Read dyu Sira deen ka kitabu 4 Bible Online

Sira deen ka kitabu 4 - dyu bible

Sira deen ka kitabu 4

¹N deen, kana ban ka fantan balofɛn d'a ma. Kana dɛsɛbagatɔ bila hami na.

²Kana kɔngɔtɔ tɔɔrɔ, kana makaritɔ dusu gwan.

³Kana dɔ fara mɔgɔ dusu gwannin ka tɔɔrɔ kan. Mɔgɔ min mako b'i ka dɛmɛ na, kan'a to a b'o kɔnɔ ka dɛsɛ.

⁴Kana dalilikɛbaga dɛsɛbagatɔ gwɛn. Kana ban ka fantan filɛ.

⁵Kana ban ka dɛsɛbagatɔ ɲafilɛ. Kan'a to a b'i danga sababu sɔrɔ.

⁶Bari, n'a nii tɔɔrɔnin y'i danga, a Danbaga b'a ka dalili minɛ.

⁷A to i koo be diya jama ye. E k'i yɛrɛ majigi mɔgɔbaba ɲafɛ.

⁸I tulo malɔ fantan fɛ, ka jaabiliɲuman d'a ma.

⁹Sigɛnbagatɔ bɔsi a tɔɔrɔbagaw bolo. Kɛ kantigi ye kititigɛ waati la.

¹⁰Kɛ falatɔw faa ye, kɛ i ko u bamusow cɛɛ. I bena kɛ i ko Fɛɛn bɛɛ kuntigi dencɛ. I koo bena diy'a ye ka tɛmɛ i bamuso kan. Lɔnniya kanu

¹¹Lɔnniya be kunkɔrɔta di a deenw ma. Mɔgɔ minw b'a ɲini, a be janto olu la.

¹²A kanubagaw b'a fɛ ka sii sɔrɔ. Minw b'a ɲini sɔgɔma joona, nisɔndiya bena olu labɔ.

¹³A sɔrɔbaga bena kunkɔrɔta sɔrɔ cɛɛn ye. O mana taga yɔrɔ o yɔrɔ, Matigi b'a ta ɲa.

¹⁴Mɔgɔ minw be janto a la, olu be Ala kelen le bato. A kanubagaw koo ka di Matigi ye.

¹⁵Mɔgɔ minw kolol'a ye, o tigi bena kiti tilennin tigɛ. Mɔgɔ min nɔrɔla a la, o tigi be to hakilisigi la.

¹⁶N'a y'a jigi la lɔnniya kan, a ben'a sɔrɔ cɛɛn ye. O nisɔndiya bena se a kɔmɔgɔw ma.

¹⁷Lɔnniya ben'a bila siragwɛlɛn kan fɔlɔ. A ben'a ɲaa gwan fɔlɔ. A ben'a kɛ a be tɛmɛ siragɔngɔrɔninw fɛ fɔlɔ, fɔɔ a k'a jigi l'a kan. A b'a sɛgɛsɛgɛ n'a ka ɲinitaw ye.

¹⁸O kɔ, a be tilen a ma k'a nisɔndiya, k'a ka gundow yir'a la.

¹⁹Nga n'o tigi banna lɔnniya ma, a b'a bila, k'a to a ta be cɛn. Yɛrɛkɔlɔsi

²⁰Koow jati minɛ, k'i yɛrɛ kɔlɔsi kojugu ma, kana maloya i yɛrɛ cogo la.

²¹Bari, maloya dɔ be yen min be mɔgɔ don hakɛ la, dɔ wɛrɛ be yen min be kunkɔrɔta ni sababuɲuman di.

²²Kana kɛ sababujugu ye i yɛrɛ ma. Kan'a to maloya ka kɛ i ben sababu ye fana.

²³I ka kan ka kuma tuma min na, i kana siga ka kuma.

²⁴Bari e ka kuma ben'i ka lɔnniya yira. E ka fɔta bena mɔgɔw kalan.

²⁵Kana tiɲɛ sɔsɔ. E ka sɔn maloya ma e ka kolɔnbaliya kosɔn.

²⁶Kana maloya k'i ka hakɛ fɔ. Mɔgɔ te se ka baji woyo bali.

²⁷Kan'a to naloman b'a ɲaa don i la. Kana sɔn fangatigi k'i piripara.

²⁸E jija tiɲɛ fɔ la fɔɔ ka taga se i saya ma. Matigi Ala bena i dɛmɛ.

²⁹Kana kuma joona joona ka kɛ salabagatɔ ye kɛwaliw la.

³⁰Kana kɛ jara ye i ka soo kɔnɔ. Kana kɛ siranbagatɔ ye i ka mɔgɔw cɛma.

³¹Kan'a to sɔrɔ ka diya i ye dama, a di ka gwɛlɛya i ma.