Read dyu Sira deen ka kitabu 21 Bible Online

Sira deen ka kitabu 21 - dyu bible

Sira deen ka kitabu 21

¹Boli kojugu ɲa N deen, i ye hakɛ dɔ kɛ wa? Kan'a ɲɔgɔn kɛ tugu. E filila koo minw na ka kɔrɔ, olu yafa dali.

²I be boli saa ɲa cogo min na, boli kojugu ɲa ten. Bari, n'i gwɛrɛl'a la, a ben'i cin. A ɲiiw be i ko jara ta, minw be mɔgɔ nii bɔ.

³Filiko kelen kelen bɛɛ be i ko murujan daa fila, a mana mɔgɔ tigɛ, a nɔɔ te suma.

⁴Yɛrɛboɲa, ni fariya be nafolo cɛn. A kɛra ten, yɛrɛboɲala n'a ka soo bena halaki.

⁵Ala be fantan ka dalikan mɛn. A fana b'a jaabi joona joona.

⁶Mɔgɔ min te sɔn ladili ma, o tigi be kojugu sira kan. Mɔgɔ min be siran Matigi ɲa, o tigi b'a dusu yɛlɛma.

⁷Mɔgɔ min be se kuma na kosɔbɛ, o tigi lɔnnin be yɔrɔ bɛɛ. Nga hakilitigi b'a dɛsɛyɔrɔ lɔn.

⁸Mɔgɔ min b'a ka soo lɔ ni mɔgɔ wɛrɛ ka nafolo ye, a be i k'o tigi be kabakuruw le lajɛnna a yɛrɛ kaburu lɔ kama.

⁹Alaɲasiranbaliw ka jɛnkulu be i ko kala tonnin, u laban be mana tasuma na le.

¹⁰Kojugukɛlaw ka tɛmɛsira dakɛɲɛnin lo, kabakuruw te yen. Nga a laban na, lahara dingɛ be yen. Kolɔnbaga ni naloman

¹¹Mɔgɔ min be sariya bato, o tigi be kɛ a yɛrɛ ta ye. Matigi ɲasiran be lɔnniya di.

¹²Mɔgɔ min te se foyi la, o tigi koloko be gwɛlɛya. Seko kelen be yen, min be na ni tɔɔrɔ caaman ye.

¹³Kolɔnbaga ka lɔnta ka ca, i ko baa fanin. A ka ladili be i ko jiɲuman bɔyɔrɔ.

¹⁴Naloman kɔnɔ be i ko fiyɛ cinin, a be fɛɛn o fɛɛn kalan, a te se k'o si mara.

¹⁵Mɔgɔkalannin mana hakilitigiyakuma mɛn, a be sɔn a ma k'a yɛrɛ hakili jagabɔ n'a ye. Mɔgɔkolon man'a mɛn, a koo be goy'a ye, a b'o fili kɔfɛ.

¹⁶Naloman ka kuma be i ko doni, taamasira kan. Nga kuma diman be sɔrɔ hakilitigi daa la tuma bɛɛ.

¹⁷Jama ka ɲɔgɔnlajɛnyɔrɔ la, mɔgɔw b'a fɛ ka mɛnni kɛ hakilitigi le fɛ. U be to ka miiri a ka kumaw na.

¹⁸Bonkolon be cogo min na, lɔnniya be ten fana naloman fɛ. Hakilitigi ka koo jatiminɛnin b'a fɛ i ko kumakolon.

¹⁹Kolɔnbali fɛ, kalan be i ko jɔrɔkɔ a seenw na, u be i ko nigɛjɔrɔkɔ le donna a kinibolo la.

²⁰Naloman be yɛlɛko ni fanga le ye. Nga hakilitigi be yɛlɛko dɔɔni dɔrɔn.

²¹Masirifɛn sanulaman be cogo min na, kalan be ten hakilitigi fɛ. A be i ko bololanigɛ, a kinibolo la.

²²Naloman be girin le ka don soo kɔnɔ. Nga kolɔnbaga be don yen ni cogoɲuman ye.

²³Naloman be to bonda la ka filɛli kɛ a kɔnɔ. Nga hakilitigi be dan kɛnɛma.

²⁴Mɔgɔkuntan le be dɛn ka mɛnni kɛ daa la, nga o ye maloyako ye hakilitigi fɛ.

²⁵Kuma caaman tigi be mɔgɔ wɛrɛ ka kuma le ta ka to k'o fɔ. Hakilitigi b'a ka kuma jati minɛ fɔlɔ.

²⁶Naloman be kuma fɔlɔ ka sɔrɔ ka miiri. Hakilitigi be miiri fɔlɔ ka sɔrɔ ka kuma.

²⁷Alaɲasiranbali man'a kɛlɛbaga danga, a y'a yɛrɛ le danga.

²⁸Mɔgɔ tɔgɔ cɛnbaga b'a yɛrɛ le naraka. A b'a yɛrɛ koo goya a gɛrɛfɛmɔgɔw ye.