Read dyu Sira deen ka kitabu 44 Bible Online

Sira deen ka kitabu 44 - dyu bible

Sira deen ka kitabu 44

¹Bɛmaw tanuko Mɔgɔ minw ye tɔgɔ sɔrɔ, an ka olu makiri. An k'an bɛmaw makiri ka kɛɲɛ n'u nacogo ye.

²Matigi ye boɲa la u kan kosɔbɛ, mɔgɔbabaw tun lo, fɔlɔfɔlɔ la.

³Mɔgɔ dɔw tun sɔrɔla ka kɛ masaw ye k'u ka yɔrɔ mara, minw ye tɔgɔw sɔrɔ u ka sebagaya kosɔn, minw kɛra ladilikɛlaŋanaw ye u ka hakilitigiya kama, ka kɛ lagwɛlikɛlaw ye.

⁴Dɔw kɛra jama kuntigisɔbɛw ye, dɔw kɛra ɲamɔgɔ hakilimanw ye, dɔw kɛra lɔnnikɛlaw ye k'u ka miiriyaw sɛbɛn, dɔw kɛra kalanfa lɔnnikɛlaw ye.

⁵Dɔw ye dɔnkiliw labɛn, dɔw ye makirikuma sɛbɛn.

⁶Dɔw tun ye barika sɔrɔ u ka nafolo sababu la, u fana tora hɛrɛ la u ka yɔrɔ la.

⁷U bɛɛ ye boɲa sɔrɔ u ka waati la, u y'u tanu k'u to sii la.

⁸U dɔw tɔgɔ ma tunu u tɛmɛnin kɔ, u b'u makirila halibi.

⁹Nga dɔw be yen minw tununa pewu, u tɛmɛna i ko u yɛrɛ tun ma wolo, u ka koo kɛra i ko u ma kɛ yen ka ye fewu. U deenw fana ta kɛra ten u kɔfɛ.

¹⁰Nga mɔgɔɲuman dɔw filɛ, mɔgɔ ma se ka ɲinɛ u kɔ, u ka kɛwaliɲumanw kosɔn.

¹¹U ka nafolo sera u kɔmɔgɔw ma, u tulomasamaw ye cɛɛn sɔrɔ u fɛ.

¹²U kɔmɔgɔw b'u ka bɛɛn bato ni Ala ye, u deenw tora o le kama.

¹³U kɔmɔgɔw tena ban ka ye fewu, boɲa min b'u kan, foyi tena se k'o bɔ.

¹⁴U lanin be hɛrɛ la kaburu kɔnɔ, u tɔgɔ do be welela kudayi.

¹⁵Mɔgɔw bɛɛ be u ka lɔnniya fɔ, jama be u makiri la. Enɔki ka koo

¹⁶Enɔki koo diyara Matigi ye, a y'a ta ka taga n'a ye a fɛ. Ale ka koo kɛra ka sɔnyɛlɛma hakili di mɔgɔw ma Alaɲasiran kosɔn. Nuhun ka koo

¹⁷Nuhun kɛra mɔgɔtilennin ye. Ala ka dimi waati la, ale lo kɛra sababu ye adamaden sii tora. Ale lo barika la, danfɛnw tɔɔ tora dugukolo kan jiba tɛmɛnin kɔ.

¹⁸Ala ye bɛɛn cɛnbaliw kɛ n'a ye, ko a tena o balawu ɲɔgɔn kɛ tugu, ka fɛɛn bɛɛ cɛn. Ibrayima n'a deenw ka koo

¹⁹Ibrayima kɛra siya caaman faa ye, a ka boɲa ɲɔgɔn tun te yen.

²⁰A ye Fɛɛn bɛɛ kuntigi ka sariya bato, a bɛnna n'a ye fana, a ye o bɛɛn nin taamasiɲɛ kɛ a yɛrɛ fari la, o kɛra kɛnɛkɛnɛ ye. Ala y'a kɔrɔbɔ tuma min na fana, a kɛra kantigi ye.

²¹O le y'a to, Ala ye layidu ta a ye ko siya wɛrɛw bena hɛrɛ sɔrɔ ka bɔ a kɔmɔgɔw fɛ. A ye layidu t'a ye fana ko a kɔmɔgɔw bena caya i ko cɛncɛn, ko u bena boɲa sɔrɔ i ko lolow, ko u bena jamana sɔrɔ u faso ye, ko a daan bena kɛ kɔgɔji fila ye, k'a ta Efarati baji ma, fɔɔ ka se dugukolo daan na.

²²A y'o koo kelen le fɔ Isiyaka ye, a y'o kɛ a facɛ Ibrayima kama.

²³K'a fɔ ko mɔgɔ bɛɛ bena hɛrɛ sɔrɔ, a y'o koo nin kɛ kɛta ye Yakuba ka waati la le. A y'o hɛrɛ nin sɔrɔ kɛ kɛta ye, ka jamana d'a ma k'o kɛ a faso ye, a ye min tilan sigiyɔrɔ sigiyɔrɔ k'a di Yakuba deen tan ni fila kɔmɔgɔw ma. Musa ka koo Ala ye mɔgɔ dɔ woloma Yakuba kɔmɔgɔw cɛma, mɔgɔɲuman dɔ, a koo diyara mɔgɔ bɛɛ ye.