i yɛrɛ la sanni i ka bana!

²⁰E ka koow jati minɛ fɔlɔ, sanni kiti ka se i ma. Kiti loon, ni kuma sera i ma, e ka yafa sɔrɔ.

²¹E yɛrɛ majigi san'i ka bana. N'i ye hakɛ kɛ, a yira ko i nimisara.

²²Foyi kan'i bali k'i ka dajuru sara. Kan'i ka saya waati kɔnɔ ka sɔrɔ k'a sara.

²³San'i k'i daa di, e k'i yɛrɛ labɛn dɛ! E kana kɛ i ko mɔgɔ min be Matigi darabɔ.

²⁴E hakili to a ka dimiba la labanlonw na dɛ! A ka ɲagwan be se ka se i ma, e labanwaati la.

²⁵Ni dumuni b'i fɛ kosɔbɛ, e ka miiri loon dɔ kɔngɔ la. N'i ye nafolotigi ye, miiri fantanya ni dɛsɛ la.

²⁶K'a ta sɔgɔma, ka taga se wula fɛ, koo bɛɛ be se ka yɛlɛma. Matigi be se k'o kɛ teliman na!

²⁷Kolɔnbaga kɔni b'a yɛrɛ kɔlɔsi koo bɛɛ la. Ni kojugu b'a dafɛ, a b'a yɛrɛ minɛ.

²⁸Hakilitigiw bɛɛ be lɔnniya faamu. A be lɔnnikɛla boɲa.

²⁹Mɔgɔ minw be se kuma na, olu fana b'u ka lɔnniya yira. U be lɔnniyakuma caaman jɛnsɛn i ko sanji. [2] K'i jigi la Matigi kelen kan, o ka fisa. N'o tɛ, ele min ye suu ye, i be tila k'i ka koo kalifa suu wɛrɛ ma. Yɛrɛminɛ

³⁰Kan'i yɛrɛ to e ka nigɛlaw bolo. Dɔ bɔ e ka nigɛla la.

³¹N'i tora e ka nigɛlakow la, e juguw bena yɛlɛ i ma.

³²Kana to nisɔndiyakow dama na dɛ! Kan'a to o be kunko d'i ma!

³³Kana ɲanagwɛ kɛ ni wari dɔndɔnin ye ka faantaya bila i yɛrɛ la k'a sɔrɔ foyi t'i fɛ. [3] O be kɛ jaan ye i yɛrɛ ɲa.