Read dyu Sira deen ka kitabu 38 Bible Online

Sira deen ka kitabu 38 - dyu bible

Sira deen ka kitabu 38

¹Furakɛla ni banabagatɔ Furakɛla boɲa a ka baara kama, bari Matigi le y'a dan fana.

²Furakɛla b'a ka mɔgɔ kɛnɛya sɔrɔ Fɛɛn bɛɛ kuntigi Ala le fɛ, i ko a be boɲafɛn sɔrɔ faama fɛ cogo min na.

³Furakɛla ka lɔnniya b'a wasa, a koo be diya mɔgɔbabaw ye.

⁴Furaw be bɔ waga kɔnɔ, Matigi le y'u dan, kolɔnbaga b'u jati.

⁵Musa ma lɔgɔ le kɛ ka jii saniya wa?

⁶Matigi y'o lɔnniya di adamaden ma, janko ale ka se k'a tanu a ka kabakow kosɔn.

⁷Ala be mɔgɔ kɛnɛya o sababu la, furakɛlaw be dimi nɔgɔya ni fura ye.

⁸Furakɛla be o le ta k'o baara, kɛnɛya be sɔrɔ dugukolo kan o seen fɛ.

⁹N deen, n'i banana, kana cekun bɔ i yɛrɛ la dɛ. Matigi dali, a bena i kɛnɛya.

¹⁰I ka filikow dabila, ka kotilenninw kɛ, hakɛ bɛɛ dabila k'i kɔnɔ gwɛ.

¹¹N'a see b'i ye, e ka suman, ani wusulan ni tulu saraka bɔ Ala ye.

¹²O kɔ, a to furakɛla k'a ta kɛ i la fana, bari, Matigi y'ale fana dan. Furakɛla ka kan ka to i gɛrɛfɛ, sabu, e mako bena bɔ a la.

¹³Waati dɔ, e ka nɔgɔya be bɔ furakɛla fɛ,

¹⁴bari, furakɛlaw fana b'a ɲini Matigi fɛ ko a k'a kɛ banabagatɔ ka bana ka nɔgɔya, ko a k'a to fura ka sɔrɔ min b'a kisi.

¹⁵Mɔgɔ min be hakɛ kɛ a Danbaga ɲakɔrɔ, ne b'a fɛ o tigi ka bana ka don furakɛla bolo. Dusukasiwaati

¹⁶N deen, ni mɔgɔ dɔ sara, i ka kan ka kasi. Kasi i ko dimiba le y'i sɔrɔ, dusukasidɔnkili la. A suu don ka ɲa, kana tolon kɛ a ka kaburu la dɛ.

¹⁷Kasi kosɔbɛ, kasi yɛrɛ le. I k'a sanga kɛ a kɛcogo la, a mɛn ka kɛ tile kelen ye, walima fila, janko miirijugu kana sɔrɔ a kosɔn. O kɔ, a to i dusu be saalo.

¹⁸Tiɲɛ lo, dusukasi kojugu be se ka mɔgɔ faga, hakiliɲagami kojugu be mɔgɔ barika ban.

¹⁹Nisɔngoya be na ni dusukasi ye tuma bɛɛ, ni mɔgɔ ka koo kɛra i ko fantan ta, o tigi b'o filɛ i ko danga.

²⁰Kana sɔn ka to dusukasi la, ban o ma, i hakili to koo nataw la.

²¹Kana ɲinɛ ko minw sara, k'olu te kɔsegi tugu. E ka dusukasi kojugu te foyi ɲa taabaga ye, nga a be ele yɛrɛ le tɔɔrɔ.

²²Min ser'a ma, o ɲɔgɔn le bena se i ma fana. Kunu ta tun ye ale ta ye, bii ta ye ele ta ye.

²³Ni mɔgɔ tagar'a ka lafiɲɛyɔrɔ laban na, kana to ka miiri ale la tugu. N'a tigi nii bɔra dɔrɔn, i dusu saalo a kosɔn. Bololabaaraw

²⁴N'i b'a fɛ ka kɛ lɔnnikɛlaŋana ye, ka koo lɔn, i ka waati caaman labila masɔrɔko ye. Mɔgɔ min ka baara man ca, o tigi le be kɛ lɔnnikɛla ye.

²⁵Sɛnɛkɛla bena kɛ di k'a sɔrɔ? Ale min ka yɛrɛboɲa be dan busan minɛ la, ka misiw bagabaga u ka taama na. A b'a ka waati bɛɛ kɛ k'a ka baarakɛnɔ filɛ, a be turamisɛnw dama lo koo fɔ.

²⁶A ka miiriya be walanw wili dama le kan. A b'a ka sinɔgɔwaati ta k'a ka misigwerenw balo.

²⁷Fɛɛn lɛsɛbaga ni solɔbaga ta be ten fana, u be to baara la suu fara tile kan. Mɔgɔ min be taamasiɲɛ lafɛn dilan, ale fana be ten. A b'a ka waati bɛɛ ta ka muɲu ka to fɛɛn nunu yɛlɛmayɛlɛma na, a b'a sɔbɛ don ka taamasiɲɛ nin dilan kura ye, a ka siɲana be kɛ a ka baara nin laban kama.

²⁸Numu fana ta be ten k'a siginin to a ka gween gɛrɛfɛ, a ɲaa kɔni be nigɛ baarata kan dɔrɔn. Tasuma funteni b'a wɔsira, a jijanin be ka faankɔnɔtasuma muɲu. Marito mankan b'a tulo gwerenna, o bɛɛ n'a ta, a be fɛɛn min baarala, a ɲaa be o le la. A b'a fɛ cogo o cogo a ka baara ka ɲa, o la, a b'a ka siɲana bɛɛ kɛ janko k'a cɛɲa kosɔbɛ.

²⁹Dagadilanbaga fana be ten, k'a to a ka baara la, a be to ka daga yɛlɛmayɛlɛma n'a seenw ye, a be hami a ka baara la kudayi, a b'a ka baara bɛɛ jati minɛ.

³⁰A be bɔgɔmana baara n'a bolo ye, a b'a nɔɔni n'a seen ye. A be daga nin mɔ k'a masiri, a b'a ka siɲana bɛɛ kɛ n'a be daga jɛniyɔrɔ furan.

³¹O mɔgɔ nunu bɛɛ jigi b'u yɛrɛ ka baara kan, u kelen kelen bɛɛ be se u ka baara la.

³²Dugu te se ka sigi ni olu nɔɔ tɛ, mɔgɔ yɛrɛ tun tena se ka sigi a kɔnɔ, walima ka yaala a kɔnɔ. Nga n'a sera dugu koo ɲanabɔli ma, u t'u ɲininga.

³³Jama lajɛnyɔrɔ la, u te ɲafɛla sɔrɔ, kititigɛyɔrɔ la, sigiyɔrɔ te u fɛ. U te sariya faamu, mɔgɔ ka kan ni min ye, u t'o lɔn. U te se ka mɔgɔ kalan ka yeelen bɔ a ye, ani k'a ka kɛta yira a la. U fana te se ka lɔnniyakuma fɔ.

³⁴U nɔrɔnin be fɛnɲumanw le la. U be Ala dali janko u ka baara ka se ka ɲa. Sɛbɛnnikɛla ka koo Mɔgɔ min be jija ka Fɛɛn bɛɛ kuntigi ka sariya bato, o tigi ta te ten fewu.