Read dyu Sira deen ka kitabu 30 Bible Online

Sira deen ka kitabu 30 - dyu bible

Sira deen ka kitabu 30

¹Mɔgɔ kalan Faa min deen koo ka d'a ye, a b'a kolo ni busan ye, o deen nin le ben'a nisɔndiya sini.

²Mɔgɔ min y'a deen kolo ka ɲa, o tigi bena wasa a kosɔn, a bena kunkɔrɔta sɔrɔ a lɔnbagaw cɛma.

³Mɔgɔ min b'a deen kolo ka ɲa, o tigi be keliya bila a jugu la. A ta ye nisɔndiya ye a teriw cɛma.

⁴Hali n'o faa nin te yen loon min na, a be kɛ i ko a ma sa. Bari, a ye mɔgɔ to a kɔ min y'a bɔɲɔgɔnko ye.

⁵K'o tigi to nii na, a nisɔndiyanin lo k'a deenw ye, a satuma na fana, a te «tun k'a lɔn» fɔ.

⁶Bari, a be tagara ka mɔgɔ to a kɔ, min ben'a mɔnɛ bɔ a juguw la. O tigi fana bena kɛ ɲumanlɔnbaga ye a teriw faan fɛ.

⁷Faa min b'a deen cɛn, ale bena kɛ mandimiyɔrɔ furakɛla le ye. Deen kasikan mana bɔ dɔrɔn, ale kɔnɔ bɛɛ be gwan.

⁸Soo min ma kolo ka ɲa, ale yɛlɛ ka gwɛlɛ. Deen min tora a yɛrɛ ma, ale fana te se ka mara.

⁹N'i y'i deen ladiya kojugu, a bena dusukasiko le kɛ i la. N'i tora ka tolon kɛ n'a ye, a laban i bena kasi.

¹⁰Kana yɛlɛ deen fɛ ten, janko i kana tɔɔrɔ loon dɔ n'a ye. A laban, i bena e bolokunnaden cin.

¹¹K'a to a ka denmisɛnya la, kan'a to a yɛrɛ ma fewu. [1] Kan'a ka fili ye k'a to yen, k'a to denmisɛnya la, a ladi.

¹²Banba k'a dɛrɛ a denmisɛn tuma na, janko a kana kɛ tulogwɛlɛn ye ka muruti.

¹³Jija k'i deen kolo kosɔbɛ janko i kana i kuun surun. Kɛnɛya

¹⁴E ka kɛ fantan ye n'i ka kɛnɛ ni fanga b'i la, o ka fisa ka kɛ nafolotigi banabagatɔlaman ye.

¹⁵Kɛnɛyasɔbɛ ka fisa ni diɲɛ sanu bɛɛ ye, yɛrɛminɛ koɲuman ka fisa ni nafoloba ye.

¹⁶Nafolo si te se ka suma ni farisogo kɛnɛya ye, hɛrɛ si te yen min be se dusukun ta ma.

¹⁷Mɔgɔ ka saya ka fisa ka to hamikojugu la. Lafiɲɛ banbali ka fisa ni bana kuntagajan ye.

¹⁸Ka dumuni diman bila banabagatɔ kɔrɔ, dumuni nigɛ te min na, o be i ko saraka dumuta joo ɲakɔrɔ.

¹⁹Saraka bɔkun ye mun ye joo ma? A te fɛɛn diya lɔn, a t'a kasa mɛn fana. Matigi be mɔgɔ min tɔɔrɔla, ale fana be ten.

²⁰U b'a sɔnna ni fɛɛn min ye, a b'o filɛ dɔrɔn ka to tɔɔrɔ la, i ko cɛkɔbɔlen be sunguru filɛ cogo min na a ɲakɔrɔ. Nisɔndiya

²¹Kan'a to dusukasi be se i kɔrɔ, kana hakiliɲagami bila i yɛrɛ la.

²²Dusudiya be mɔgɔ to nii na, nisɔndiya be mɔgɔ sii jaɲa.

²³To k'i hakili falenfalen, ka to k'i jaa gwɛlɛya, dusukasi yɔrɔ jaɲa i la. Mɔgɔ caaman cɛnko sababu lo, a te foyi ɲa mɔgɔ ye.

²⁴Keliya ni dusubɔ be dɔ bɔ mɔgɔ sii la, hami be mɔgɔ kɔrɔbaya joona.

²⁵N'i dusu ka di, o tuma lo dumuni nigɛ b'i minɛ, o la, i be fɛɛn min dumuna, i be janto o la kosɔbɛ.