Read dyu Sira deen ka kitabu 23 Bible Online

Sira deen ka kitabu 23 - dyu bible

Sira deen ka kitabu 23

¹Matigi, ne Faa, ne nii tigi, kana ne to n daa bolo, kan'a to a be ne don koo la.

²Jɔn le bena ne ka miiriyaw kolo? Jɔn le bena ne dusu kolo lɔnniya ye? Janko u kan'a kɛ ne be fili, u kana ne bila kojugukɛ la,

³janko n ka filiw ni n ka hakɛ kana caya kojugu. Ne kana ben o sababu fɛ n kɛlɛbaga ɲafɛ, ne jugu kan'a yɛrɛ boɲa o kosɔn.

⁴Matigi, ne Faa, ne nii tigi, kan'a to ne nigɛlako be caya.

⁵Ne kisi nigɛjugu ma.

⁶Kan'a to farisogo nigɛw ni nugubatɔya ka fanga sɔrɔ ne kan. Kan'a to malobaliyako be diya ne ye. Kana kali

⁷Ne deenw, aw ka se aw daa minɛcogo la. Mɔgɔ o mɔgɔ mana ladili nin bato, o tigi tena jalaki abada.

⁸Kojugukɛla yɛrɛ daa le b'a di. Mɔgɔlɔgɔbɔla ni yɛrɛboɲala daa le b'u ben.

⁹Kali, walima ka Ala tɔgɔ wele, o kana kɛ i delinanko ye.

¹⁰Ayiwa, baaraden min kuntigi ka jugu, bugɔlinɔ te fɔn ale fari kan cogo min na, o cogo kelen la, mɔgɔ min be kali ani ka Ala tɔgɔ wele tuma bɛɛ, o tigi te to hakɛtan ye fewu.

¹¹Mɔgɔ min be kali tuma caaman, ale be dɔ le far'a ka fili kan. Busan yɔrɔ te jaɲa ale ka soo la. N'a kalil'a kunfɛ, a ka hakɛ be ben a yɛrɛ kunna. N'a kalila naganaga la, a ka hakɛ be caya. N'a kalila gwansan le, a kuun te bɔ pewu, nga a ka soo bena to tɔɔrɔ la. Kumakolon ma ɲi

¹²Kumacogo kelen be yen, min ni saya ye kelen ye. O te fɔta ye Isirayɛlidenw cɛma. Bari, Alaɲasiranbaga te sɔn o ɲɔgɔn ma. U b'u yɛrɛ mabɔ o hakɛ nin ɲɔgɔn na.

¹³Kan'a to i daa be deli malobalikuma la, bari, o b'i don hakɛ la.

¹⁴E hakili to i faa n'i baa la, k'i to mɔgɔbabaw cɛma. N'o tɛ, k'i to yen, i be se ka ɲinɛ e yɛrɛ kɔ u ɲana. I delilako b'i bila malobalikuma fɔ la. O tuma na, i ben'a fɔ ko n'e tun ma wolo, k'o tun ka fisa, ani i bena e wololon danga.

¹⁵Mɔgɔ min delila kumakolon fɔ la, o tigi tena se ka ladi a sii bɛɛ la. Kakalaya

¹⁶Mɔgɔ sugu dɔw be yen, minw be hakɛ kɛ ka fara ɲɔgɔn kan. Dɔ wɛrɛw be dimi le ɲasin u yɛrɛ ma dɔrɔn. U ka nigɛla be mana i ko tasuma, a tena faga n'a ma mana ka ban. Mɔgɔ min b'a yɛrɛ farisogo bila kakalaya la, o tigi te tila n'a mako ma sa.

¹⁷Muso sugu bɛɛ ta ka ɲi cɛkolon fɛ. A tena faran la ni saya tɛ.

¹⁸Cɛɛ tilenbali a muso ye be to k'a fɔ ko: «Jɔn le ɲaa b'an na? Dibi donna ka n lamini. Kogo kɛra ka n koori. Mɔgɔ si te n yera, n bena siran jɔn ɲa? Fɛɛn bɛɛ kuntigi tena n ka hakɛw jati tugu.»

¹⁹A be siran adamadenw ɲa, nga a m'a lɔn ko Matigi ɲaa be yeli kɛ ka tɛmɛ tile yeelen kan siɲɛ waa tan. A ɲaa be adamadenw ka kɛwaliw bɛɛ la. A ɲaa be yeli kɛ hali logologow la.

²⁰A be fɛɛn bɛɛ lɔn, sanni a k'u dan. A ɲaa b'u kan fana u tununin kɔ.

²¹O tigi hakili te waati min la dɛ, a bena minɛ o tuma le la. A ɲaa bena gwan dugu forobayɔrɔw la. Jatɔmuso ka koo

²²Jatɔmuso ta be ten fana, ale min be deen wolo cɛɛ wɛrɛ ye.

²³A fɔlɔ, muso nin ye Fɛɛn bɛɛ kuntigi ka sariya cɛn. O kɔ, a filil'a cɛɛ ma. A sabanan, a ye ɲamɔgɔya kɛ ka kɛ kakala ye, a ye cɛɛ wɛrɛ ka deenw wolo a ye.

²⁴U bena bɔ n'a ye jama cɛma k'a kiti. U bena jatiminɛ kɛ a deenw kosɔn.

²⁵U ben'a deenw gwɛn ka taga. Deenw nunu tena niyɔrɔ si sɔrɔ.

²⁶Muso nin bena danga le to a kɔ. Mɔgɔw tena ɲinɛ o malobaliyako nin kɔ abada.

²⁷Minw tora sii la, olu ben'a lɔn ten ko fɛɛn si man fisa ni Matigi ɲasiranya ye, fɛɛn si man di k'a ka sariya batoli bɔ.