Read dyu Sira deen ka kitabu 48 Bible Online

Sira deen ka kitabu 48 - dyu bible

Sira deen ka kitabu 48

¹Eli ka koo Kira Eli wilila i ko tasuma, a ka kuma tun be manamana i ko tasuma.

²A tun y'a kɛ kɔngɔ donna u fɛ, a ka jijali barika la, a y'a kɛ u tɔɔ tora fitini.

³Ka kɛɲɛ ni Matigi ka fɔta ye, a y'a kɛ saan lɔra, a fana y'a kɛ tasuma bɔra sanfɛ ka ben siɲɛ saba.

⁴Eli, i ye tɔgɔ sɔrɔ i ka kabakow kosɔn! Jɔn be se k'a yɛrɛ boɲa ko a be se i ta ɲɔgɔn na?

⁵Ka kɛɲɛ ni Fɛɛn bɛɛ kuntigi Ala ka fɔta ye, i ye mɔgɔ sanin kunun, i ye suu wili ka bɔ kaburu la.

⁶I ye masacɛw halaki, ka mɔgɔbabaw kɛ u bɔra u ka dilanw kan ka don kaburu kɔnɔ.

⁷K'i to Sinayi kulu kan min ye *Orɛbu ye, Matigi y'i halaki, a y'i kiti kosɔbɛ.

⁸I ye masacɛw mɔ ni tulu ye dɔw nɔɔ na, i ye kira wɛrɛw woloma k'u bila i nɔɔ na.

⁹E min yɛlɛla sanfɛ, funufunu tasumalaman kɔnɔ, ni wotoro ye soo tasumalamanw be min samana,

¹⁰ka kɛɲɛ ni Ala ka kuma ye, e kɔni labɛnnin lo loon kama, e bena Ala ka dimi manla loon min na fɔlɔ sanni a ka wili. Ele le bena faa ni deen kɛ u be bɛn, e bena Isirayɛli deen tan ni fila kɔmɔgɔw kɛ u be sigi ka ɲa.

¹¹Mɔgɔ minw y'i ye, olu dagamunin lo, ani minw sara k'u to Ala kanu la. An fana, an bena to nii na. Elize ka koo

¹²Funufunu tagara ni Eli ye ka ban tuma min na, sebagaya min tun be Eli fɛ, o yɛlɛmana Elize fɛ. Elize ma sɔn k'a yɛrɛ to faama si ka se a kɔrɔ, mɔgɔ si ma se k'a bali foyi la.

¹³Fɛɛn si tun te yen min tun ka gwɛlɛ Elize ma, hali k'a to kaburu kɔnɔ, a ye kiraya kɛ.

¹⁴K'a to nii na, a ye kabakow kɛ. Hali a sanin kɔ, a ka kobabaw yera kosɔbɛ.

¹⁵O n'a ta bɛɛ, jama ma se ka nimisa ka faran u ka kojuguw la. U ma ban u ka hakɛ la, fɔɔ u y'u minɛ ka bɔ u ka jamana na, k'u jɛnsɛn dugukolo kan. U tɔɔ tora dɔɔni dama, ani masacɛ kelen ka bɔ Dawuda ka soo kɔnɔ.

¹⁶U dɔ ye Ala sago kɛ, dɔ fana ye hakɛ kɛ kosɔbɛ. Ezekiyasi ni Ezayi ka koo

¹⁷Ezekiyasi y'a ka masadugu lalaga ka barika don a la. A ye jii sama ka na n'a ye dugu nin kɔnɔ. A ye gweenw kɛ ka fara ci, a ye jii lɔyɔrɔw lɔ fana.

¹⁸Masacɛ Senakeribu wilila ka na Zeruzalɛmu kama ale ka tile la. A y'a ka kɛlɛkuntigi bila ka n'a kama, ale ye dabayakuma fɔ kosɔbɛ dugu nin kama.

¹⁹O kama, dugumɔgɔw jigi tigɛra fɔɔ u yɛrɛyɛrɛla. U tɔɔrɔla i ko muso tintɔ.

²⁰Nga u y'u ka dalili ɲaa sin Matigi Makaritigi ma, u y'u bolo kɔrɔta a faan fɛ. K'a to sankolo la, Ala y'u jaabi o yɔrɔnin kelen, a y'u kisi kira Ezayi sababu la.

²¹Matigi ye Asirikaw kɛlɛ, a ka mɛlɛkɛ y'u halaki.

²²Bari, Ezekiyasi tun be Matigi sago kɛ, a y'a bɛma Dawuda ka sira taama kosɔbɛ, i ko Ezayi tun be to k'a ɲini a fɛ cogo min na. Ezayi tun ye kiraba ye, a ka kirayakuma tun be kɛ wajibi ye.

²³Tile tun segira kɔfɛ Ezayi ka tile le la, ka dɔ fara masacɛ sii kan.

²⁴Ala ye waati laban koo yir'a la a ka sebagaya la, a kɛra ten, Siyɔn dugumɔgɔw jigi tugura.

²⁵Koo minw bena kɛ laban ɲa, a y'o ye k'a fɔ. Koo minw tun dogonin lo, a ye olu fɔ, sanni o ka kɛ.