Read dyu Sira deen ka kitabu 27 Bible Online

Sira deen ka kitabu 27 - dyu bible

Sira deen ka kitabu 27

¹Minw b'a fɛ ka fɛɛn caaman sɔrɔ, olu be hakɛ kɛ siɲɛ caaman. Min b'a fɛ ka kɛ fɛntigi ye, o tigi b'a ɲaa tugu le.

²Gween be don kogo kabakuru fila cɛ cogo min na, o cogo la, hakɛ be don feerelikɛla ni sannikɛla cɛ.

³Ni mɔgɔ min ma kɛ Matigi ɲasiranbaga ye kosɔbɛ, ale ka soo bena teliya ka halaki. Mɔgɔ be lɔn a ka fɔta fɛ

⁴Ni u be fɛɛn tɛntɛnna, a ɲaga be to cogo min na, o cogo la, mɔgɔ ka fili be ye a ka kuma na.

⁵Dagadilanbaga ka daga ɲa be lɔn tasuma kɔnɔ cogo min na, o cogo la, adamaden be kɔrɔbɔ a kumatuma na.

⁶Yiri deenw b'a suun ladoncogo yira cogo min na, o cogo la, adamaden kɔnɔnako be lɔn a ka kuma seen fɛ.

⁷Kana kɔn ka mɔgɔ si tɔgɔɲuman fɔ, n'i m'a tigi ka kuma mɛn fɔlɔ, bari, n'i y'a tigi lamɛn, o tuma na, i be faamuli sɔrɔ. Kolɔn tɔnɔ

⁸N'i banbana kɛwaliɲuman na, i bena se k'a kɛ, a kɛra ten, a bena kɛ i ko faniɲuman i kanna.

⁹Kɔnɔ minw ye siya kelen ye, olu le be jɛn ka sigi, o cogo la, tiɲɛ te taga k'a tigi to.

¹⁰Jara b'a ka sogo dɛndɛ cogo min na, kojugu fana be mɔgɔ tilenbali dɛndɛ ten.

¹¹Lɔnniya be sɔrɔ Alaɲasiranbagaw ka kuma na tuma bɛɛ, nga naloman be yɛlɛmayɛlɛma i ko kalo.

¹²I kana mɛn kojugu nalomanw cɛma, nga n'i be kolɔnbagaw cɛma, waati min y'i diya, o kɛ.

¹³Nalomanw ka kuma be na ni dusubɔ ye, u ka yɛlɛko yɛrɛ ye fɛnjugu ye.

¹⁴Mɔgɔ min be kali tuma bɛɛ, ale ka kuma be mɔgɔ farisi wili ka lɔ. N'a be sɔsɔli la, fɔɔ i k'i tulo datugu.

¹⁵Yɛrɛboɲala ka sɔsɔli be laban ni joli bɔn ye. A ka nɛnili be mɔgɔ tulo gwan. Gundo mara

¹⁶Mɔgɔ min be gundo fɔ, o tigi be lanaya ban a yɛrɛ faan fɛ, a te se ka terisɔbɛ sɔrɔ tugu.

¹⁷E k'i teri kanu ka kɛ kantigi ye a fɛ, nga n'i y'a ka gundow fɔ, i kana ta'a fɛ tugu.

¹⁸Mɔgɔ be bɔnɔ a balima sanin na cogo min na, o cogo la, i be bɔnɔ e sigiɲɔgɔn ka teriya la.

¹⁹Kɔnɔnin be bɔsi i bolo ka taga cogo min na, o cogo kelen na, e y'i tɔɲɔgɔn to a bɔsira i la.

²⁰I kan'a fɔ ko i b'a kɔɔ gwɛn, a tagara pewu, i ko minan, min y'a yɛrɛ fosi ka bɔ jaan na.

²¹N'i ye mɔgɔ mandimi, o be se ka furakɛ, walima n'i ye mɔgɔ nɛni, aw be se ka bɛn tugu, nga ka mɔgɔ ka gundo fɔ, cogo wɛrɛ t'o la. Filakanfɔ

²²Mɔgɔ min b'a ɲaa kɔmikɔmi, o ye miirijugu tigi ye. N'i bɔr'a kala ma, kana gwɛrɛ a la.

²³E ɲafɛ, a dalakuma ka di kosɔbɛ, a be nisɔndiya kosɔbɛ i ka kuma na. Nga e kɔɔ mana don dɔrɔn, a b'a daa yɛlɛma. A be ele yɛrɛ ka kuma le ta k'i seen don koo la.

²⁴Koo caaman man di ne ye, sankofɛrɛ nin tigilamɔgɔ ɲɔgɔn, a koo fana man di Matigi ye.

²⁵Mɔgɔ be kabakuru min fili sanfɛ, o le be jigi e kunna. N'i ye mɔgɔ bugɔ dabari la, e fana bena bugɔ ten.

²⁶I ye dingɛ min bɔ, e yɛrɛ le bena ben a kɔnɔ. I yɛrɛ ka jaan lanin le bena i minɛ.

²⁷Mɔgɔ be kojugu min kɛ, o juru sara le be bɔ a la, fɔɔ a yɛrɛ t'o bɔyɔrɔ lɔn.

²⁸Mɔgɔ lɔgɔbɔ ni nɛnili ye yɛrɛboɲala ka koo ye. Jara be dɛn ka sogo kɔnɔ cogo min na, jalaki be o mɔgɔ ɲɔgɔn kɔnɔna ten fana.

²⁹Alaɲasiranbaga ka bɔnɛ ka di mɔgɔ min ye, o tigi be jaan kɔnɔ, o tigi kɔni bena tɔɔrɔ ka sɔrɔ ka sa. Yafa ani dimi mara

³⁰Ka dimi mara, walima e dusu ka wili, o ye koo ye min ma ɲi. Kojugukɛla b'a ka kuntigiya kɛ o yɔrɔ la.