Read dyu Sira deen ka kitabu 33 Bible Online

Sira deen ka kitabu 33 - dyu bible

Sira deen ka kitabu 33

¹Mɔgɔ min be siran Matigi ɲa, o tigi be kisi bɔnɛ ma. Ni kɔrɔbɔli waati sera, a be bɔ o la.

²Kolɔnbaga te dimi sariya batoko la. Nga a cɛnbaga be i ko kurun, sanfɔɲɔba cɛma jii kan.

³Hakilitigi b'a jigi la Ala ka kuma kan, Ala ka sariya ni sarakalasebaga ka kirayakuma ye kelen ye ale fɛ. Nalomanya ani mɔgɔlɔgɔbɔbaga

⁴N'i b'a fɛ mɔgɔ k'i lamɛn, kɔn k'i ka fɔta labɛn. I ka lɔnta fara ɲɔgɔn kan, o kɔ, i ka jaabili kɛ.

⁵Naloman ka koo yecogo be i ko wotoro seen, a ka kumacogo be i ko wotoro seen min be munumunu.

⁶Mɔgɔlɔgɔbɔteri be i ko soo min be ŋunan a yɛlɛbagaw bɛɛ kɔrɔ. Kotilenbaliw

⁷Mun na loon dɔ ka fisa ni dɔ ye? K'a sɔrɔ saan loonw bɛɛ be yeelen sɔrɔ tile le barika la.

⁸Matigi le y'u danfara bɔ ten. Ale lo ye saan tilan, ani ka ɲanagwɛ waatiw sigi.

⁹A ye dɔw boɲa k'u kɛ loon senumanw ye, ka dɔw fana labila ten k'u kɛ loon gwansanw ye.

¹⁰Adamadenw bɛɛ bɔra bɔgɔ la, i ko Adama danna ka bɔ a la cogo min na.

¹¹O bɛɛ n'a ta, ka Ala to a ka lɔnniyaba la, a ye danfara bɔ u la, bɛɛ n'u dankan danna danna.

¹²A ye barika don dɔw la, ka lɔyɔrɔɲumanw di u ma. A ye dɔw kɛ a ta ye, olu ka gwɛrɛ a la. Nga a ye dɔw ta cɛn k'u majigi tɛtɛtɛ, k'u bɔ u ka lɔyɔrɔw la.

¹³Dagadilanbaga b'a ka bɔgɔmana yɛlɛma a sago la cogo min na, adamadenw be ten u Danbaga bolo. Ale lo bena u sara ka kɛɲɛ n'a ka kiti ye.

¹⁴Koɲuman be yɔrɔ min na, kojugu fana be sɔrɔ yen. Ɲanamanya be yɔrɔ min na, saya fana be o yɔrɔ la. O cogo la fana, n'i ye kojugukɛla ye yɔrɔ min na, Alaɲasiranbaga be yen fana.

¹⁵Fɛɛn bɛɛ kuntigi ka danfɛnw bɛɛ jati minɛ sa, u bɛɛ be ta ɲɔgɔn fɛ fila fila, hali n'u te bɛɛn ɲɔgɔn ma. Sɛbɛnnikɛla be miiri a ka baarala

¹⁶Ne nana kɔfɛ ka n ta kɛ, i ko fɛfɛrikɛbaga b'a kɛ cogo min na *ɛrɛzɛnforo kɔnɔ ɛrɛzɛn tigɛbaga kɔfɛ.

¹⁷Matigi barika la, ne sera ka n ta kɛ, n sera ka n ka minan fa i ko fɛfɛrikɛbaga.

¹⁸Aw k'a faamu kosɔbɛ ko ne ma sigɛn n yɛrɛ dama kosɔn, n sigɛnna ladiliɲinibagaw bɛɛ le kosɔn. Yɛrɛminɛcogo

¹⁹Jamana ɲamɔgɔw, aw ka mɛnni kɛ! Jamana kuntigiw, aw k'aw tulo malɔ!

²⁰K'i to sii la, kana sɔn k'i deen, walima i muso, walima i balima, walima i teri kɛ i kuntigi ye. Kana i ka nafolo fana di mɔgɔ wɛrɛ ma, janko i kana nimisa k'a fɔ ko i b'a minɛ tugu.

²¹K'i to sii la n'i be ninakili kɔni, kana sɔn mɔgɔ wɛrɛ ka kɛ i kuntigi ye.

²²I deen makoya ka bɔ ele la, o ka fisa, ele ka to ka minɛni kɛ ale fɛ.

²³I ka kɛtaw bɛɛ la, i ka banba k'i yɛrɛ minɛ. Kan'a to i tɔgɔ ka cɛn.

²⁴N'i ser'i sii daan ma tuma min na, n'i satuma sera, i be sɔrɔ k'i cɛɛn tilan a tabagaw cɛ. Jɔɔnw minɛcogo

²⁵Fali ta ye biin ni busan, ani doni gwiliman le ye, jɔɔn ta ye dumuni, ani jalakili, ni baara ye.

²⁶N'i ye baara di jɔɔn ma, e be hɛrɛ sɔrɔ. N'i y'a to a sago la, a bena boliyɔrɔ ɲini.

²⁷Sɛnɛkɛlɔgɔ min be misi kaan na, o le b'a sumaya. Bugɔlibere le be jɔnjugu sumaya.

²⁸Baara d'i ka jɔɔn ma, janko a kana sigi gwansan.

²⁹Bari, baarakɛbaliya be na ni kojugu caaman ye.

³⁰O la do, baara d'a ma, bari o le y'a nakun ye. N'a banna, e k'a seen siri ni jɔrɔkɔ ye. Nga mɔgɔ te se ka min kɛ, e kana o ɲini a fɛ. E ka koo bɛɛ kɛ ni tilenninya ye.

³¹Ni jɔɔn kelen le b'i fɛ, i k'a minɛ i ko i yɛrɛ, bari i y'a sɔrɔ n'i wasiji lo ye. N'a kelen lo, i k'a minɛ i ko i balima, bari e makoya b'a la i ko i mako b'i yɛrɛ la cogo min na.

³²N'i y'a minɛcogo juguya, n'a bolila,

³³i ben'a ɲini ni sira jumɛn ye tugu?