Read dyu Sira deen ka kitabu 39 Bible Online

Sira deen ka kitabu 39 - dyu bible

Sira deen ka kitabu 39

¹A be jija ka fɔlɔ mɔgɔw ka lɔnniya kalan, a be miiri kiraw ka kirayakuma na.

²A b'a hakili to fɔlɔ mɔgɔbabaw ka kokɛninw na, a be talenw faamu fana.

³A be talenw kɔrɔ yaala, a be siirinw taayɔrɔ ye.

⁴A be se ka baara kɛ mɔgɔbabaw cɛma. A be sigi kuntigiw cɛma. U b'o tigilamɔgɔ le bila ka taga jamana wɛrɛ la, bari min ka ɲi adamaden fɛ, ani min ma ɲi, a b'o lɔn.

⁵Sɔgɔma joona, a be kɔn ka taga Matigi a Danbaga ɲakɔrɔ, a be dalili kɛ Fɛɛn bɛɛ kuntigi ɲakɔrɔ. A be kuma Ala le fɛ, a b'a ka hakɛ yafa dali.

⁶A b'a ɲini Matigi Alaba fɛ ko a ka hakilitigiya d'ale ma, k'o la, ale b'a ka lɔnniyakuma fɔ, ani a fana be barika la Matigi ye a ka dalili la.

⁷Lɔnnikɛla b'a sago n'a lɔnko ɲatilen ten le, a be Ala ka kodogoninw jati minɛ.

⁸A ye kalan min sɔrɔ, a bena o yira. A bena nisɔndiya sɔrɔ Matigi ka bɛɛn sariya la.

⁹Mɔgɔ caaman ben'a ka hakilitigiya koo fɔ, u tena ɲinɛ n'a ye fewu. A koo bena to u hakili la, a tɔgɔ bena wele kudayi filankuruw bɛɛ cɛma.

¹⁰Mɔgɔw ben'a ka lɔnniya koo fɔ, jama ben'a tanu.

¹¹N'a ye sijan sɔrɔ, a bena tɔgɔba sɔrɔ a kɔ, n'a fana sara, a ta ka ɲi. Ala ka danfɛnw

¹²Ne miirila ka ban dɔrɔn, ne b'a fɛ ka dɔ fɔ tugu.

¹³Ne denɲumanw, n'aw ye ne lamɛn, aw bena wili i ko jii dala buruku.

¹⁴Aw ka kɛ i ko wusulan, ka kasa diman bɔ. Aw ka kɛ i ko feeren. Aw ka dɔnkili dɔ la n'aw dusu bɛɛ ye, aw ka Matigi fo a ka kɛwaliw kama.

¹⁵Aw k'a ka boɲa fɔ, aw k'a tanu. Aw ka dɔnkili la a ye, ka gɔni fɔ, aw ben'a tanu ka to k'a fɔ ko:

¹⁶«Matigi ka kɛwaliw bɛɛ ka ɲi, a ka fɔta kelen kelen bɛɛ be kɛ u kɛwaati la.»

¹⁷Mɔgɔw ten'a fɔ tugu ko: «Mun na nin be kɛ?» Walima, «Nin kuun ye mun ye?» Bari, koo bɛɛ bena ɲanabɔ o ɲanabɔwaati la. Ala be dɔ fɔ dɔrɔn, jii be kɛ ɲɔgɔn kan. A be dakuru ɲaa kelen fɔ dɔrɔn, jii be kɛ yɔrɔ kelen na.

¹⁸Koo bɛɛ be kɛ a sago la ka kɛɲɛ n'a ka fɔta ye. N'a ko a be min kisi, mɔgɔ te yen k'a sɔsɔ.

¹⁹Mɔgɔ bɛɛ ka kɛtaw b'a ɲakɔrɔ, mɔgɔ si te yen min be se k'a yɛrɛ dogo a la.

²⁰A ɲaa be koo daminɛ n'a laban na, foyi te yen min b'a kabakoya.

²¹Mɔgɔ ten'a fɔ tugu ko: «Mun na nin be kɛ?» Walima, «Nin kuun ye mun ye?» Bari, fɛɛn bɛɛ danna makoɲa kama.

²²Ala ka nɛɛma be i ko baa fanin ka yɛrɛkɛ, a be i ko jii caaman, min ye dugukolo datugu.

²³A ka dimi bena se siya wɛrɛw ma ten, i ko a tun ye yɔrɔɲuman kɛ lakolon ye cogo min na.

²⁴A ka sira tilennin lo a ka mɔgɔ fɛ, nga Alaɲasiranbali fɛ, a fanin be gwɛlɛyaw la.

²⁵Ala ye koɲuman labɛn mɔgɔɲumanw ye kabini a daminɛ, ka kojugu labɛn kojugukɛlaw ye fana.

²⁶Fɛɛn minw be adamaden mako ɲa, o filɛ: jii, tasuma, nigɛ, ni kɔgɔ, ani mugu ni nɔnɔ, ani lii ni duvɛn ni tulu ani faniw.

²⁷O fɛɛn nunu be Alaɲasiranbaga mako ɲa, nga u be kɛ sababujugu ye kojugukɛla ma.

²⁸Fɔɲɔ dɔw be yen, Ala ye olu dan kojugukɛla ɲagwan kama. N'u wilila tuma min na, u b'u ka cɛnni boɲa. U b'u ka fariya yira fɔɔ u daan na, k'u Danbaga dusu suma.

²⁹Tasuma ni sanbɛrɛ, ani kɔngɔ ni saya, olu danna ɲagwan kama fana.

³⁰Sogojuguw ni bunteni ni fɔnfɔnni, ani murujan min be halakili kɛ Alaɲasiranbaliw cɛma,

³¹olu bɛɛ labɛnnin lo ka Ala ka fɔta bato, u labɛnnin lo ka to a ka bila la dugukolo kan.

³²Ne tun y'o bɛɛ faamu kabini a daminɛ na, n miirila o la, n y'o kɛ sɔbɛko ye.

³³Matigi ka kɛtaw bɛɛ ka ɲi. Ni mɔgɔ mako b'u la, u b'a mako ɲa.

³⁴Kan'a fɔ ko: «Nin ka jugu ni nin ye.» Bari, waati dɔ bena se, u ben'a lɔn ko fɛɛn bɛɛ tun ka ɲi.

³⁵Sisan aw ka dɔnkili la n'aw dusu bɛɛ ye k'aw kaan kɔrɔta, aw ka Matigi tanu.