Read dyu Sira deen ka kitabu 40 Bible Online

Sira deen ka kitabu 40 - dyu bible

Sira deen ka kitabu 40

¹Adamaden ka sigɛn Ala ye mɔgɔ dan, bɛɛ n'a ka hamijuguw. A ye doni gwiliman la adamadenw kan, kabini u bɔlon u bamuso kɔnɔ, fɔɔ ka ta'a bila u donlon ma kaburu la.

²U be miiri min na, min b'u lasiran, n'u b'a kɔnɔ na tigitigi, o ye u banlon ye.

³U bɛɛ, k'a ta u ka faamaw ma, minw be u kunna, fɔɔ ka ta'a bila mɔgɔ gwansanw ma, minw be kɔfɛ kɔfɛ,

⁴k'a ta masafani n'a fugulan donbaga ma, fɔɔ ka ta'a bila fani gwansan donbaga ma,

⁵u bɛɛ bena dimi ni keliya lɔn, ani ɲagwan ni hakiliɲagami, ni saya ɲasiran, ani ɲɔgɔnkɔniya ni kɛlɛw. N'u lara ko u be lafiɲɛ, u ka dusukasi be na sinɔgɔwaati le la.

⁶U mana lafiɲɛ dɔɔni sɔrɔ dɔrɔn, haya! O waati dɔɔni kɔnɔ, o be kɛ i ko i be tilegwangwan fɛ le. U be to sinɔgɔ la, u hakili be wili sigo fɛ, u be kɛ i ko kɛlɛden dɔ le sera ka kisi kɛlɛ la n'a be bolila.

⁷N'a kɛra i ko a sera ka kisi tuma min na, a be kunun ka kabakoya a siranya gwansan kama!

⁸Kojugu kelen le be nimanfɛnw bɛɛ dɛndɛna, adamaden fara sogo kan. Nga kojugukɛlaw ta le bena juguya kosɔbɛ.

⁹O ye saya, walima fagali, ɲɔgɔnsɔsɔ walima kɛlɛ, sigɛn, walima kɔngɔ, halakili, walima bɔnɛ.

¹⁰O koo nunu bɛɛ danna Alaɲasiranbali le kama, jiba nana diɲɛ cɛn olu le kama.

¹¹Fɛɛn o fɛɛn bɔra dugukolo la, olu be kɔsegi yen. Minw bɔra jii kɔnɔ, olu be kɔsegi o yɔrɔ la. Kojugukɛlaw laban

¹²Dasan ni tilenbaliya bɛɛ bena ban, nga tilenninya kɔni be to yen kudayi.

¹³Kojugukɛlaw ye nafolo min sɔrɔ, o bena kɛ i ko baji min be jara. A bena tɛmɛ i ko saan pɛrɛnkan, min mankan be bɔ sanji waati la.

¹⁴Mɔgɔjugu b'a tigɛ yɛlɛ ka mɔgɔ sɔn ka nisɔndiya cogo min na, o cogo kelen na fana, benkannikɛlaw bena tunu.

¹⁵Alaɲasiranbaliw kɔmɔgɔw tena barika sɔrɔ. Mɔgɔkolonw lili tena donyɔrɔ sɔrɔ fara fɛ.

¹⁶Buruku min be falen bada la, olu le be kɔn ka bɔn biin bɛɛ ɲa.

¹⁷Nga ɲumanya be i ko nankɔɲuman dɔ. N'i ye fantan sɔn, mɔgɔw b'u hakili to o la kudayi. Alaɲasiran

¹⁸Mɔgɔ min b'a yɛrɛ ka baara kɛ, o tigi ta ka di. Nga mɔgɔ min ye nafolo sɔrɔ, o tigi dagamuna kosɔbɛ.

¹⁹Mɔgɔ ka deen caaman sɔrɔ, walima ka dugu dɔ sigi, o le be tɔgɔ di adamaden ma. Nga muso dafanin ka fisa n'o bɛɛ ye.

²⁰Fɔlifɛnw mankan ni duvɛn be mɔgɔ nisɔndiya, nga ka lɔnniya koo diya i yɛrɛ ye, o nisɔndiya ka bon ka tɛmɛ o kan.

²¹Filen ni kolonjo kaan ka di, nga kuma diman ka fisa n'o ye.

²²Nɛɛma ni cɛɲa, olu ka di ɲaden ye, nga suman wilikoɲuman foro kɔnɔ ka fisa n'o ye.

²³Teriw be taga ɲɔgɔn fɛ waati ni waati, nga muso n'a cɛɛ ka ɲɔgɔnye tɛmɛna o kan.

²⁴Balimaw, walima dɛmɛbagaw be mɔgɔ dɛmɛ gwɛlɛya waati le la, nga ka dɛsɛbagatɔ sɔn tɛmɛna o kan.

²⁵Sanu ni warigwɛ be mɔgɔ jigi tugu, nga ladiliɲuman ka fisa n'o ye.

²⁶Ni nafolo ni fanga b'i fɛ, i hakili siginin lo, nga n'i be siran Matigi ɲa, o hakilisigi ka bon kosɔbɛ. O tuma na, e te dɛsɛ fewu, e mako te dɛmɛbaga wɛrɛ la tugu.

²⁷Matigi ɲasiran b'a kɛ i ko i be nankɔɲuman dɔ le la, o b'i tanga ka tɛmɛ sebagaya bɛɛ kan. Dalilikɛbaga

²⁸N deen, kana kɛ dalilikɛbaga ye, e ka sa, o ka fisa ka dalili kɛ.

²⁹Mɔgɔ min b'a ɲaa bɔ a tɔɲɔgɔn ka dumuni fɛ, o tigi te se ka wele jogoɲuman tigi. A b'a yɛrɛ ɲagami n'o dumuni wɛrɛ ye, k'a sɔrɔ a t'a sɔrɔ. Mɔgɔ min kalanna ani ka ladi ka ɲa, o tigi b'a yɛrɛ kɔlɔsi, k'a yɛrɛ minɛ o la.

³⁰Dalilifɛn ka di dalilikɛbaga malobali daa la, nga n'a jigira a kɔnɔ na tuma min na, a be kɛ i ko tasuma.