Read dyu Sira deen ka kitabu 35 Bible Online

Sira deen ka kitabu 35 - dyu bible

Sira deen ka kitabu 35

¹Ala batoko Ala ka sariya batoko, ni saraka caaman bɔ le ye kelen ye.

²Ka sɔn ka taama ka kɛɲɛ ni Ala ka fɔta ye, o ni kisili saraka bɔ le ye kelen ye.

³Ka koɲuman kɛ mɔgɔ ye, o ni suman saraka bɔ le ye kelen ye.

⁴Ka dɛsɛbagatɔ sɔn, o ni foli saraka bɔ le ye kelen ye.

⁵Matigi be min fɛ, o ye k'i yɛrɛ yɔrɔ jaɲa kojugu la. Ka kojugu kɛ dabila, o ni kojugu yafa saraka bɔ le ye kelen ye.

⁶Kana taga Matigi ɲakɔrɔ n'i bololakolon ye fana.

⁷Sarakaw bɔ, bari a b'o ɲini an fɛ.

⁸Mɔgɔtilennin ka saraka ka ɲi, a kasa diman be yɛlɛ fɔɔ Fɛɛn bɛɛ kuntigi fɛ.

⁹Ala be sɔn mɔgɔtilennin ka saraka ma, a te ɲinɛ a kɔ fewu.

¹⁰N'i be Matigi boɲana tuma min na, i k'o kɛ ni timinadiya ye. N'i ko e b'i ka sɛnɛfɛn deen fɔlɔ d'a ma, i kan'a niyɔrɔ dɔgɔya.

¹¹N'i b'i ka suman saraka o saraka bɔ, i k'o kɛ ni nisɔndiya ye. E k'i ka jaka di ni dusudiya ye.

¹²Fɛɛn bɛɛ kuntigi Ala ye min d'i ma, a boɲa ka kɛɲɛ n'o ye. I ka timinadiya ka kɛɲɛ n'i ka sɔrɔ ye.

¹³Matigi te ɲumanlɔnbali ye, e ye min d'a ma, a bena o ɲɔgɔnna caaman seg'i ma. Kititigɛla tilennin

¹⁴Kana miiri ko i be se ka Ala ka dɛmɛ sɔrɔ ni boɲafɛn ye, a bena ban i ka boɲafɛnw na.

¹⁵Kana i jigi la namarafɛn kan k'a boɲa n'a ye, Matigi ye kititigɛla ye, a te mɔgɔ bɔ mɔgɔ la.

¹⁶A te ban ka dɛsɛbagatɔ dɛmɛ, a be sɔn dusukasitɔ ka dalili la.

¹⁷A te ban falatɔ ka dalili la, a be firiyamuso ka sigɛnkuma lamɛn.

¹⁸A ɲaa be firiyamuso ɲaji jigitɔ la.

¹⁹Firiyamuso nin b'a tɔɔrɔbaga jalakira min na, a b'o mɛnna do.

²⁰Mɔgɔ min be baara kɛ Matigi ye a sago la, o tigi bena sigiyɔrɔɲuman sɔrɔ a fɛ. A ka dalili bena minɛ.

²¹Mɔgɔmajiginin ka dalikan be taga fɔɔ sankolo la, fɔɔ ka taga se Ala fɛ. A te lɔ yɔrɔ si, a te ban, fɔɔ Fɛɛn bɛɛ kuntigi Ala k'a jaabi,

²²ka mɔgɔtilenninw ka tiɲɛ fɔ. Matigi tena mɛn k'u jaabi, a tena muɲu u tɔɔrɔbagaw kɔrɔ. Waati dɔ bena se, mɔgɔ minw te makari, a bena olu kɔɔ kari.

²³A ben'a mɔnɛ bɔ siya wɛrɛw la, fɔɔ ka yɛrɛboɲalaw halaki, k'u ka fangakolon cɛn.

²⁴A bena adamadenw sara ka kɛɲɛ n'u ka kɛwaliw ye, a bena u sara ka kɛɲɛ n'u ka miiriyaw ye,

²⁵fɔɔ a ka lɔ n'a ka jama ka koo ye, k'a kɛ u be nisɔndiya a ka makari kosɔn.

²⁶Sanji na ka ɲi cogo min na jaa tuma na, a ka makari be ten dusukasi tuma na.