Read dyu Sira deen ka kitabu 45 Bible Online

Sira deen ka kitabu 45 - dyu bible

Sira deen ka kitabu 45

¹Musa koo diyara Ala ni mɔgɔw ye, n'an miiril'a la, an be Ala fo le dɔrɔn.

²Ala ye mɛlɛkɛw ka boɲa ɲɔgɔn le l'a kan, a y'a boɲa fɔɔ a juguw tun be siran a ɲa.

³Ni Musa tun ye kabako min koo fɔ, o tun be kɛ joona Ala fɛ, Ala ye boɲa l'a kan faamaw ɲakɔrɔ, a ye sariya d'a ma min kɛr'a ka jama ta ye, a y'a to a y'ale Ala ka sebagaya dɔɔni ye.

⁴Musa tun tilennin lo, a ka koo tun ka di, o la, Ala y'a kɛ a yɛrɛ ta ye, k'a woloma ka bɔ tɔ nunu cɛma.

⁵A kuman'a fɛ tigitigi, a bilar'a ɲa sankabafin na. A ye sariya d'a ma ɲaa ni ɲaa. Sariya min b'a to mɔgɔ be to nii na, ani ka hakili sɔrɔ, janko ka Yakuba kɔmɔgɔw kalan bɛɛn la, ani ka Isirayɛlidenw kalan a ka kolatigɛninw na. Arɔn ka koo

⁶Ala ye Arɔn kɛ mɔgɔbaba ye ka bɔ Levi kɔmɔgɔw la, ale kɛra Ala ka mɔgɔ ye i ko a balimacɛ Musa.

⁷Ala ye lɔyɔrɔ d'a ma ka kɛɲɛ ni sariya wilibali ye. A y'a kɛ jama ka sarakalasebaga ye. A ye masirifɛnw d'a ma k'a kɛ a dagamuna, a ye foroca dakamana d'a ma.

⁸A y'a masiri ni masirifɛnɲuman ɲumanw ye. A y'a yɛrɛ ka sebagaya taamasiɲɛw l'a kan, a ye kurusi ni foroca ani sarakalasefani d'a ma.

⁹A tun ye gerenadiyiriden bisigi dilan fani dagolo la k'a lamini, ani welennin sanulaman caaman, olu tun be to ka mankan kɛ Arɔn taamatuma na, u mankan tun be mɛn ten Alabatosoba kɔnɔ, ka Ala hakili jigi a ka jama la.

¹⁰Fanidanbagaŋana dɔ tun ye fani min dan ni jese kɔlɔbolaman ye, ni wuleman ani sanu ye, o le tun be Arɔn fɛ. Kititigɛ disilafani tun be fani nin kan, ni tiɲɛ yira fɛɛn.

¹¹Fanidanbagaŋana dɔ tun ye disilafani nin dan ni jese wuleman cɔncɔn ye, k'a masiri ni kabakuru sɔngɔgwɛlɛnw ye, minw tun ɲɛgɛnna i ko taamasiɲɛlafɛn. U tun ye Isirayɛli deen tan ni fila le tɔgɔ ɲɛgɛn u kan, k'u don minɛfɛn sanulaman dɔ kɔnɔ, sanubaaralaŋana ye minw lalaga.

¹²Tulolanigɛ bisigi sanulaman dɔ tun dulonnin be Arɔn ka kunmelekefani na, ni sɛbɛnɔ dɔ b'a kan ko: «Matigi ta.» Boɲa taamasiɲɛ tun lo, nigɛbaarabagaŋana bulonɔ tun lo, a filɛli tun ka di, a kɛra masirifɛn dafanin ye.

¹³O fani nunu ɲɔgɔn tun ma ye Arɔn ka tile ɲa, u tun ka ɲi kosɔbɛ. Mɔgɔ wɛrɛ tun t'u don fewu, fɔɔ Arɔn dencɛw n'a kɔmɔgɔw, olu le tun b'u don kudayi.

¹⁴A tun be to ka saraka minw bɔ siɲɛ fila tile kɔnɔ kudayi, olu tun be to ka jɛni le pewu.

¹⁵Musa le tun y'a don o baara la, ka tulu bɔn a kunna. O ye bɛɛn cɛnbali ye kudayi, a be to yen Arɔn n'a deenw faan fɛ ka taga se diɲɛ wili ma. U kɛra sarakalasebagaw ye, u be yen ka Ala batoko ɲanabɔ, ani ka duba kɛ jama ye Ala tɔgɔ la.

¹⁶Arɔn le wolomana ka bɔ tɔɔ bɛɛ cɛma, janko a ka to ka saraka jɛni sarakabɔyɔrɔ kan, ani wusulan, o ka kɛ hakilijigifɛn ye, ani ka jama ka kojuguw yafa sɔrɔ.

¹⁷Ala tun y'a ka sariya ɲafɔko see di Arɔn ma, janko a k'ale sago yira Yakuba kɔmɔgɔw la, ani ka Isirayɛlidenw ɲaa yɛlɛ n'a ye.

¹⁸Mɔgɔ wɛrɛw wilil'a kama kongokolon kɔnɔ, a keliya donna u la, u dimina kosɔbɛ, olu tun ye Datan ni Abiramu kɔmɔgɔw ye, ani Kore ka jɛnkulu.

¹⁹Matigi y'o ye, o ma diy'a ye, a dimina kosɔbɛ, a y'a to kabako dɔ y'u sɔrɔ, tasuma y'u jɛni ka ban pewu.

²⁰Matigi ye dɔ fara Arɔn ka kunkɔrɔta kan, ka niyɔrɔ d'a ma, a ye suman deen fɔlɔw kɛ a ta ye. O seen fɛ, a ye balocogo di ale n'a kɔmɔgɔw ma.

²¹O kama, olu ka dumuni ye sarakafɛnw ye, minw bɔra Matigi ye, Matigi y'o di ale n'a deenw ma.

²²U ma niyɔrɔ sɔrɔ dugukolo la Isirayɛlidenw cɛma, niyɔrɔ t'u fɛ jama cɛma, bari Ala le y'a fɔ ko: «Ne le y'i niyɔrɔ ye, n'i ka nafolo ye.» Pinasi ka koo

²³Pinasi ye Eleyazari deen ye, ale lo kɛra mɔgɔ sabanan ye boɲa lara min kan, a ka jijali kama Alaɲasiran la. O la, Ala yafara Isirayɛlidenw ma u ka kojuguw la.

²⁴O le kosɔn, Ala ye hɛrɛ bɛɛn kɛ n'a ye k'o kɛ a ka sara ye, k'a kɛ sarakalasebaga ye a ka yɔrɔ la, ani a ka jama kuntigi ye, janko sarakabɔko kuntigiya ka to ale n'a deenw bolo kudayi.

²⁵Ala y'a daa di Zuda kɔmɔgɔ Zese deen Dawuda ma ko Masaya bena to ka tɛmɛtɛmɛ faa n'a deen bolo, nga o bena kɛ deen kelen dɔrɔn ye. K'a sɔrɔ Arɔn cɛɛn ye a kɔmɔgɔw bɛɛ ta ye.

²⁶Ne be Ala dali aw Arɔn kɔmɔgɔw ye ko a ka lɔnniya d'aw ma, janko aw ka se k'a ka jama ka koow ɲanabɔ tilenninya la, aw kana fɔn aw ka tɔnɔw n'aw ka boɲa la waati nataw la.