Read dyu Sira deen ka kitabu 34 Bible Online

Sira deen ka kitabu 34 - dyu bible

Sira deen ka kitabu 34

¹Sikow Jigi gwansan be mɔgɔkolon lafili, siko be naloman nisɔndiya.

²Mɔgɔ min be siko jati, o tigi be i ko min b'a fɛ ka fɛɛn suma, walima fɔɲɔ minɛ.

³Min be ye siko la, o ye jaa dama le ye. O te foyi ye, a be i ko jaa min be ye dubalen na.

⁴Fɛɛn saniyanin be se ka bɔ fɛɛn nɔgɔnin na wa? Tiɲɛ be se ka bɔ galon na wa?

⁵Koo nataw yeko ni taamasiɲɛ lɔnko, ani siko lɔnko, kuun te o si la, o ye hakili ɲagamiko dama le ye, i ko muso ka tiin waati.

⁶Kana u jati, fɔɔ ni sankolo la Ala le y'o yira i la k'i lasɔmi.

⁷Bari, siko ye mɔgɔ caaman ɲagami. Minw tun lara u la, olu benna bugubugu.

⁸Ala ka sariya le be mɔgɔ dafa, a yɔrɔ ka jan nunu na. Lɔnniya be bɔ mɔgɔtilennin daa la tigitigi. Taamako

⁹Mɔgɔ min ye taamajanw kɛ, o tigi ye koo caaman faamu. Mɔgɔ min ye koo ye, o le be kuma ni hakilitigiya ye.

¹⁰Kɔrɔbɔli ma se ka ye mɔgɔ min ma, o tigi te koo caaman lɔn.

¹¹Nga mɔgɔ min ye taamajan kɛ, o tigi be koo caaman lɔn.

¹²Ne ye koo caaman ye n ka taamaw seen fɛ, ne ye min faamu, o tɛmɛna ne ka fɔta kan.

¹³Faratigwɛlɛnw ye ne sɔrɔ siɲɛ caaman, nga ne kisira n ka lɔnniya barika la. Alaɲasiran

¹⁴Minw be siran Ala ɲa, olu bena sijan sɔrɔ.

¹⁵Bari u jigi be min kan, o le ye u Kisibaga ye.

¹⁶Mɔgɔ min be siran Ala ɲa, o tigi tena siran foyi ɲa. A te siran foyi ɲa, bari a jigi be Ala le kan.

¹⁷Mɔgɔ min be siran Ala ɲa, o tigi dagamuna.

¹⁸A ben'a jigi la jɔn le kan? Jɔn le ben'a dɛmɛ?

¹⁹Ala koo ka di minw ye, a be olu kɔlɔsi. U tangabaga barikaman lo, u dɛmɛbagasɔbɛ. A b'u tanga fɔɲɔjugu ma, a be suma kɛ u ye tile gwantuma na, a b'u tanga kojugu ma janko u kana ben.

²⁰A be mɔgɔ jaa gwɛlɛya, a b'a to mɔgɔ be nisɔndiya, a b'a to sii ni kɛnɛya, ni hɛrɛ be sɔrɔ. Alasira min ka ɲi

²¹Ka namarafɛn bɔ saraka ye Ala ma, o ye ɲadonya ye.

²²Ala te sɔn a ka sariya cɛnbagaw ka boɲafɛn na.

²³Fɛɛn bɛɛ kuntigi te sɔn Alaɲasiranbaliw ka boɲafɛnw na, a fana te saraka filɛ ka sɔrɔ ka hakɛ yafa.

²⁴N'i ye fɛɛn minɛ dɛsɛbagatɔ fɛ, ka sɔrɔ k'o bɔ saraka ye Ala ma, o ni ka deen minɛ k'a faga a faa ɲana, o le ye kelen ye.

²⁵Dɛsɛbagatɔ ka dumuni le y'a nii ye. Mɔgɔ min y'a jɛn o la, o tigi ye mɔgɔfagala ye.

²⁶N'i y'i tɔɲɔgɔn ka daladumuniko cɛn a fɛ, o ni a faga bɛɛ ye kelen ye.

²⁷N'i banna ka baarakɛla ka sara d'a ma, o ni mɔgɔ faga ye kelen ye.

²⁸Ni dɔ be lɔli kɛra, ni tɔ kelen b'a cira, u fila bɛɛ bena mun le sɔrɔ ni fu tɛ?

²⁹Mɔgɔ kelen be duba kɛra, tɔ kelen be danga kɛra, u Kuntigi bena mɛnni kɛ juman fɛ u fila la?

³⁰N'i y'i yɛrɛ saniya suu maganin kɔ, ka tila ka taga maga a la tugu, e yɛrɛ saniyakun kɛra mun ye sa?

³¹O ni mɔgɔ min ye suun don janko a ka hakɛ ka yafa, a be tila ka taga o ɲɔgɔn wɛrɛ kɛ tugu, o le ye kelen ye. Jɔn le bena mɛnni kɛ a ka dalili la? A ka suun donkun kɛra mun ye?