Read dyu Sira deen ka kitabu 28 Bible Online

Sira deen ka kitabu 28 - dyu bible

Sira deen ka kitabu 28

¹Mɔgɔ minw b'u mɔnɛ bɔ, Matigi ben'a mɔnɛ bɔ olu la, a tena u ka hakɛ si ye k'o to yen fewu.

²E balima ka fili yafa a ma, o la, n'i be Matigi dali tuma min na, a bena e ka hakɛ fana yafa.

³N'i diminin be i tɔɲɔgɔn kɔrɔ, i be se ka Matigi dali cogo di i kɛnɛyako la?

⁴N'i te se ka makari i tɔɲɔgɔn na, i be se ka Matigi dali cogo di i ka hakɛ la?

⁵Ele adamadentɔ, ni e be dimi mara, jɔn le bena e ka hakɛ yafa e ma sa?

⁶Miiri i laban cogo la, ka ɲɔgɔnkɔniya dabila. I hakili to saya n'a kɔfɛ koow la, ka sariya bato.

⁷Sariya koo to i kɔnɔ, i kana dimi mara i tɔɲɔgɔn kama. Fɛɛn bɛɛ kuntigi ka bɛɛn kosɔn, kana miiri tugu kojugu la a ye minw kɛ i la. Kɛlɛkow

⁸I yɛrɛ to gɛrɛfɛ kɛlɛ waati la, o la, i jalakiko bena kɛ dɔɔni ye, bari mɔgɔmurutinin be kɛlɛ juguya.

⁹Kojugukɛla be kɛlɛ wili teriw cɛ k'u faran, a be bɛɛn cɛn mɔgɔ ni ɲɔgɔn cɛ.

¹⁰N'i be tasuma lalaga, a be boɲa, n'i b'i kuun gwɛlɛyara, o be kɛlɛ juguya. Ni barika be mɔgɔ min na, o tigi be baarakolon kɛ fana, ni wari b'a fɛ, a dimi fana man gwɛlɛ.

¹¹Ni ɲɔgɔnfaamubaliya barila ka sɔrɔ, koo be gwan, ni dusu gwanna, ɲɔgɔnmandimi be na.

¹²N'i ye takami fiyɛ, tasuma be mana, n'i ye daji tu a kan, a be faga. Daa le b'o koo fila bɛɛ kɛ. Dajugu

¹³Dajukɔrɔkumafɔbagaw ni filankanfɔw danganin lo. U be bɛɛn cɛn mɔgɔ caaman cɛ.

¹⁴Dajugutigiw ye mɔgɔ caaman ta cɛn, u y'a kɛ mɔgɔ nunu y'u faso bila. U ye dugu barikamanw halaki, gwaso barikamanw benna u sababu la.

¹⁵U kɛra sababu ye muso kantigiw furu sara, u y'a kɛ u bɔnɛna u wasiji la.

¹⁶Mɔgɔ min be mɛnni kɛ u fɛ, o tigi te ɲasuma sɔrɔ, o tigi fana te hɛrɛ sɔrɔ.

¹⁷Busan bugɔli be mɔgɔ mandimi dɔrɔn, nga dajugu be mɔgɔ mako sa pewu.

¹⁸Kɛlɛkɛminan ye mɔgɔ caaman faga, nga o ta ka dɔgɔ ni dajugu ta ye.

¹⁹A ka balawu ma se mɔgɔ min ma, walima a ka fariya ma min sɔrɔ, o tigi dagamuna. A ka tɔɔrɔ ma la mɔgɔ min kan, walima mɔgɔ min ma kɛ a ka jɔɔ kɔnɔ, o tigi dagamuna.

²⁰Bari, a ka tɔɔrɔ ka gwɛlɛ i ko nigɛ, a ka jɔɔ be i ko zira jese.

²¹Dajugu be na ni saya min ye, o ka jugu haali, e ka sa, o yɛrɛ ka fisa ka to ale bolo.

²²Nga a ka foyi te se Alaɲasiranbaga kɔrɔ, a ka tasuma te mɔgɔtilennin jɛni.

²³Dajugu ka balawu be se Matigi ɲasiranbaliw le kɔrɔ, a ka tasuma be mana olu le kan n'a te faga fewu. A bena girin u kan i ko jara, a bena u halaki i ko waraninkala.

²⁴E be ŋɔni kɛ k'i ka foro lamini cogo min na, e k'i daa tugu ka ɲa ten fana. E b'i janto i ka warigwɛ n'i ka sanu na cogo min na, e k'i kumacogo kɔlɔsi ten fana.

²⁶N'i t'a fɛ ka don i ɲinibaga bolo, i k'i yɛrɛ kɔlɔsi i daa kana i ɲagami.