Read dyu Sira deen ka kitabu 19 Bible Online

Sira deen ka kitabu 19 - dyu bible

Sira deen ka kitabu 19

¹Baarakɛla dɔrɔminla si tena kɛ nafolotigi ye. Mɔgɔ min mako te kofitiniw na, o tigilamɔgɔ be tagara benyɔrɔ le.

²Dɔrɔko ni musoko be hakilitigi caaman tunu pewu! Mɔgɔ min be to ka taga kakalamusow fɛ, ale te se a yɛrɛ kɔrɔ tugu.

³A bena kɛ tumuw niyɔrɔ ye. Kuma caaman tigi kunko

⁴Mɔgɔ min be la koo la joona joona, o tigi hakili man bon. Mɔgɔ min be hakɛ kɛ, o tigi b'a yɛrɛ hakɛ ta le.

⁵Kojugu be mɔgɔ min nisɔndiya, o tigi bena jalaki. [1] Ka ban o nisɔndiya ɲɔgɔn na, o ye i nii kisiko ye.

⁶Kuma caaman ka go mɔgɔ min ye, o tigi b'a yɛrɛ tanga kojugu ma. Mɔgɔ min be segi kuma kan, o ye hakilitan ye.

⁷I ye koo min mɛn, kan'o lakali, o la, a kunko tena se i ma.

⁸Kana dɔ fɔ i teri, walima e jugu ka koo la, fɔɔ n'i jenin bena jalaki bɛn i kan. N'o tɛ, kana foyi fɔ.

⁹N'a y'o mɛn, a ben'a yɛrɛ kɔlɔsi i la. Waati dɔ, a ben'a ka juguya yira i la.

¹⁰I ye koo dɔ mɛn wa? A to i kɔnɔ. Kana siran, a tena i kɔnɔbara ci.

¹¹Kuma be naloman kɔnɔ dimi i ko muso tintɔ.

¹²Biɲɛ be cogo min mɔgɔ woto la, koo mara be ten naloman kɔnɔ.

¹³N'i ye juguman dɔ mɛn i teri ka koo la, ta'a ɲininga, n'a sɔrɔ a m'a kɛ. N'o y'a sɔrɔ a nɔɔ lo, a tena o ɲɔgɔn kɛ tugu.

¹⁴N'i ye juguman dɔ mɛn e sigiɲɔgɔn dɔ ka koo la, a ɲininga, n'a sɔrɔ a m'a fɔ e ka mɛncogo la. N'o y'a sɔrɔ a y'o fɔ, a tena segi o kan tugu.

¹⁵Mɔgɔtɔgɔcɛn ka ca, o kama, i teri ɲininga.

¹⁶Mɔgɔ be se ka fili kuma na k'a sɔrɔ ŋaniyajugu tɛ. Jɔn be yen n'a ma fili ka ye kuma na?

¹⁷N'i ye juguman dɔ mɛn e sigiɲɔgɔn dɔ ka koo la, ta'a ɲininga ka sɔrɔ k'a bagabaga. A to Fɛɛn bɛɛ kuntigi ka sariya ka kɛ.

¹⁸Ka sɔn Matigi ta ma, o ye a ka hinɛ sɔrɔ daminɛ ye. Lɔnniya le b'an koo diya a ye.

¹⁹Ka Matigi ka fɔtaw lɔn, o ye i sɔnko ye a ka ladili ma. N'i be Matigi diyanako kɛ, yiri min be mɔgɔ kɛ sabali ye, i bena o deen sɔrɔ. Lɔnnisɔbɛ n'a kolon

²⁰Lɔnniya bɛɛ ye Matigi ɲasiran ye. Sariya batoko be sɔrɔ lɔnniya bɛɛ la. A b'a ka setigiya lɔn fana.

²¹Jɔɔn min b'a fɔ a masacɛ ma ko: «N tena e diyanako kɛ,» hali n'a y'a kɛ kɔfɛ, a ye dimi don a balobaga la.

²²Nga, kojugu lɔn te lɔnniya ye. Kojugukɛlaw ka ladili batoko te hakilitigiya ye.

²³Seko dɔ be yen, min koo ka go haali! Mɔgɔ min t'a ceku don lɔnniya la, o tigi ye naloman ye.

²⁴Hakilitan min be siran Matigi ɲa, o ka fisa ni hakilitigi ye min be sariyaw cɛn.

²⁵Cekuya dɔ be yen min be mɔgɔ bila tilenbaliya la. Dɔw be mɔgɔw namara waasa ka tiɲɛ sɔrɔ.

²⁶I ko mɔgɔ minw b'u yɛrɛ kuru ka taama, u ɲaa sisinin. Nga namarako le fanin b'u kɔnɔ.

²⁷A b'a kuun surun ka tulogerenya kɛ. N'i m'i janto a la, a bena see i kɔrɔ.

²⁸O tigilamɔgɔ be kojugu ye k'a to yen bari see t'a ye. N'o tɛ, n'a see b'a ye, a b'a kɛ le.

²⁹Adamaden be lɔn a cogo fɛ. Mɔgɔ hakiliman be lɔn a ɲada cogo fɛ.

³⁰Mɔgɔ ka fanidoncogo, n'a yɛlɛcogo, n'a taamacogo b'a cogoya yira.