Read dyu Sira deen ka kitabu 47 Bible Online

Sira deen ka kitabu 47 - dyu bible

Sira deen ka kitabu 47

¹Kira Natan ka koo Samuyɛli tɛmɛnin kɔ, Natan le tugura, a ye kiraya kɛ Dawuda ka tile la. Dawuda ka koo

²U be jɛnɲɔgɔnya saraka bɔ, k'a tulu bɔ danna cogo min na, a kɛra ten, Dawuda wolomana ka bɔ Isirayɛlidenw cɛma.

³A tun be to ka tolon kɛ jaraw la i ko badenw, ka waraw kɛ i ko sagadenw.

⁴K'a to a ka denmisɛnya la, a ye cɛjan dɔ faga, o cogo la, a ye maloya bɔ a ka siya kunna. A ye bɛrɛ don a ka bɛrɛbonnan kɔnɔ tuma min na, a ye dabayakuma fɔbaga Goliyati faga.

⁵A tun ye Matigi, Fɛɛn bɛɛ kuntigi dali, ale ye barika don a la, a ye kɛlɛdenŋana faga, ka fanga di a ka siya ma.

⁶O le y'a to a ye boɲa sɔrɔ, u ko a ye jugu mɔgɔ waa tan (10 000) faga, u y'a tanu ka to ka Matigi fo. U ye masafugulan biri a kunna.

⁷Bari a y'u laminijuguw kolo u ye, a y'a kɛlɛbaga filisiw halaki, a y'u ka fanga cɛn pepewu.

⁸O bɛɛ la fana, a ye Fɛɛn bɛɛ kuntigi Ala boɲa, a y'a tanu kuma na. A ye dɔnkili la a ye n'a dusu bɛɛ ye, a Danbaga koo diyar'a ye.

⁹A ye dɔnkililabagaw ka jɛnkulu sigi sarakabɔyɔrɔ kɔrɔ, janko olu ka to ka dɔnkili la yen.

¹⁰A ye ɲanagwɛw koo boɲa, a y'o kɛcogo ɲanabɔ kosɔbɛ, janko u ka se ka Matigi tɔgɔɲuman fɔ, kabini dugugwɛdafɛ fɔli ka kɛ Ala ka yɔrɔ la.

¹¹Matigi ye Dawuda ka fili yafa a ma, a ye see d'a ma kudayi. A ye bɛɛn kɛ n'a ye masaya kosɔn k'a ka masaya sabati Isirayɛlidenw kunna. Solomani ka koo

¹²Dawuda tɛmɛnin kɔ, a deen hakilitigi dɔ tugur'a kɔ. O deen nin ka koo sabatira Dawuda le barika la.

¹³Solomani y'a ka waati kɛ ɲasuma na, hɛrɛ tun be ale n'a juguw bɛɛ cɛ. A kɛra ten, Solomani sera ka batoso lɔ k'a di Matigi ma, a ye sigiyɔrɔ labɛn Matigi ye kudayi.

¹⁴Solomani, e kɔni ye lɔnniya sɔrɔ e denmisɛn tuma! Hakili b'i fɛ kosɔbɛ i ko baa fanin be jii la cogo min na.

¹⁵E ka lɔnniya sera dugukolo yɔrɔ bɛɛ la, e ka siirinw n'i ka talenw y'a fa.

¹⁶E tɔgɔ bɔra fɔɔ ka se dugukolodenninw kan yɔrɔjan kɔgɔji cɛma, e koo diyara mɔgɔw ye e ka hɛrɛ ɲini kosɔn.

¹⁷E ka dɔnkiliw, ani e ka talenw n'i ka siirinw, an'i ka jaabiliw tun ka di mɔgɔ bɛɛ ye.

¹⁸E tun ye sanu sɔrɔ i ko fugan, ka warigwɛ sɔrɔ i ko nigɛ gwansan. Matigi Ala tɔgɔ la, min tɔgɔ ko Isirayɛli ka Ala.

¹⁹Nga i ye musoko diya i yɛrɛ ye kosɔbɛ, o la, e tun kɛra i ko jɔɔn, musoko fɛ.

²⁰E y'a kɛ ten, dɔ bɔra e ka boɲa na, e y'i kɔmɔgɔw nɔgɔ, k'a kɛ Ala dimina u kɔrɔ.

²¹E ka jamana nana tilan ka kɛ fila ye, Efarayimu kɔmɔgɔw murutira ka dɔ kɛ.

²²Nga o bɛɛ n'a ta, Matigi m'a ka ɲumanya dabila, a ka layidu ma to dafabali, A m'a to a ka mɔgɔ wolomanin kɔmɔgɔw ka ban. Mɔgɔ min koo diyar'a ye, a ma sɔn o tigi ka siya ka tunu. A ye tɔɔ to Yakuba ka siya la, ka nɔtabaga di Dawuda ma a kɔmɔgɔw la. Orobowamu ka koo

²³Solomani sara u y'a la n'a faaw ye tuma min na, a tun y'a kɔmɔgɔ nalomanba hakilitan to a kɔfɛ. Orobowamu wilila ka koo dɔ latigɛ, min kɛra sababu ye jama murutira. Zerobowamu ka koo Nebati dencɛ Zerobowamu ye hakɛ kɛ, a fana ye hakɛ kɛ sira yira Efarayimu kɔmɔgɔw la.

²⁴Olu ye hakɛ kɛ kosɔbɛ fɔɔ u y'u minɛ ka taga n'u ye jamana wɛrɛ la.

²⁵U tora kodagabali la fɔɔ u tagara halaki.