Read dyu Sira deen ka kitabu 24 Bible Online

Sira deen ka kitabu 24 - dyu bible

Sira deen ka kitabu 24

¹SƐBƐ NIN TILAN SABANAN Lɔnniya makiri Lɔnniya b'a yɛrɛ makiri. A b'a yɛrɛ boɲa a ka jama cɛma.

²A be kuma ta Fɛɛn bɛɛ kuntigi ka mɔgɔw cɛma k'a yɛrɛ makiri.

³Ko: «Ne bɔra Fɛɛn bɛɛ kuntigi daa la, i ko bugun, ka se diɲɛ yɔrɔ bɛɛ.

⁴Ne tun be sankolo sanfɛ. Ne ka masasigilan bilanin tun be sankaba la.

⁵Ne ye sankolo yɔrɔ bɛɛ yaala, ne munumununa jiba jukɔrɔ.

⁶Ne ka kuntigiya sera kɔgɔji jikuruw ma, ni dugukolo mumɛ kan. Ne ka kuntigiya sera siyaw bɛɛ ma, ni jamanaw bɛɛ ma.

⁷Ne ye sigiyɔrɔ ɲini u bɛɛ fɛ. Ne ye yɔrɔ ɲini n be se ka sigi min na.

⁸O la, fɛɛn bɛɛ Danbaga kumana n fɛ. Min ye ne dan, ale ye n sigiyɔrɔ yira n na. A y'a fɔ n ye ko: ‹Sigi Yakuba ka soo. Don Isirayɛli ka cɛɛn kɔnɔ.›

⁹A ye n dan kabini fɔlɔfɔlɔ, sanni diɲɛ ka dan. Ne tena tunu abada.

¹⁰Ne ye baara kɛ Fɛɛn bɛɛ kuntigi ɲakɔrɔ a ka sigiyɔrɔ la. A kɛra ten, ne sigira Siyɔn kulu kan.

¹¹A ye lafiɲɛyɔrɔ di ne ma dugu kɔnɔ min koo ka di bɛɛ ye. Ne be n ka masaya kɛra Zeruzalɛmu kɔnɔ.

¹²Ne sigira siya barikaman fɛ. Ne sigiyɔrɔ ye Matigi ka yɔrɔ kɔnɔna ye.

¹³Ne boɲana i ko Liban yiriba. Ne boɲana i ko Ɛrɛmɔn kulu kan sipɛrɛyiri.

¹⁴Ne boɲana i ko Ɛngɛdi kongokolon tamarosun, i ko Zeriko sebesun, i ko olivuyiri, kɛnɛba la kongo kɔnɔ, i ko pilataniyiri be jaɲa cogo min na.

¹⁵Ne ye Ala sigiyɔrɔ kasa diya i ko kanɛli ni tulu kasa diman. Ne y'a kɛ i ko wusulanɲuman ta. Ne kasa yɛrɛkɛra i ko galibanumu ni onisi ani sitakiti ta. [1] Ne yɛrɛkɛra i ko wusulan sisi, Ala ka sigiyɔrɔ la.

¹⁶Ne ye n bolow bɔ i ko teribɛntiyiri taw. Nɛɛma ni sebagaya be ne bolow la.

¹⁷Ne kɛra i ko *ɛrɛzɛnsun min y'a boloɲumanw bɔ. Ne feerenw ye deenw kɛ, kunkɔrɔta ni boɲa sɔrɔ deenw.

¹⁸Ne le ye kanuyaɲuman, ni Alaɲasiran, ni koo jatiminɛ, ani jigiɲuman bamuso ye. Ne min be yen kudayi, ne dinin be n deenw bɛɛ ma, Ala ye minw woloma. [2]

¹⁹Ne nigɛ be aw minw na, aw ye na ne fɛ. Ne deenw bena aw wasa kosɔbɛ.

²⁰Ka miiri ne la, o ka di ka tɛmɛ lii kan. Ka ne sɔrɔ, o ka di ka tɛmɛ liɲaga tuluman kan.

²¹Minw mana ne nɛnɛ, ne nigɛ b'u minɛ tugu. Minw mana ne min, ne minnɔgɔ bena to olu la halibi.

²²Min mana mɛnni kɛ ne fɛ, o tigi tena malo abada. Minw be baara kɛ ni ne ye, olu tena hakɛ kɛ fewu.» Lɔnniya ni sariya

²³O bɛɛ bɔra Fɛɛn bɛɛ kuntigi Ala n'an ka bɛɛn kitabu kɔnɔ, Musa ye sariya min lase an ma. O ka kɛ Yakuba ka soo niyɔrɔ ye.

²⁴Aw ka barika ɲini Matigi fɛ tuma bɛɛ. Aw ye nɔrɔ a la janko a ka fanga d'aw ma. Setigi Ala le ye Ala kelenpe ye. K'ale niin bɔ a la, kisibaga wɛrɛ te yen.

²⁵Ale sariya nin le b'a kɛ lɔnniya be woyo ka bɔ kɛnɛma i ko Pisɔn baji. Lɔnniya be kɛ i ko Tigiri baji, yiri denkura tuma na.

²⁶A be hakilitigiya di i ko Efarati baji be yɔrɔ minɛ cogo min na, i ko Zurudɛn baji be cogo min na sumantigɛwaati la.

²⁷A b'a kɛ hakilitigiya be yɛrɛkɛ i ko Nili baji, i ko Gihɔn baji *ɛrɛzɛn tigɛwaati la.

²⁸K'a ta sariya kalanbaga fɔlɔ la ka ta'a bila a laban na, mɔgɔ si ten'a kɔnɔnako lɔn ka ban.

²⁹Bari, a tɛmɛyɔrɔ ka bon ka tɛmɛ kɔgɔji kan, a ka kolatigɛnin ka dun ka tɛmɛ kɔgɔji duɲa kan.

³⁰Ne kɔni tun kɛra i ko jisira, ka bɔ baa la. Ne tun be i ko jii tɛmɛsira, ka don nankɔ la.

³¹N y'a fɔ n yɛrɛ kɔnɔ ko: «N bena n ka nankɔ sɔn. Ne bena n ka yɔrɔ labɛnnin ɲigi.» Ayiwa, ne ka jisira nana kɛ baa ye. Ne ka baa nana kɛ kɔgɔji ye.

³²Ne ben'a kalan gwɛya tugu i ko dugugwɛda. Ne ben'a ka yeelen ko fɔ yɔrɔjan mɔgɔw ye.

³³Ne be kalan jɛnsɛn i ko kirayakuma. N ben'a to filankuru nataw ye.

³⁴Aw k'a filɛ sa! Ne ma sigɛn ne yɛrɛ dama ye do! Ne sigɛnna lɔnniya ɲinibagaw bɛɛ le ye.