Read dyu Sira deen ka kitabu 29 Bible Online

Sira deen ka kitabu 29 - dyu bible

Sira deen ka kitabu 29

¹Fɛɛn dɔndɔ Makaritigi le be mɔgɔ dɔndɔ fɛɛn na, n'a y'a tigi dɛmɛ, o ye Ala ka sariya batoko ye.

²N'i tɔɲɔgɔn dɛsɛra, i ka juru don a la. I ye juru min ta, e ka banba k'a sara a waati la.

³I ka fɔta bato, janko mɔgɔw ka la i la, o la, e mako mana kɛ fɛɛn minw na, i b'o sɔrɔ.

⁴Mɔgɔ caaman be juru jati i ko u halala, o la, u be juru donbaga nii tɔɔrɔ.

⁵Sanni juru ka sɔrɔ, u b'o tigi fo ka ɲa, u b'u yɛrɛ majigi ka o tigi ka nafolo koo fɔ. N'a saratuma sera, u be munumunu, u nimisanin le b'a sara. U be fɔta sɔrɔ tuma bɛɛ.

⁶U man'a tilancɛ sɔrɔ k'a sara juru donbaga ye, o be kɛ ale fɛ kunnadiya ye. N'o tɛ, ale lo bololafɛn bɔsir'a la, ka tila ka jugu sɔrɔ a yɛrɛ la gwansan. Min bena to k'a danga ani k'a nɛni juru saratuma na. Yanni a be boɲa sɔrɔ, ayi, u b'a dɔgɔya le.

⁷O kama, mɔgɔ caaman be ban ka juru don, juguya tɛ dɛ, yɛrɛminɛ lo, janko u kana bɔnɔ u bololafɛnw na gwansan. Dɛsɛbagatɔw sɔn

⁸muɲu dɛsɛbagatɔ kɔrɔ. N'i b'a fɛ k'a sɔn ni fɛɛn min ye, kan'a to a ka kɔnɔni kɛ ka dɛsɛ.

⁹Dɛsɛbagatɔ dɛmɛ Ala ka sariya kama, kan'a bololakolon bila ka taga, bari a dɛsɛnin lo.

¹⁰E ka bɔnɔ i ka wari la e balima, walima i teri kosɔn, o ka fisa k'a to a be toli kabakuru dɔ kɔrɔ.

¹¹E ka nafolo minɛ ka kɛɲɛ ni sankolo la Ala sago ye. O bena fisaya i ma n'i ka sanu mara ye.

¹²Dɛsɛbagatɔw sɔn k'i ka sini ɲasigi labɛn, o bena kɛ sababu ye k'i bɔ bɔnɛ la.

¹³E ye ɲuman min kɛ dɛsɛbagatɔw ye, o ka fisa ni yɛrɛtangafɛn barikaman ye, o ka fisa ni taman gwiliman ye, u bena na e tanga i juguw ma. Ka lɔ n'i tɔɲɔgɔn ka koo ye

¹⁴Mɔgɔɲuman be lɔ n'a tɔɲɔgɔn ka koo ye, nga mɔgɔ min t'a tɔɲɔgɔn jati, ale fɔnna boɲa bɛɛ la.

¹⁵Mɔgɔ min lɔra n'i ka koo ye, kana ɲinɛ o koɲuman kɔ, bari a y'a yɛrɛ nii di e kosɔn.

¹⁶Kojugukɛla b'a ka juru sarabaga ka nafolo cɛn.

¹⁷Ɲumanlɔnbali tetejugu b'a kisibaga bila.

¹⁸Ka lɔ n'i tɔɲɔgɔn ka koo ye, o ye mɔgɔɲuman caaman ta cɛn. A y'u talontalon i ko sanfɔɲɔba be kɔgɔji kɛ cogo min na. A kɛra sababu ye fangatigiw y'u faso bila, u tagara to jamana wɛrɛ la.

¹⁹Ni kojugukɛla ko ale be lɔ ni mɔgɔ dɔ ka koo ye, a bena to a la, a te bɔ. N'a ye tɔnɔjugu ɲini, o bena jalaki kitiyɔrɔ la.

²⁰E tɔɲɔgɔn dɛmɛ ka kɛɲɛ n'i seko ye, nga e k'i yɛrɛ kɔlɔsi, e kana to a la. Ɲɔgɔn dɛmɛbaliya

²¹Adamaden ka makoyagwɛlɛn ye jii ni dumuni ani faniw, ni boon ye min b'a sutara.

²²Ka balo fantanya la i yɛrɛ ka soo, o ka fisa ka to mɔgɔ wɛrɛ ka soo ka dumunibabaw kɛ.

²³Caman b'i bolo wa, fitini lo wa, a k'i wasa. O la, mɔgɔ si ten'a fɔ i ye ko e ye lonan ye.

²⁴Ka to ka yaalayaala luuw kɔnɔ, o ma ɲi. N'i te i yɛrɛ ka soo, kuma t'i daa la.

²⁵I be dumuni ni jii di mɔgɔw ma, u t'a lɔn i ye. U ka kumakolon makɔnɔ k'a mɛn:

²⁶«Na yan, lonan, dumuniyɔrɔ labɛn. Ni fɛɛn dɔ b'i bolo, i k'o di ne ma n k'a dumu.

²⁷Bɔ yan, lonan, ne ye mɔgɔsɔbɛ dɔ wele, ne balima dɔ bena na bɔ n ye, n mako be boon na.»

²⁸O ye kogwɛlɛn ye mɔgɔsɔbɛ fɛ, n'i te naloman ye, a ka gwɛlɛ u k'i minɛ ten, k'i jati tɔnɔɲinibaga ye dama.