Read dyu Sira deen ka kitabu 26 Bible Online

Sira deen ka kitabu 26 - dyu bible

Sira deen ka kitabu 26

¹Furuɲuman tigi ka dagamu Musoɲuman cɛɛ dagamunin lo, a sii be jaɲa kosɔbɛ.

²Musoɲuman cɛɛ be nisɔndiya, ale barika la, a be hɛrɛ la a sii bɛɛ la.

³Musoɲuman be di le, Matigi le b'a di a ɲasiranbagaw ma.

⁴O cɛɛ sugu mana kɛ fɛntigi ye, walima fantan wo, o te foyi ye, a nisɔndiyanin be. A ɲada ka di koo bɛɛ la. Musokolon ka koo

⁵Koo saba dɔ be yen minw be ne dusu cɛn, a naaninan be ne siran kosɔbɛ. O ye, jama ka dogodogokuma fɔ ye, ni jama lajɛnni, ani mɔgɔ tɔgɔ cɛnko, o ye koo ye minw ka jugu ni saya ye.

⁶Nga, tɔɔrɔ min ka jugu kosɔbɛ, o ye muso min b'a sinamuso keliya, a daa fana ka jugu.

⁷Musojugu ni sɛnɛkɛmisi kanlalɔgɔ lacogojugu bɛɛ ye kelen ye. A mara be i ko bunteni minɛ.

⁸Muso dɔrɔtɔ be ɲagaminiba kɛ, a te se k'a lɛbuyɔrɔ dogo fewu.

⁹Musokolon be lɔn a filɛlikɛ cogo fɛ, a ɲasi cogo yɛrɛ b'a yira.

¹⁰N'i be sunguru yɛrɛminɛbali gɛrɛfɛ, e k'i yɛrɛ kɔlɔsi kosɔbɛ. N'o tɛ, n'a ye sababu sɔrɔ, a be fɛrɛ i la.

¹¹I yɛrɛ kɔlɔsi a filɛlikɛ cogojugu la, e ɲagamiko kana bali i la.

¹²Taamabaga minnɔgɔtɔ be sɔn jii fɔlɔ sɔrɔta la cogo min na, o cogo kelen na, a be sɔn ka la bɛɛ kɔrɔ, a ka biɲɛforoko daa be yɛlɛ ka biɲɛ sifa bɛɛ kunbɛn. Musoɲuman tanu

¹³Muso ka cɛɲa b'a cɛɛ nisɔndiya, a ka kɛwaliɲuman b'a cɛɛ fari foni.

¹⁴Muso min ka kuma man ca, o ye Matigi ka dita ye. Mɔgɔ min ladila ka ɲa, ale ɲɔgɔn te yen fewu.

¹⁵Muso hakilitigi ɲɔgɔn te yen fewu. Min t'a daa don waliko la, ale ɲɔgɔn te yen.

¹⁶Tile wilitɔ be cogo min na sankolo la, musoɲuman be ten a ka gwaa labɛnkoɲuman kɔnɔ.

¹⁷Matigi ka fitinɛ be yeelen bɔ cogo min na, mɔgɔ ɲadaɲuman be ten farikolo labɛnkoɲuman kɔnɔ.

¹⁸Tutunan sanulaman minw sigira jusigilan warigwɛlaman kan, o be cogo min na, senkalaɲuman fana be ten sentigɛ kan.

¹⁹N deen, banba k'i ka kanbelenya waati kɛnɛya mara. Kana e fanga cɛn lonanw kosɔn.

²⁰Kongo yaala, ka foroɲuman bɔ, k'i halala suman dan yen, k'i jigi la e ka burujuɲuman kan.

²¹O la, i bena deen minw to i kɔfɛ, olu bena se k'u yɛrɛ boɲa u buruju kosɔn.

²²Muso min b'a yɛrɛ feere, ale ni kaaro bɛɛ ka kan. Musofurunin be i ko sangaso, a minɛbagaw be sa le.

²³Musojugu bena kɛ kojugukɛla niyɔrɔ ye, musoɲuman bena kɛ Ala ɲasiranbaga ta ye.

²⁴Muso malobali kɔni b'a sii kɛ maloya le la. Muso min be malo, hali ni a n'a cɛɛ be ɲɔgɔn fɛ, a b'a yɛrɛ minɛ.

²⁵Muso malobali ni wulu bɛɛ ka kan. Muso min be maloya, ale bena siran Matigi ɲa.

²⁶Muso min b'a cɛɛ boɲa, ale ye hakilitigi ye mɔgɔ bɛɛ fɛ. Furucɛ dɔgɔyabaga tɔgɔjugu bɔnin be, a ka yɛrɛboɲa kama. Musoɲuman cɛɛ dagamunin be, a sii be jaɲa kosɔbɛ.

²⁷Muso mankantigi min ka kuma ka ca be i ko kɛlɛkɛburu fiyɛkan, a be bɛɛ bila boli la. Cɛɛ o cɛɛ b'o bolo kan, ale b'a sii kɛ mankan ni kɛlɛ le la. Koo saba minw be digi mɔgɔ la

²⁸Koo fila be yen minw be digi ne la, sabanan be ne dusu dimi ka tɛmɛ, o ye: Ka mɔgɔ ye min ta tun ɲana ka ban, n'a tilara ka dɛsɛ, ka hakilitigiw ye ni mɔgɔw be ban u la k'u dɔgɔya, ani mɔgɔ min be koɲuman to yen ka hakɛ kɛ. Matigi be saya juguman le mara o tigi ye. Jagokɛla filiyɔrɔw

²⁹Sannikɛla ka to filibaliya la tuma o tuma, o ka gwɛlɛ. Jagokɛla jalakibali tena to kudayi.