Read dyu Sira deen ka kitabu 2 Bible Online

Sira deen ka kitabu 2 - dyu bible

Sira deen ka kitabu 2

¹Ala ɲasiran ni gwɛlɛya N deen, n'i b'a fɛ ka baara kɛ Matigi ye, i yɛrɛ labɛn kɔrɔbɔli kosɔn.

²Kɛ mɔgɔtilennin ye, k'i jaa gwɛlɛya. Kan'i hakili ɲagami tɔɔrɔ tuma na.

³Nɔrɔ Matigi la, kana fara a la, i bena e sii bɛɛ kɛ hɛrɛ la.

⁴Koo o koo mana i sɔrɔ, sɔn o ma. E dɔgɔyatuma na, kɛ muɲubaga ye.

⁵Bari, sanu be sɛgɛsɛgɛ ni tasuma le ye. Mɔgɔ minw koo ka di Ala ye, olu ka kan ka tɛmɛ yɛrɛmajigi fɛ.

⁶E jigi la Ala kan, a bena e dɛmɛ. Tilenninya sira taama, e jigi l'a kan.

⁷Aw minw be siran Matigi ɲa, aw k'aw jigi l'a ka makari kan. Aw kana aw mabɔ a la janko aw kana ben.

⁸Aw minw be siran Matigi ɲa, aw k'aw jigi l'a kan. Aw tena fɔn aw ka sara la.

⁹Aw minw be siran Matigi ɲa, aw ka la hɛrɛ sɔrɔ la a fɛ, ni nisɔndiya banbali an'a ka makari.

¹⁰Aw ka waati tɛmɛninw mɔgɔw ka koo jati minɛ. Jɔn y'a jigi la Matigi kan ka maloya? Jɔn jijar'a ɲasiran na, n'a y'o tigi ye k'a to ye? Jɔn y'a wele n'a m'a tigi jaabi?

¹¹Bari, Matigi be hinɛ, a be makari. A be hakɛ yafa, a be mɔgɔ kisi tɔɔrɔ tuma na.

¹²Nga bɔnɛ ye siranbagatɔ ni barikatan ta ye, ani kojugukɛla sira fila taamabaga.

¹³Bɔnɛ ye siranbagatɔ ta ye, minw jigi te Ala kan. O kama, Ala ten'a tanga.

¹⁴Minw fari fagara, bɔnɛ ye olu ta ye. Matigi bena aw ka koow jati minɛ tuma min na, aw bena mun kɛ sa?

¹⁵Minw be siran Matigi ɲa, olu te ban a ka kuma ma. A koo ka di minw ye, olu b'a ka sira taama.

¹⁶Minw be siran Matigi ɲa, olu b'a diyanakow le ɲini k'u kɛ. A ka sariya le y'a kanubagaw ka balo ye.

¹⁷Minw be siran Matigi ɲa, olu labɛnnin lo tuma bɛɛ a ɲakɔrɔ. U b'u yɛrɛ majigi a ɲɔkɔrɔ k'a fɔ ko:

¹⁸«An ka to Matigi bolo, o ka fisa ka to adamaden bolo. Bari, a ka bon cogo min na, a ka makari be ten fana.»