Read dyu Sira deen ka kitabu 41 Bible Online

Sira deen ka kitabu 41 - dyu bible

Sira deen ka kitabu 41

¹Saya Mɔgɔ min be hɛrɛ la ni nafolo b'a fɛ, n'a te hami ni foyi ye, gwɛlɛya t'a kan, n'a ka koow bɛɛ be ɲa, n'o tigi miirila saya la, o ka go a ye haali.

²Saya, e ka kɛta ka fisa mɔgɔ ma, min dɛsɛnin be, ni barika t'a la, min kɔrɔla kosɔbɛ ni hami b'a kan, fɔɔ a be muruti yɛrɛ k'ale te se ka muɲu tugu.

³Kana siran saya ɲa, i hakili to mɔgɔw la minw tagara i ɲa, ani minw bena tugu i kɔ.

⁴Matigi ye fɛɛn min latigɛ nimanfɛn bɛɛ ye, o ye saya ye. Mun na e be Fɛɛn bɛɛ kuntigi ka kolatigɛnin sɔsɔ? Hali n'i sii ye saan tan ye, walima kɛmɛ, walima waa kelen, o tena jati lahara! Alaɲasiranbali ka ɲagwan

⁵Kojugukɛlaw deenw ma ɲi, u b'u ka waati caaman kɛ Alaɲasiranbaliw fɛ.

⁶Kojugukɛlaw ka cɛɛn bena cɛn, u deenw bena to maloya la.

⁷Alaɲasiranbali deenw ben'a jalaki, bari ale lo bena kɛ sababu ye u be maloya.

⁸Aw Alaɲasiranbaliw, aw minw be Fɛɛn bɛɛ kuntigi ka sariya cɛn, bɔnɛ ye aw ta ye.

⁹Aw be wolo danga le kama, n'aw be sa fana, aw be danga sɔrɔ.

¹⁰Fɛɛn min bɔra dugukolo la, ale be segi yen, o la, Alaɲasiranbaliw danganin kɔ, o be halaki. Tɔgɔɲuman sɔrɔ

¹¹Adamaden farisogo te foyi ye, nga mɔgɔtilennin tɔgɔ tena tunu.

¹²Janto i tɔgɔɲuman la, bari ale be se ka to yen i tɛmɛnin kɔ, a be mɛn ka tɛmɛ sanu caaman kan.

¹³Mɔgɔ ka sii sɔrɔ k'a to hɛrɛ la, o tileda be lɔn, nga tɔgɔɲuman be to yen kudayi. Maloyakow

¹⁴N deenw, aw ye kalan min sɔrɔ, aw k'o mara ɲamalɔ la. Lɔnniya dogonin, walima nafolo dogonin, olu fila be mun ɲa?

¹⁵Mɔgɔ k'a ka nalomanya dogo, o ka fisa ni lɔnniya dogo ye.

¹⁶Mɔgɔ ka kan ka maloya koo minw na, ne bena olu le koo fɔ. Tiɲɛ na, mɔgɔ man kan ka janto maloyako bɛɛ la. Ka fara o kan, mɔgɔ bɛɛ ka koo faamucogo te kelen ye.

¹⁷Mɔgɔ ka kan ka maloya ka tilenbaliyako kɛ a wolobagaw ɲana, ani ka galon tigɛ faamaw ɲana.

¹⁸Kana kojugu kɛ kititigɛla ɲana, kana sariya cɛn Ala ka jama cɛma, kana i tɔɲɔgɔn, walima i teri namara.

¹⁹Maloya ka soɲani kɛ i sigiɲɔgɔnw cɛma, maloya k'i kali, walima ka dadiko cɛn. Maloya k'i daladumuni dali, walima ka ban k'i dalibaga sɔn.

²⁰Ni mɔgɔ dɔ y'i fo n'i m'a jaabi, i ka maloya o la. K'i ɲaa bɔ kakalamuso fɛ, o ka kɛ maloya ye i fɛ.

²¹K'i fasodenɲɔgɔn minɛko juguya, walima ka mɔgɔ dɔ niyɔrɔ minɛ, o ka kɛ maloyako ye i fɛ. K'i ɲaa bɔ mɔgɔ wɛrɛ ka muso fɛ, o ka kɛ maloyako ye i fɛ.

²²Maloya ka i ka baaradenmusoman ɲini, maloya ka gwɛrɛ a ka ladilan na. Maloya k'i teriw nɛni, walima k'u kɔrɔfɔ i ka difɛn kosɔn.