Read dyu Sira deen ka kitabu 36 Bible Online

Sira deen ka kitabu 36 - dyu bible

Sira deen ka kitabu 36

¹Isirayɛlidenw ka hɔrɔnya dali Ala, makari an na, makari an na, diɲɛ tigi Ala.

²A to siyaw bɛɛ ka siran i ɲa.

³I bolo wili siya wɛrɛw kama, janko u k'i ka sebagaya ye.

⁴I y'an jalaki k'a yira u la ko i ye Ala ye. O la do, u halaki fana k'a yira an na k'i be se.

⁵A to u k'i lɔn i ko an y'i lɔn cogo min na, u k'a lɔn ko Ala wɛrɛ te yen ele kɔ.

⁶E ka kobabaw kɛ tugu, segi e ka kabakow kan.

⁷E ka seko yira, ka boɲa la i yɛrɛ kan.

⁸A to i dusu kae wili, k'i ka dimi yira.

⁹An kɛlɛbagaw halaki, an juguw tunu pewu.

¹⁰A to waati ka se joona, e hakili ka to waati latigɛnin na. A to u b'i ka kobabaw lakali.

¹¹Minw mana se ka boli, a to mɔnɛbɔ tasuma ka olu jɛni. Minw b'i ka jama tɔɔrɔla, olu ka halaki.

¹²A to an juguw kuntigiw kuun ka ci, olu minw b'a fɔra ko: «An ɲɔgɔn tɛ.»

¹³Yakuba kɔmɔgɔw bɛɛ lajɛn.

¹⁶U niyɔrɔ di u ma i ko fɔlɔ la.

¹⁷Matigi, makari i ka jama na, e tɔgɔ lara min kan. Makari Isirayɛlidenw na, i ye minw jati e deen fɔlɔw ye.

¹⁸Makari e ka ciin na, e sigiyɔrɔ be min kɔnɔ. Makari Zeruzalɛmu na, min ye e ka lafiɲɛyɔrɔ ye.

¹⁹A to Siyɔn ka fa e ka kabakow kibaru la, a to e batoso ka fa i ka nɔɔrɔ la.

²⁰A yira ko Isirayɛlidenw y'i ka danfɛn fɔlɔw dɔ ye. Kiraya minw kɛra i tɔgɔ la, a to o ka kɛ.

²¹Mɔgɔ minw jigi b'i kan, e k'i ka layidu dafa olu ye, janko a ka lɔn ko i ka kiraw be tiɲɛ fɔ.

²²Matigi, e ka ɲumanya kama, e ka baarakɛlaw ka dalili lamɛn. A to dugukolo kan mɔgɔw bɛɛ k'a lɔn ko e ye Matigi Ala ye kudayi. Koɲuman lɔn

²³Kɔnɔbara be sɔn dumuni sifa bɛɛ ma, nga dumuni dɔw ka fisa ni dɔw ye.

²⁴Daa be kongosogo diya lɔn cogo min na, o cogo la, n'u be galon tigɛra hakilitigi ɲana, a b'a lɔn.

²⁵Kɔnɔnajuguya be na ni ɲɔgɔnfaamubaliya ye, mɔgɔ min ye koo caaman lɔn, o tigi le be se a kɔrɔ. Muso woloma

²⁶N'u ye muso di cɛɛ o cɛɛ ma, a be sɔn o ma, nga sunguru dɔ ka fisa ni dɔ ye.

²⁷Muso ka cɛɲa b'a cɛɛ ɲanamini, a yɛrɛ te se ka dɔ wɛrɛ ye o kɔ.

²⁸Ka fara o kan, ni muso nin be se kumaɲuman fɔ la ani a fɔcogo la, cɛɛ wɛrɛ ka dagamu ten'a cɛɛ ta bɔ.

²⁹Cɛɛ min ye muso sɔrɔ, o ye sɔrɔ daminɛyɔrɔ ye, a dɛmɛbagaɲuman lo, a jigi lo.

³⁰Laminikogo te luu min na, o ye soonw ta ye. Muso te cɛɛ min fɛ, o sigɛnnin lo, a t'a taayɔrɔ lɔn.

³¹Mɔgɔ te se k'a jigi la sonŋana kan, min be yaala duguw ni ɲɔgɔn cɛ. O cogo la fana, layɔrɔ te cɛɛ min fɛ, ale fana be ten. Suu mana ko k'a sɔrɔ yɔrɔ min, a be la yen.