Read dyu Sira deen ka kitabu 3 Bible Online

Sira deen ka kitabu 3 - dyu bible

Sira deen ka kitabu 3

¹Wolobagaw boɲa Denmisɛnw, aw ka mɛnni kɛ aw facɛ fɛ, ka tugu u kɔ janko aw be kisi juguman ma.

²Bari, Matigi be boɲa la faa kan a deenw na, a be baa tiɲɛtigiya deenw faan fɛ.

³Mɔgɔ min b'a facɛ boɲa, o tigi ka hakɛ be yafa.

⁴Min b'a bamuso boɲa, o tigi be nafolo sɔrɔ.

⁵Mɔgɔ min b'a facɛ boɲa, o bena nisɔndiya a yɛrɛ deenw la. N'a ye dalili kɛ, a bena jaabili sɔrɔ.

⁶Mɔgɔ min b'a facɛ boɲa, o tigi bena sijan sɔrɔ. Matigi boɲabaga b'a yɛrɛ bamuso nisɔn diya.

⁷A be baara kɛ u ye i ko a kuntigiw.

⁸I facɛ boɲa e ka kuma n'i ka kɛwaliw la janko a ka duba be minɛ i ye.

⁹Faa ka duba be barika don a deen ka soo la. Baa ka danga be deen ka soo ci.

¹⁰Kana i yɛrɛ boɲa i facɛ ka kunsurunko la. A ka maloya man kan ka kɛ i ka kunkɔrɔta ye.

¹¹Bari, mɔgɔ be kunkɔrɔta sɔrɔ i faa ka boɲa la. Bamuso mafiɲɛya be maloya bil'a deenw na.

¹²N deen, i janto i facɛ la a kɔrɔya tuma na. K'a to nii na, kan'a to a dusu be kasi.

¹³Hali ni hakili t'a fɛ tugu, e ka muɲu. E kan'a nɛni bari fanga b'i la.

¹⁴Bari, Ala tena ɲinɛ i ka koɲuman kɔ i facɛ ye. O bena kɛ e ka hakɛ caaman yafa sababu ye.

¹⁵E ka tɔɔrɔ la, Matigi ben'a hakili to i la. E ka hakɛ bena bɔ i kan, i ko tile be *sanji siminin yelen cogo min na.

¹⁶Ala tɔgɔ cɛnbaga le be ban a facɛ la. Matigi ye min ta cɛn, ale lo b'a bamuso dusu dimi. Yɛrɛmajigi

¹⁷N deen, i yɛrɛ majigi e ka kɛtaw bɛɛ la. O la, mɔgɔw bena i kanu ka tɛmɛ mɔgɔɲuman kan.

¹⁸Ni dɔ farala e ka lɔyɔrɔ kan, e ka dɔ fara e ka yɛrɛmajigi kan. O la, e koo bena diya Matigi ye.

²⁰Bari, Matigi ka sebagaya ka bon. Mɔgɔmajigininw le be boɲa l'a kan.

²¹Koo min ka gwɛlɛ e ma, kana o ɲini. Fɛɛn min barika ka bon n'i ye, kan'o jati minɛ!

²²Sariya minw dira i ma, to ka miiri o la. E mako kana kɛ gundo koo la.

²³Kana e yɛrɛ don baara la min tɛmɛna e barika kan. I ye min ye diɲɛ kɔnɔ, o tɛmɛna mɔgɔ ka faamuli danyɔrɔ kan.

²⁴Bari mɔgɔ caaman tununa u ka miiriyajuguw kosɔn. U ka jati jugumanw le y'u ka miiriya yɛlɛma. Yɛrɛboɲa

²⁶Mɔgɔ dusugwɛlɛn laban te ɲa. Farati ka di mɔgɔ min ye, ale be to farati la fana.

²⁷Mɔgɔ dusugwɛlɛn be dɔ le fara a ka tɔɔrɔ kan. Kojugukɛla kɔni be hakɛ fara hakɛ kan dɔrɔn.

²⁸Kojugu mana yɛrɛboɲala sɔrɔ, fura t'a la. Bari, juguya lili b'a dusu la.

²⁹Hakilitigi be to ka miiri lɔnnikɛlaw ka talenw na. Tulomalɔbaga le koo ka di lɔnnikɛlaw ye. Koɲuman nafa

³⁰Jii be tasuma faga cogo min na, koɲuman fana be hakɛ yafa ten.

³¹Mɔgɔ min be koɲuman kɛ mɔgɔ ye, o tigi be sini le labɛnna. Ni gwɛlɛya ser'a ma loon dɔ, a bena dɛmɛbaga sɔrɔ.