Read dyu Sira deen ka kitabu 32 Bible Online

Sira deen ka kitabu 32 - dyu bible

Sira deen ka kitabu 32

¹Yɛrɛminɛcogo N'u ye dumuniba ɲamɔgɔya d'i ma, kana i yɛrɛ boɲa. E k'i yɛrɛ minɛ i ko mɔgɔ tɔw, e k'i janto u la, o kɔ, i ka taga sigi.

²I ka kɛta bɛɛ kɛ, o kɔ, i ka taga sigi, i ka nisɔndiya i ka baaraɲuman kosɔn. I ka kan ni boɲa min ye, i bena o sɔrɔ.

³Ni e le y'u mɔgɔkɔrɔba ye, i be fɛɛn min lɔn, o fɔ. Nga i kana fɔlikɛlaw bali u ta la.

⁴Ni jama b'i lamɛnna tuma min na, kana kuma ka dama tɛmɛ, o t'i ka lɔnniya yirawaati ye.

⁵Ka fɔli kɛ dumuniba kɛyɔrɔ la, o ni ka kabakuru sɔngɔgwɛlɛn don bololanigɛ sanulaman kan, o le ye kelen ye.

⁶Ka bololanigɛ dilan ni kabakuru sɔngɔgwɛlɛn ye, k'o don minan sanulaman kɔnɔ, o ni fɔlikɛ duvɛn minyɔrɔ la le ye kelen ye.

⁷N'i ele le ka dɔgɔ u cɛma, ni u y'i dali siɲɛ fila, walima saba i be se ka kuma.

⁸Tilen ka kuma, koo caaman fɔ dakuru ɲaa damani kɔnɔ. I yɛrɛ yira ko i be koo kala ma, nga e te foyi fɔra le.

⁹Kana i yɛrɛ boɲa mɔgɔbabaw cɛma, kana kuma i kunfɛ mɔgɔkɔrɔbaw cɛma.

¹⁰Sanmanamana be taga ni sanpɛrɛn ye cogo min na, o cogo la fana, ɲuman be taga ni yɛrɛminɛ ye.

¹¹Ni waati sera, wili, kana munumunu. Taga soo joona.

¹²O yɔrɔ la, i bena se ka ɲanagwɛ, k'i diyanako kɛ. Nga kana kuma i kunfɛ ka dɔ hakɛ ta.

¹³O bɛɛ kɔ, e k'i Danbaga Ala fo, ale min be ɲuman kɛ i ye kosɔbɛ. TILANYƆRƆ NAANINAN Alaɲasiran

¹⁴Mɔgɔ min be siran Matigi ɲa, o tigi sɔnna ladili ma. Min be Matigi ɲini sɔgɔma joona, o tigi b'a ka dɛmɛ sɔrɔ.

¹⁵Mɔgɔ min be janto Matigi ka sariya la, o tigi ben'a ka makoɲafɛn sɔrɔ. Nga min te janto a la, o tigi be ben.

¹⁶Mɔgɔ minw be siran Matigi ɲa, olu b'a sago lɔn. U be koɲuman min kɛ, o bena manamana i ko yeelen.

¹⁷Kojugukɛla te sɔn ladili ma, a be cogo sɔrɔ k'a kuun gwɛlɛya ka koo kɛ.

¹⁸Mɔgɔ min ye ladili sɔrɔ, o tigi be miiri tuma bɛɛ. Nga Alaɲasiranbali ni yɛrɛboɲala te siran fewu.

¹⁹Kana foyi kɛ n'i ma miiri fɔlɔ, o la, i tena nimisa.

²⁰Kana sɔn ka sirajugu ta, janko i kana talon kabakuruw la.

²¹E te sira min lɔn, kana e jigi la o kan.

²²Hali k'i to n'i deenw ye, i yɛrɛ kɔlɔsi.

²³Kɛ kantigi ye i ka kɛtaw bɛɛ la, o ye Ala ka sariya batoko ye.

²⁴Mɔgɔ min be sariya bato, o tigi be janto a yɛrɛ la. Min y'a jigi la Matigi kan, o tigi tena dɛsɛ.