Read dyu Sira deen ka kitabu 42 Bible Online

Sira deen ka kitabu 42 - dyu bible

Sira deen ka kitabu 42

¹Kana i ka mɛnta kɛ i dalakuma ye. Kana gundo walaka. O la, i bena maloyasɔbɛ lɔn, e fana bena tɔgɔɲuman sɔrɔ. Minw te maloyako ye, o filɛ:

²N'i be Fɛɛn bɛɛ kuntigi ka sariya bato, o man kan ka kɛ maloyako ye i fɛ. Fɛɛn bɛɛ kuntigi ka bɛɛn koo man kan ka kɛ maloyako ye i fɛ, walima k'a yira ko Alaɲasiranbali dɔ jalakinin te koo dɔ la, e man kan ka maloya n'o ye.

³Ka koo ɲanabɔ n'i teri, walima i taamaɲɔgɔn ye sira kan, walima k'i cɛɛn tilan ni mɔgɔ wɛrɛ ye, o te maloyako ye.

⁴N'i be fɛɛn suman ka ɲa kilo kan, kana maloya n'o ye. N'i ye tɔnɔ caaman, walima fitini sɔrɔ, o te maloyako ye.

⁵N'i ye tɔnɔ fana sɔrɔ i ka feerefɛn na, o te maloyako ye. E kana maloya k'i ka denmisɛnw ladi koo caaman na. K'i ka baaradenjugu bugɔ fɔɔ k'a fari kɛ joli ye, o te maloyako ye.

⁶N'i ka muso te lanamɔgɔ ye, a ka fisa ka taamasiɲɛ la i ka fɛɛnw kan. Ni mɔgɔw b'i fɛ minw bolo ka fiɲɛ, i ka sɔgɔnan dilan i ka fɛɛnw na.

⁷N'i be fɛɛn dɔ dira kalifayɔrɔ la, i k'o jati, walima k'o suma. N'i be fɛɛnw di mɔgɔ wɛrɛ ma, walima i be minw sɔrɔ, kana maloya k'o sɛbɛn.

⁸Kana maloya ka mɔgɔkolon ni naloman kolo, kana maloya ka mɔgɔkɔrɔba jalaki a ka kakalayako la. O la, e ben'a yira ko e kalanna tigitigi, mɔgɔ bɛɛ bena i tɔgɔɲuman fɔ fana. Denfa ka hami a denmuso kosɔn

⁹Denmuso ka koo ye hami ye a facɛ fɛ fɔɔ a te sinɔgɔ. K'a to sunguruya la, facɛman be siran ko a furuwaati kana tɛmɛ. N'a fana furula, a be siran ko a koo kana goya a cɛɛ ye.

¹⁰K'a sunguruman to, facɛman be siran ko u kan'a nigɛ ka kɔnɔ la a la. N'a fana tagara cɛso la, a be se ka kɛ tilenbali ye a cɛɛ faan fɛ. K'a to o yɔrɔ la fana, a be se ka kɛ deen sɔrɔbali ye.

¹¹Ni denmuso te se k'a yɛrɛ minɛ, a ka fisa k'a kɔlɔsi kosɔbɛ, n'o tɛ, a bena i di e juguw ma u b'i lɔgɔbɔ, i ka dugumɔgɔw bena to ka talenw la n'i tɔgɔ ye, a bena kɛ sababu ye ka jama lajɛn, a bena kɛ sababu ye k'i maloya i ka mɔgɔw cɛma.

¹²E denmuso man kan k'a yɛrɛ yira cɛɛ si la, a fana man kan ka to muso furuninw cɛma.

¹³Bari, muso furuninw b'u ka juguya yira, i ko fani min be bɔn.

¹⁴Cɛɛ ka juguya ka fisa ni muso ka ɲumanya ye, muso malobali b'a facɛ kuun surun. KALAN DUURUNAN Danbaga ka boɲa

¹⁵Matigi ye koo minw bɛɛ kɛ, ne bena olu le fɔ sisan. Ne ye min ye, ne bena o le lakali. Ala ye fɛɛn bɛɛ dan a ka kuma le barika la, a ye koo min latigɛ, o kɛra ka kɛɲɛ n'a sago ye.

¹⁶O la, tile be jɛni ka se fɛɛn bɛɛ ma, Matigi ka sebagaya be ye a ka danfɛnw bɛɛ la.

¹⁷Matigi ka mɛlɛkɛw yɛrɛ ma se k'a ka kabakow bɛɛ ɲafɔ, Matigi, Setigi ye minw sigi ka ɲa diɲɛ na, janko u ka lɔ ka ɲa a ka sebagaya la.

¹⁸Ala be kɔgɔji ni mɔgɔ kɔnɔnako lɔn. Fɛɛn bɛɛ kuntigi be se ka koo bɛɛ lɔn, a be waati taamasiɲɛw lɔn.

¹⁹A be kotɛmɛninw ni koo nataw fɔ, a be koo dogoninw yira.

²⁰A be adamaden ka miiriya bɛɛ kala ma, kuma si dogonin te a ma.

²¹A ye kobabaw sigi, a ka lɔnniya tun ye min sɔrɔ. A b'a cogo la tuma bɛɛ. A ye min dan, foyi te bɔ o la, foyi te fara o kan. A mako te ladili la fana.

²²Ala ka kɛta bɛɛ ka ɲi haali, fɔɔ ka taga se tasumakisɛfitini ma.

²³O fɛɛn nunu be yen, u fana bena to yen kudayi. U labɛnnin lo k'a sago kɛ dɔrɔn.

²⁴Fɛɛn bɛɛ ye fila fila ye, kelen bɔnin be a tɔɲɔgɔn ma, a ma foyi dan min ma dafa.

²⁵O fɛɛn nunu be ɲɔgɔn dafa, a ka sebagaya la, o fɛɛn nunu filɛ nigɛ bena bɔ jɔn le la?