Read dyu Sira deen ka kitabu 25 Bible Online

Sira deen ka kitabu 25 - dyu bible

Sira deen ka kitabu 25

¹Min ka ɲi ani min ma ɲi Fɛɛn saba be yen minw koo ka di ne ye kosɔbɛ. O fana ka ɲi Matigi ni mɔgɔw ɲana. O ye: balima fila ka bɛɛn ye, ni sigiɲɔgɔnmaw ka kɛ teriw ye, ani cɛɛ ni muso ka bɛɛn.

²Mɔgɔ sifa saba be yen, minw koo ka go ne ye, minw ka kɛwaliw be ne dimi haali! O ye fantan yɛrɛboɲala ye, ni nafolotigi galontigɛla, ani cɛkɔrɔba hakilitan ɲamɔgɔyakɛla.

³I ma fɛɛn min sɔrɔ i kanbelentuma, i cɛkɔrɔbalaman be se k'o sɔrɔ wa?

⁴Kiti ka ɲi kunsigigwɛtigiw bolo, ladili fana ka ɲi cɛkɔrɔbaw bolo cogo min na,

⁵o cogo kelen na, lɔnniya fana ka ɲi mɔgɔkɔrobaw fɛ, ani koo jatiminɛ ni ladili mɔgɔbaba fɛ.

⁶Mɔgɔkɔrɔbaw ka kunnawolofugulan ye u ka yeta tɛmɛninw ye. U ka kunkɔrɔtafɛn ye Matigi ɲasiran le ye.

⁷Koo kɔnɔntɔ be yen, ne yɛrɛ be minw jati dagamu ye. Ne be se ka tannan fara u kan. O ye denfa ye min ye nisɔndiya sɔrɔ a deenw barika la, ani mɔgo min juguw halakira a ɲana.

⁸Mɔgɔ min be ni muso hakilitigi ye, o fana dagamunin lo, min daa ma deli k'a don koo la, ani min ma deli ka baara kɛ kuntigikolon ye.

⁹Yɛrɛminɛbaga fana dagamunin lo, ani min be kuma ni mɔgɔw ye minw be mɛnni kɛr'a fɛ.

¹⁰Mɔgɔ min ka fisa n'o bɛɛ ye, o ye lɔnniya tigi ye. Nga, mɔgɔ si te yen min ka fisa ni Matigi ɲasiranbaga ye.

¹¹Matigi ɲasiran le tɛmɛna fɛɛn bɛɛ kan. A ɲasiranbaga be se ka suma ni jɔn ye sa?

¹²Matigi ɲasiran ye a kanu daminɛyɔrɔ le ye. Nga, mɔgɔ be nɔrɔ a la lanaya le sababu la.

¹³Mandiminɔ te digi mɔgɔ la ka dusukun ta bɔ. Juguya si ma se muso ka juguya ma.

¹⁴Dusukasi si man jugu ka se i kɔniyabaga ta ma. Mɔgɔ si ka mɔnɛbɔ te digi i la k'i jugu ta bɔ.

¹⁵Baga si man jugu ka saa ta bɔ. Dusudimi si man jugu ka muso ta bɔ.

¹⁶Ne ka to ni jara ye, walima ni sogojugu ye yɔrɔ kelen, o ka fisa ne ma ka to ni musojugu ye.

¹⁷Muso ka juguya b'a ɲada cogo yɛlɛma. A ɲaa sisinin cogo b'a kɛ i ko wara.

¹⁸A cɛɛ be bɔ ka taga dumuni kɛ sigiɲɔgɔnw fɛ, a b'a ka makaritɔkan fɔ, a bolomako tɛ.

¹⁹Muso ka mɔgɔtɔɔrɔ ka jugu ni fɛɛn bɛɛ ta ye. Kojugukɛla ta fana be ten.

²⁰Cɛncɛnmugu be tintin min kan, ale yɛlɛ be cogo min na cɛkɔrɔba kɔrɔ, muso kuma caaman tigi be ten cɛɛ ɲamalɔnin bolo.

²¹Kana tugu muso kɔ a ka cɛɲa kama, kana burun muso la a ka nafolo kama.

²²Cɛɛ min muso b'a fɛɛrɛ bɔ, o tigi ta ye dusudimi, ni dɔgɔya, ani maloya ye.

²³Lɛbu, ni ɲasisi, ani dusucɛn, o ye musojugu ka kɛwali nɔɔ ye. Fangatanya ni farifaga, ale ye cɛɛ ta ye, min muso t'a nisɔndiya!

²⁴Muso sababu la, hakɛ daminɛna, ale kosɔn, mɔgɔ bɛɛ be sa.

²⁵Kan'a to e ka jii be taga gwansan, ani musojugu ka kumayɔrɔ sɔrɔ a sago la.

²⁶Ni muso nin te mɛnni kɛ e fɛ, faran a la k'a gwɛn.